ព្រះវិហារ៖ ឧកញ៉ា ឡាយ ឈុនហួ ប្រធានសហព័ន្ធសហស្រូវអង្ករកម្ពុជា កាលពីថ្ងៃទី១៦ ខែកញ្ញា ឆ្នាំ២០២៥នេះ បានចូលរួមជាភ្ញៀវកិត្តិយស ក្នុងពិធីចុះហត្ថលេខានៃកិច្ចសន្យាកសិកម្ម រវាងក្រុមហ៊ុនឯកជនចំនួនពីរ រួមមានក្រុមហ៊ុនអេមរុរ៉ាយស៍ និងក្រុមហ៊ុនសាជីវកម្មសហគមន៍កសិកម្មកម្ពុជា ដែលជាសមាជិកសហព័ន្ធស្រូវអង្ករកម្ពុជា លើការបញ្ជាទិញកសិផលចំនួនពីរមុខ រួមមានស្រូវសរីរាង្គ និងដំឡូងមីសរីរាង្គ លើបរិមាណសរុប៧៣ ៨០០តោន ពីកសិករមកពីសហគមន៍កសិកម្មចំនួន៣២នៅក្នុងខេត្តព្រះវិហារ។
ការចុះកិច្ចព្រមព្រៀងទិញ-លក់ស្រូវ និងដំឡូងមីសរីរាង្គនេះ បានធ្វើឡើងតាមរយ:ការអនុវត្តផលិតកម្មកសិកម្មតាមកិច្ចសន្យា ដែលរៀបចំឡើងនៅរសៀលថ្ងៃទី១៦ ខែកញ្ញា ឆ្នាំ២០២៥ នៅសាលប្រជុំភោជនីយដ្ឋាន លី ហួត ក្រុងព្រះវិហារ ក្រោមអធិបតីភាព លោក អ៊ុក គឹមសាន្ដ អភិបាលរងខត្តព្រះវិហារ ព្រមទាំងមានការចូលរួមពីក្រុមហ៊ុនបញ្ជាទិញ មន្ទីរជំនាញពាក់ព័ន្ធ អង្គការដៃគូ ថ្នាក់ដឹកនាំ និងតំណាងសហគមន៍កសិកម្មទាំង៣២ផងដែរ ។
នៅក្នុងកម្មវិធីនេះដែរ ឧកញ៉ាប្រធានសហព័ន្ធស្រូវអង្ករកម្ពុជា បានលើកអំពីការសម្រេចបាននូវការនាំចេញអង្ករក្នុងរយៈពេលប្រាំបីខែ នៃឆ្នាំ២០២៥ បានចំនួន៤៧២ ៨០៣តោន ដែលគិតជាទឹកប្រាក់បានចំនួន៣៤៨,១៨លានដុល្លារ ដែលមានកំណើនជិត២០ភាគរយ និងការនាំចេញស្រូវសើមបានចំនួន៤ ៨៤៨ ៨៣៥តោន ដែលគិតជាទឹកប្រាក់បានប្រមាណជា១ ១១៤,២៥លានដុល្លារ ដែលមានកំណើនប្រមាណជា៥៤ភាគរយ។
ដែលជារួម ការនាំចេញនេះបាននាំយកមកនូវចំណូលចូលក្នុងសេដ្ឋកិច្ចជិត១ ៤០០លានដុល្លារ ដែលកំណើនទាំងអស់នេះ គឺកើតចេញពីកិច្ចខំប្រឹងប្រែងរបស់គ្រប់ភាគី និងតួអង្គពាក់ព័ន្ធទាំងអស់ ជាពិសេសប្រជាកសិករ។
ជាមួយគ្នានេះផងដែរ ឧកញ៉ាប្រធានសហព័ន្ធស្រូវអង្ករកម្ពុជា ក៏បានលើកឡើងអំពីផែនការសម្រាប់អាណត្តិទី៥ ដោយបានកំណត់យកនូវការពង្រឹង និងពង្រីកខ្សែច្រវាក់តម្លៃ និងផ្គត់ផ្គង់ ការជំរុញការដាំដុះ និងការធ្វើសមាហរណកម្មដាំដុះទៅនឹងនិន្នាការថ្មី និងការធ្វើពិពិធកម្មផលិតកម្មកែច្នៃ និងទីផ្សារ ជាគោលនយោបាយផងដែរ៕
