កំពង់ធំ៖ អ្នកជំនាញការខាង ម៉ាកសម្គាល់ភូមិសាស្ត្រទំនិញនៅក្នុងស្រុកបានឱ្យដឹងថា ស្វាយចន្ទីកំពង់ធំនឹងក្លាយជាម៉ាកសម្គាល់ភូមិសាស្ត្រទំនិញ (GI) ដោយរំពឹងថា អាចរៀបចំចុះបញ្ជីបាននៅដើមឆ្នាំ២០២៦ និងជួយឱ្យផលិតផល (GI)នេះមានទីផ្សារកាន់តែល្អប្រសើរ និងតម្លៃលក់កើនឡើងនៅពេលខាងមុខ។
លោក សុខ សារ៉ង អ្នកជំនាញការខាងម៉ាកសម្គាល់ភូមិសាស្ត្រទំនិញ បានឱ្យដឹងថា ទាក់ទងនិងការកំណត់ផលិតផលអ្វីមួយ ធ្វើម៉ាកសម្គាល់ភូមិសាស្ត្រទំនិញ ជាដំបូងត្រូវសិក្សាអំពីលទ្ធភាពនៃការចុះបញ្ជីជាមុនសិន ហើយការចុះបញ្ជីវាចំណាយពេលតិច ឬច្រើនអាស្រ័យលើប្រភេទផលិតផល រួមនិងផលប្រយោជន៍កសិករ និងអាជីវករ។
តួយ៉ាងពាក់ព័ន្ធនិងផលិតផល ដែលបាននិងកំពុងធ្វើ ដូចករណីរឿងស្វាយចន្ទីកំពង់ធំនេះ វាស្ថិតក្នុងដំណាក់កាលនៃការចុះបញ្ជី ។ បើតាមបទពិសោធន៍នៃការចុះបញ្ជីនេះនៅប្រទេសបារាំង គេចំណាយពេលបីឆ្នាំ។ តែនៅកម្ពុជាតាមបទពិសោធន៍កន្លងមកត្រូវការចំណាយពេលជាងមួយឆ្នាំ អាចរៀបចំចុះបញ្ជីបាន។
លោក សុខ សារ៉ង មានសុទិដ្ឋិនិយមថា “ស្វាយចន្ទីកំពង់ធំ យើងគ្រោងចុះបញ្ជីឱ្យបានយ៉ាងយូរអាចនៅដើមឆ្នាំ២០២៦។ ការចុះបញ្ជីស្វាយចន្ទីកំពង់ធំនេះ យើងរំពឹងថា វានឹងជួយពង្រីកទីផ្សារបានបន្ថែមទៅលើផ្សារ ដែលយើងមានស្រាប់ទាំងនៅក្នុងស្រុក និងក្រៅប្រទេស ហើយតម្លៃនឹងកើនឡើងជាងមុន”។
បើតាម លោក សុខ សារ៉ង អ្នកជំនាញការខាងម៉ាកសម្គាល់ភូមិសាស្ត្របច្ចេកទេសនីតិវិធីនៃកិច្ចការពារម៉ាកសម្គាល់ភូមិសាស្ត្រទំនិញ (GI), នៅកម្ពុជាច្បាប់ស្តីពី ម៉ាកសម្គាល់ភូមិសាស្ត្រទំនិញ ចុះថ្ងៃទី២០ ខែមករា ឆ្នាំ២០១៤ ប្រកាសលេខ ១៤៧ MoC/SM 2010 ស្តីពីការបង្កើត និងដាក់ឱ្យប្រើប្រាស់និមិត្តសញ្ញាជាតិសម្រាប់បញ្ជាក់ និងបិទលើទំនិញសម្គាល់ភូមិសាសាស្ត្រកម្ពុជា ចុះថ្ងៃទី១៦ ខែសីហា ឆ្នាំ២០១០។
លោក សុខ សារ៉ង គូសបញ្ជាក់ថា ម៉ាកសម្គាល់ភូមិសាស្ត្រទំនិញ ដែលបានចុះបញ្ជីរួចនៅកម្ពុជា និងអន្តរជាតិបានចុះបញ្ជីម៉ាកសម្គាល់ភូមិសាស្ត្រទំនិញកម្ពុជា មាន៖(១)-ម្រេចកំពត បានចុះបញ្ជីនៅថ្ងៃទី២ ខែមេសា ឆ្នាំ២០១០, (២)-ស្ករត្នោតកំពង់ស្ពឺបានចុះបញ្ជីនៅថ្ងៃទី២ ខែមេសាឆ្នាំ២០១០, (៣)-ក្រូចថ្លែងកោះទ្រង់បានចុះបញ្ជីនៅថ្ងៃទី១៥ ខែមិថុនាឆ្នាំ២០១៨, (៤)-ទឹកឃ្មុំព្រៃមណ្ឌលគិរី បានចុះបញ្ជីនៅថ្ងៃទី១០ ខែធ្នូ ឆ្នាំ២០២០, (៥)-អំបិលកំពតកែបបានចុះបញ្ជីនៅថ្ងៃទី២៤ ខែមេសា ឆ្នាំ២០២៣, (៦)-ទឹកត្រីកំពតកែបបានចុះបញ្ជីនៅថ្ងៃទី២៤ ខែមេសា ឆ្នាំ២០២៣, (៧)-បង្កងតាកែវ បានចុះបញ្ជីនៅថ្ងៃទី២៤ ខែមេសា ឆ្នាំ២០២៣,និង (៨)-ប្រហុកសៀមរាប ចុះបញ្ជីនៅថ្ងៃទី១៨ ខែមេសា ឆ្នាំ២០២៥។
សូមជម្រាបជូនថា កាលថ្ងៃទី១៥ ខែសីហា ឆ្នាំ២០២៥ នាយកដ្ឋានកម្មសិទ្ធបញ្ញានៃក្រសួងពាណិជ្ជកម្ម បានបើកកិច្ចប្រជុំពិភាក្សាស្តីពីការជំរុញកសាងកេរ្តិ៍ឈ្មោះ និងចុះបញ្ជីស្វាយចន្ទីកំពង់ធំ ជាម៉ាកសម្គាល់ភូមិសាស្ត្រទំនិញនៅពេលខាងមុខនេះ។
កិច្ចប្រជុំនេះ បានធ្វើឱ្យភាគពាក់ព័ន្ធ បានយល់ដឹងអំពីនីតិវិធីនៃការកំណត់ឈ្មោះ និងតំបន់ផលិតកម្មនៃម៉ាកសម្គាល់ភូមិសាស្រ្តទំនិញ, ឯកសារផ្លូវច្បាប់ និងបទប្បញ្ញត្តិពាក់ព័ន្ធនិងនីតិវិធីនៃការដាក់ពាក្យស្នើសុំចុះបញ្ជីម៉ាកសម្គាល់ភូមិសាស្រ្តទំនិញ នៅនាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម ព្រមទាំងការពិនិត្យ និងផ្តល់ធាតុចូលលើសេចក្តីព្រាងសៀវភៅបន្ទុកម៉ាកសម្គាល់ភូមិសាស្រ្តទំនិញ, ការរៀបចំបង្កើតគណៈកម្មការបណ្តោះអាសន្ន និងសេចក្តីព្រាងលក្ខន្តិកៈសមាគម ឬសហភាពសហគមន៍ ដែលបានរៀបចំ និងធ្វើបទបង្ហាញដោយជំនាញការជាតិ និងអន្តរជាតិ និងបានចុះពិនិត្យទីតាំងផលិត និងកែច្នៃស្វាយចន្ទីកំពង់ធំ៕ ដោយ ឡុង សារេត
