ដាកា៖ យោងតាមទិន្នន័យផ្លូវការ បានឱ្យដឹងថា ការនាំចូលអង្កររបស់ប្រទេសបង់ក្លា នៅក្នុងឆ្នាំ២០២៤-២០២៥ បានកើនឡើងដល់កម្រិតខ្ពស់ក្នុងរយៈពេលប្រាំពីរឆ្នាំកន្លងមកនេះ ដោយសារផលិតកម្មស្រូវនៅក្នុងប្រទេសមិនអាចផ្គត់ផ្គង់តាមតម្រូវការបានឡើយ។
យោងតាមទិន្នន័យផ្លូវការដដែលនេះ បានឱ្យដឹងទៀតថា អ្នកនាំចូលអង្កររបស់ភ្នាក់ងាររដ្ឋ និងក្រុមហ៊ុនឯកជន មានបរិមាណចំនួន១,៤លានតោន កាលពីឆ្នាំមុន ដែលជាចំនួនខ្ពស់បំផុតចាប់តាំងពីឆ្នាំ២០១៨ ដែលនៅពេលនោះប្រទេសបង់ក្លាដែស បាននាំចូលអង្ករចំនួន៣,១លានតោន។
ទោះបីជាយ៉ាងណាក៏ដោយ ក្រុមអ្នកជំនាញ បាននិយាយថា ប្រទេសបង់ក្លាដែស មិនគួរនាំចូលអង្ករណាមួយឡើយ ប្រសិនបើទិន្នន័យផលិតផលមានការគ្រប់គ្រងត្រឹមត្រូវ។ ផ្ទុយទៅវិញអាចមានស្រូវសល់លើសពីតម្រូវការថែមទៀតផង។
ចំណែកទីប្រឹក្សាចំណីអាហារវិញ បាននិយាយថា ទឹកជំនន់គំហុកខ្លាំងភ្លាមៗ នៅក្នុងតំបន់ភាគអាគ្នេយ៍ បានធ្វើឱ្យខូចអស់ស្រូវរដូវវស្សាយ៉ាងច្រើន ដូច្នេះហើយទើមត្រូវការនាំចូលអង្ករយ៉ាងច្រើនបែបនេះ។
បើយោងតាមការប៉ាន់ប្រមាណពីមុនរបស់ក្រសួងកសិកម្មប្រទេសបង់ក្លាដែស បានបង្ហាញឱ្យដឹងថា កាលពីក្នុងខែសីហា និងខែកញ្ញា ឆ្នាំ២០២៤កន្លងមក ទឹកជំនន់បានបំផ្លាញស្រូវរដូវវស្សាអស់ទិន្នផលប្រហែលមួយលានតោន។ ចំណែកទិន្នន័យផលិតកម្មស្រូវ នៅក្នុងឆ្នាំ២០២៥ មិនទាន់មាននៅឡើយទេ។
មកទល់ពេលនេះ ការិយាល័យស្ថិតិបង់ក្លាដែស បានចេញផ្សាយការប៉ាន់ប្រមាណនៃទិន្នផលផលិតកម្មស្រូវរដូវវស្សា សម្រាប់ឆ្នាំ២០២៥ ដោយលើកឡើងថា បានធ្លាក់ចុះចំនួន១,៥ភាគរយពីមួយឆ្នាំទៅមួយឆ្នាំ ដោយមកនៅត្រឹម១០,៩៣លានតោន។
ប៉ុន្តែទីភ្នាក់ងារស្ថិតិមិនបានចេញផ្សាយការប៉ាន់ប្រមាណរបស់ខ្លួនលើការផលិតស្រូវប្រាំងឡើយ ដែលមានបរិមាណជិត៥៥ភាគរយនៃផលិតកម្មស្រូវប្រចាំឆ្នាំរបស់ប្រទេសបង់ក្លាដែស។
ទោះបីជាយ៉ាងនេះក្តី ក្រសួងកសិកម្ម បានប៉ាន់ប្រមាណថា កសិករដាំស្រូវប្រាំង ត្រូវប្រមូលផលក្នុងអំឡុងពីខែឧសភា ដល់ខែមិថុនា នៅលើផ្ទៃដីទំហំ០,៥លានហិកតា ដែលតាមផែនការនឹងផ្តល់ទិន្នផលប្រមាណ២០,២៦លានតោន។ ប៉ុន្តែ ក្រសួងកសិកម្មសហរដ្ឋអាមេរិក កាលពីខែមីនាបានព្យាករណ៍ថា ផលិតកម្មស្រូវប្រាំងរបស់ប្រទេសបង់ក្លាដែស នឹងមានបរិមាណចំនួន២០,០៥លានតោន។
ចំណែកបើយោងតាមគណៈកម្មការពាណិជ្ជកម្ម និងពន្ធបង់ក្លាដែស បានឱ្យដឹងថា ប្រសិនបើតួលេខនេះត្រូវបានគេយកមកពិចារណា ផលិតកម្មស្រូវសរុបក្នុងឆ្នាំ២០២៥ នឹងមានបរិមាណចំនួន៣០,៩៨លានតោន គឺខ្ពស់ជាងតម្រូវការអង្ករប្រចាំឆ្នាំ ដែលមានបិរមាណរហូតដល់៣០,៨០លានតោន។
កាលពីឆ្នាំ២០២៤កន្លងទៅ ផលិតកម្មស្រូវបានកើនឡើងខ្ពស់បំផុតរហូតដល់ទៅជាង៤០លានតោន ដែលអាចបន្សល់ទុកនូវទិន្នផលស្រូវលើសតម្រូវការ។
អគ្គនាយកវិទ្យាស្ថានស្រាវជ្រាវដំណាំស្រូវបង់ក្លាដែស បាននិយាយថា ប្រសិនបើគិតលើតួលេខទិន្នផល ឃើញថា សេចក្តីតម្រូវការ និងការប្រើប្រាស់ទាំងអស់គ្នា វាហាក់ដូចជាមិនត្រូវគ្នាដូចក្នុងស្ថិតិសោះ។
លោកបានកត់សម្គាល់ថា បើមិនដូច្នេះទេ ស្ថានភាពនេះមិនគួរកើតឡើងទេ ហើយមិនគួរមានភាពខុសគ្នាខ្លាំងរវាងតួលេខផលិតកម្ម និងតួលេខតម្រូវការជាក់ស្តែង។
ចំណែកសេដ្ឋវិទូផ្នែកកសិកម្ម ជឿជាក់ថា តួលេខរបស់រដ្ឋាភិបាល គឺធំហួសប្រមាណពេក។ ប្រសិនបើការប៉ាន់ប្រមាណផលិតកម្មមានភាពត្រឹមត្រូវ យើងមិនគួរខ្វះអង្ករ ឬអង្ករឡើងថ្លៃនោះទេ។
លោកបានបន្តថា «បើទោះជាទិន្នផលខ្ពស់បានរាយការណ៍កាលពីឆ្នាំមុនក៏ដោយ តម្លៃអង្ករបានកើនឡើងយ៉ាងខ្លាំង ដោយបង្ហាញពីគម្លាតទំនងជារវាងការផ្គត់ផ្គង់ដែលបានរាយការណ៍ និងលទ្ធភាពមានជាក់ស្តែង»។
យោងតាមសាជីវកម្មពាណិជ្ជកម្ម បង់ក្លាដែស បានឱ្យដឹងថា តម្លៃអង្ករល្អលេខ១ បានកើនឡើងជិ១៦ភាគរយក្នុងឆ្នាំ២០២៣-២០២៤ ស្រូវល្អមធ្យមឡើងថ្លៃ១៤ភាគរយ ចំណែកអង្ករសម្រូបឡើងថ្លៃ១២ភាគរយ។
សេដ្ឋវិទូផ្នែកកសិកម្មបានបន្ថែមថា «កត្តាដូចជាការធ្លាក់ចុះគុណភាពដីកសិកម្ម កង្វះការអភិវឌ្ឍ និងការចែកចាយពូជស្រូវមិនផ្តល់ទិន្នផលខ្ពស់ ការឡើងថ្លៃធាតុចូលកសិកម្ម និងអសមត្ថភាពរបស់កសិករក្នុងការរកប្រាក់ចំណូលបានគ្រប់គ្រាន់ គឹកំពុងតែធ្វើោ្យប៉ះពាល់ដល់ផលិតកម្មកសិកម្ម»៕
