រាជធានីភ្នំពេញ៖ ដោយទទួលបានការអនុញ្ញាតពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នៅទីស្នាក់ការកណ្តាលធនាគារ ARDB នាថ្ងៃទី៨ ខែសីហា ឆ្នាំ២០២៥នេះ បានរៀបចំវគ្គបណ្តុះបណ្តាលចំនួន៣ថ្ងៃដល់បុគ្គលិកស្តីពីការទំនាក់ទំនងប្រកបដោយប្រសិទ្ធភាព ការលក់ប្រកបដោយប្រសិទ្ធភាព និងការគ្រប់គ្រងឥណទានមិនដំណើរការ។
វគ្គបណ្តុះបណ្តាលនេះ មានការអញ្ចើញចូលរួមជាកិត្តិយស ដោយឯកឧត្តម ប៉ិច សានី អគ្គនាយករងធនាគារ ARDB, លោក កៅ ភិរុណ ទីប្រឹក្សាបច្ចេកទេស នៃធនាគារ ARDB, លោក គិត ខេមរារិទ្ធ ប្រធាននាយកដ្ឋានផ្នែកលក់និងទីផ្សារនៃធនាគារ ARDB រួមនិងសិក្ខាកាមចូលរួមសិក្សាផ្ទាល់ និងប្រយោលសរុបជាង១០០នាក់។
នៅក្នុងឱកាសនោះដែរ, ឯកឧត្តម ប៉ិច សានី អគ្គនាយករងធនាគារ ARDBបានសម្តែងនៅសេចក្តីសោមនស្សរីករាយជាអនេក ដោយទទួលបានការចាត់តាំងពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារ អភិវឌ្ឍន៍ជនបទ និងកសិកម្ម ក្នុងការចូលរួមបើកវគ្គបណ្តុះបណ្តាលស្តីពីការទំនាក់ ទំនងប្រកបដោយប្រសិទ្ធភាព, ការលក់ប្រកបដោយប្រសិទ្ធភាព និងការគ្រប់គ្រង ឥណទានមិនដំណើរការ។
វត្តមានរបស់បុគ្គលិកមកពីគ្រប់ការិយាល័យចល័ត សាខាខេត្ត និងបុគ្គលិកនៃនាយកដ្ឋានពាក់ព័ន្ធ បានចូលរៀនដោយផ្ទាល់ និងតាមប្រព័ន្ធអនឡាញ នាព្រឹកនេះ ដែលឆ្លុះបញ្ចាំងពីស្មារតីស្ថាបនា និងឆន្ទៈក្នុងការពង្រឹងសមត្ថភាពចំណេះដឹងផ្នែកជំនាញទន់ក្នុងការប្រាស្រ័យទំនាក់ទំនង និងចំណេះជំនាញលើការដោះស្រាយបញ្ហាដែលបានជួបប្រទះ។
ឯកឧត្តម ប៉ិច សានី មានប្រសាសន៍ថា វគ្គបណ្តុះបណ្តាលនេះត្រូវបានរៀបចំឡើងតបតាមការសំនូមពរពីបុគ្គលិកតាមការស្ទង់មតិអំពីតម្រូវការវគ្គបណ្តុះបណ្តាលសម្រាប់ឆ្នាំ២០២៥ ឱ្យបន្តការផ្តល់វគ្គបណ្តុះបណ្តាលបន្ថែមជូនដល់បុគ្គលិកគ្រប់ការិយាល័យចល័ត និងសាខាខេត្ត។ ជាលទ្ធផលបានបង្ហាញថា ៩៧ភាគរយស្នើនឹង ៦៣សំឡេងមានការពេញចិត្តលើការរៀបចំវគ្គបណ្តុះបណ្តាលក្នុងឆ្នាំ២០២៤ និងស្នើសុំឱ្យមានការរៀបចំបន្តក្នុងឆ្នាំ២០២៥។ ហេតុដូច្នេះ នាយកដ្ឋានផ្នែកលក់ និងទីផ្សារ បានសហការជាមួយនាយកដ្ឋានធនធានមនុស្ស និងនាយកដ្ឋានពាក់ព័ន្ធផ្សេងទៀត រៀបចំជាថ្មីនូវវគ្គបណ្តុះបណ្តាលជូនបុគ្គលិកមកពីគ្រប់ការិយាល័យចល័ត សាខាខេត្ត និងបុគ្គលិកនៃនាយកដ្ឋានពាក់ព័ន្ធទាំងអស់នៃធនាគារ ARDB ដែលមានវត្តមាននៅទីនេះផ្ទាល់ និងតាមប្រព័ន្ធអនឡាញ ជាមួយនឹងជំនាញថ្មីៗ ក្នុងការប្រាស្រ័យទំនាក់ទំនងប្រកបដោយប្រសិទ្ធភាពខ្ពស់ ការអភិវឌ្ឍន៍សមត្ថភាពលក់ឱ្យ បានកាន់តែល្អប្រសើរ និងជំនាញថ្មីគឺការគ្រប់គ្រងឥណទានដែលមិនដំណើរការ ដែលមាន រយៈពេលបីថ្ងៃ ចាប់ពីថ្ងៃទី០៨ រហូតដល់ថ្ងៃទី១០ ខែសីហា ឆ្នាំ២០២៥។
ឯកឧត្តម អគ្គនាយករងមានប្រសាសន៍សង្កត់ធ្ងន់ថា “ការចែករំលែកចំណេះដឹង ចំណេះធ្វើ បទពិសោធន៍ និងជំនាញឯកទេសពីវិធីសាស្ត្រអនុវត្តការងារជាក់ស្តែងទាំងនេះ ពិតជាមានសារៈសំខាន់ណាស់សម្រាប់ការកសាងនូវមូលដ្ឋានគ្រឹះ ដើម្បីធានាបាននូវការប្រតិបត្តិការប្រកបដោយប្រសិទ្ធភាពខ្ពស់ដល់ធនាគារ ARDB។ ដូចនេះ, ខ្ញុំសូមលើកទឹកចិត្តដល់បុគ្គលិកមកពីគ្រប់ការិយាល័យចល័ត សាខាខេត្ត និងបុគ្គលិកនៃនាយកដ្ឋានពាក់ព័ន្ធទាំងអស់នៃធនាគារ ARDB ឱ្យបន្តការយកចិត្តទុកដាក់សិក្សារៀនសូត្រទទួលយកចំណេះដឹងថ្មីៗ ចែករំលែកបទពិសោធន៍ និងមានការចូលរួមយ៉ាងសកម្មក្នុងកិច្ចសិក្សា ពិភាក្សា ដោយក្តីរីករាយ”៕ ដោយ៖ឡុង សារ៉េត
