ខេត្តព្រះវិហារ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម និងលោកជំទាវ ព្រមទាំងសហការី តំណាងសប្បុរសជនពីក្រុមហ៊ុន ស៊ីធីរ៉ាយស៍ រោងម៉ាស៊ីនកិនស្រូវ ស៊ីវឡាយ និងជាពិសេសតំណាងសប្បុរសជនមកពីសហគមន៍ខ្មែរនៅទីក្រុងហាមីលតុន អូក្លិន និងក្រុងហកស្បេ ប្រទេសនូវែលហ្សេឡង់ កាលពីព្រឹកថ្ងៃទី៥ ខែសីហា ឆ្នាំ២០២៥នេះ បានបន្តដំណើរចុះសួរសុខទុក្ខដល់វីរកងទ័ពដែលរងរបួសដោយសារសង្គ្រាមឈ្លានពានរំលោភដែនអធិបតេយ្យភាពកម្ពុជាពីសំណាក់ប្រទេសសៀម ដែលកំពុងសម្រាកព្យាបាលនៅមន្ទីពេទ្យ។
ក្នុងនោះ ឯកឧត្តមបណ្ឌិត និងលោកជំទាវ ព្រមទាំងសប្បុរសជន ក៏បាននាំយកនូវថវិកា ផ្លែឈឺ ម្ហូបអាហារ និងសម្ភារប្រើប្រាស់ ជូនដល់បងប្អូនវិរកងទ័ពយើង ដើម្បីសម្តែងនូវការដឹងគុណ សម្រាប់ការលះបង់ដ៏ធំធេងដើម្បីការពារបូរណភាពដែនដីខ្មែរ ពីការឈ្លានពានដោយកងទ័ពសៀម ។
ក្នុងនាមថ្នាក់ដឹកនាំ ព្រមទាំងបុគ្គលិកទាំងអស់នៃធនាគារ ARDB និងសប្បុរសជនក្នុង និងក្រៅប្រទេស បានឃើញហើយគួរឱ្យស្រណោះអាណិតយ៉ាងខ្លោចចិត្តនូវវីរភាពតស៊ូប្ដូរជីវិតដើម្បីការពារបូរណភាពទឹកដី និងប្រជាជនខ្មែរយើង រហូតដល់ពិការ និងរងរបួស។ យើងខ្ញុំសូមប្តេជ្ញាបន្តនូវស្មារតីខ្មែរជួយខ្មែរ ខ្មែរតែមួយ និងដឹងគុណ ចំពោះវីរភាពរបស់កងទ័ព ដែលបានពលីសាច់ស្រស់ឈាមស្រស់ ដើម្បីជាតិមាតុភូមិកម្ពុជាយើង។
បន្ទាប់អញ្ជើញជួបបងប្អូនជាកងទ័ពរួចមកនៅថ្ងៃដដែលនោះ គឺថ្ងៃទី៥ ខែកក្កដា ឆ្នាំ២០២៥ ឯកឧត្តមបណ្ឌិត កៅ ថាច និងលោកជំទាវ ព្រមទាំងសហការី តំណាងសប្បុរសជនពីក្រុមហ៊ុនស៊ីធីរ៉ាយស៍ រ៉ោងម៉ាស៊ីនកិនស្រូវ ស៊ីវឡាយ និងជាពិសេសតំណាងសប្បុរសជនមកពីសហគមន៍ខ្មែរនៅទីក្រុងហាមីលតុន ប្រទេសនូវែលហ្សេឡង់ បានបន្តដំណើរទៅវត្តប្រាសាទគោកបេង ដើម្បីប្រគេនភត្តាហារ ចតុបច្ច័យ និងបង្សុកូលឧទ្ទិសកុសលជូនដល់វិញ្ញាណក្ខន្ធវីរកងទ័ពកម្ពុជា ដែលបានពលីជីវិតក្នុងសមរភូមិ ដើម្បីបុព្វហេតុការពារបូរណភាពទឹកដី។
ជាពិសេស ដោយអំណាចនៃគុណព្រះរតនត្រៃកែវទាំងបីសូមផ្សាយមេត្តាធម៌ដល់ចោរសៀមឱ្យរម្លត់នូវមហិច្ឆតារំលោភឈ្លានពានដែនដីខ្មែរ និងសូមរក្សាឃុំគ្រងកងទ័ពខ្មែរយើងឱ្យទទួលបានជ័យជំនះឈ្នះខ្មាំងសត្រូវឈ្លានពាន និងទទួលបានតែសេចក្តីសុខសុវត្ថិភាពគ្រប់កាលៈទេសៈ។
សូមបញ្ជាក់ថា ដំណើរបេសកកកម្មចាប់ផ្តើមពីថ្ងៃទី៣ ខែសីហា ឆ្នាំ២០២៥ ដោយឡែកនៅព្រឹកថ្ងៃទី៤ ខែសីហា ឆ្នាំ២០២៥នេះ ឯកឧត្តមបណ្ឌិត កៅ ថាច និងលោកជំទាវ បានរៀបចំនូវសម្ភារប្រើប្រាស់ចាំបាច់មួយចំនួន និងស្បៀងអាហារផ្ញើជូនវីរកងទ័ពនៅជួរមុខ ដោយការដឹងគុណចំពោះវីរភាព និងការលះបង់យ៉ាងធំធេងមិនអាចកាត់ថ្លៃបានដើម្បីជាតិមាតុភូមិ។
ក្នុងស្មារតីសាមគ្គីជាតិខ្មែរ ខ្មែរជួយខ្មែរ និងការចូលរួមចំណែកជាមួយរាជរដ្ឋាភិបាលកម្ពុជា, ឯកឧត្តមបណ្ឌិត កៅ ថាច និងលោកជំទាវព្រមទាំងសហការី សប្បុរសជនក្នុង និងក្រៅប្រទេស បាននាំយកស្បៀងអាហារនិងសម្ភារៈ ជូនដល់ប្រជាជនភៀសសឹកចំនួន២ ៦៥០គ្រួសារ, ឧបត្ថមជូនក្រុមគ្រូទេព្យស្ម័គ្រចិត្តប្រចាំមណ្ឌលសុវត្ថិភាព និងបានយកសម្ភារសំខាន់ៗមួយចំនួន ទៅចែកជូនដល់វីរកងទ័ពកម្ពុជាជួរមុខ គិតជាទឹកប្រាក់សរុបរួមចំនួន៧៣ ៥០៨,២៩ដុល្លារអាមេរិក ដោយក្នុងនោះថវិកាទទួលបានការចូលរួមពី៖
ទី១ -ឯកឧត្តមបណ្ឌិត កៅ ថាច និងលោកជំទាវ ព្រមទាំងថ្នាក់ដឹកនាំ និងបុគ្គលិក ធនាគារ ARDB ថវិកាចំនួន៣៩ ៩០១,២៩ដុល្លារ។ ទី២ -ក្រុមហ៊ុន ស៊ីធី រ៉ាយស៍ ថវិកាចំនួន៨ ៣០០ដុល្លារ។ ទី៣ -ក្រុមហ៊ុន ហង្សហាវេស ថវិកាចំនួន២ ៩០០ដុល្លារ និងទី៤ -សហគមន៍ខ្មែរនៅទីក្រុងហាមីលតុន អូក្លិន និងក្រុង ហកស្បេ ប្រទេសនូវែលហ្សេឡង់ ថវិកាចំនួន២២ ៤០៧ដុល្លារ។
ក្នុងគោលដៅចូលរួមចំណែកជាមួយរាជរដ្ឋាភិបាល និងដើម្បីជួយសម្រាលបន្ទុកដល់ជនភៀសសឹក ក៏ដូចជាវីរកងព័ទ បងប្អូនពីសហគមន៍ខ្មែរនៅទីក្រុង ហាមីលតុន អូក្លិន និងទីក្រុងហកស្បេ ប្រទេសនូវែលហ្សេឡង់ បានរួមចំណែកជាថវិកា និងបានចូលរួមក្នុងកម្មវិធីចែកជំនួយឧបត្ថម្ភនេះដោយផ្ទាល់ផងដែរ។
សូមបញ្ជាក់ថា ថវិកាបានមកពីបងប្អូនក្នុងសហគមន៍ខ្មែរនេះ សរុបរួមចំនួន២២ ៣៦៩,៣៥ដុល្លារ គឺថវិកាចំនយន២ ១២៩ដុល្លារ បានពីមូលនិធិដក់សល់ ក្នុងឱកាសខួបអនុស្សាវរីយ៍លើកទី៧៥ នៃការបង្កើតគណបក្សប្រជាជនកម្ពុជា ថ្ងៃទី២៨ ខែមិថុនា ២០២៥ និងថវិកាចំនួន២០ ២៧៨ដុល្លារ បានពីការចូលរួមបន្ថែមក្នុងខែកក្កដា ឆ្នាំ២០២៥នេះ។
ក្នុងនាមថ្នាក់ដឹកនាំ ព្រមទាំងបុគ្គលិកទាំងអស់នៃធនាគារ ARDB និងសប្បុរសជន សូមចូលរួមចំណែកដោយដួងចិត្តស្មោះស្ម័គ្រ និងសូមបង្ហាញពីការប្តេជ្ញាចិត្តខ្ពស់ចំពោះការទទួលខុសត្រូវសង្គម និងសាមគ្គីភាព និងស្មារតីខ្មែរតែមួយ គ្រប់កាលៈទេសៈ។
ថ្នាក់ដឹកនាំ គណៈគ្រប់គ្រង សហការី និងក្រុមការងារ គ្រប់ជាន់ថ្នាក់ទាំងអស់ នៃធនាគារ ARDB បានសហការគ្នាយ៉ាងស្វាហាប់ ដ៏មុតមាំ ដោយក្តីមោទនភាព ចំពោះគុណវីរភាពកងទ័ពកម្ពុជាចំពោះការលះបង់យ៉ាងធំធេងមិនអាចកាត់ថ្លៃបានដើម្បីជាតិមាតុភូមិ៕
