រាជធានីភ្នំពេញ៖ ប្រធានកម្មវិធីខ្សែច្រវាក់តម្លៃកសិកម្ម និងប្រព័ន្ធស្បៀងនៃសហភាពអឺរ៉ុប(EU)ប្រចាំនៅកម្ពុជាថ្មីៗនេះបានបង្ហាញពីការយកចិត្តទុកដាក់ជាខ្លាំងរបស់ខ្លួនទៅលើដំណាំម្រេច និងដំណាំស្វាយចន្ទី ដើម្បីជំរុញការកែច្នៃ ការផលិតកម្ពុជាសម្រាប់ធ្វើការនាំចេញទៅទីផ្សារអឺរ៉ុប ក៏ដូចជាទីផ្សារប្រទេសផ្សេងទៀតនៅលើពិភពលោក។
នៅក្នុងកម្មវិធី យុវកសិករ និងកសិ-ឡាពិកកម្ពុជាលើកទី១ដែលរៀបចំនៅវិទ្យាស្ថានជាតិកសិកម្ម ព្រែកលៀបកន្លងទៅថ្មីៗនេះ , អ្នកស្រី ប៊ី សុគន្ធា ប្រធានកម្មវិធី ខ្សែច្រវាក់តម្លៃកសិកម្មនិងប្រព័ន្ធស្បៀងនៃសហភាពអឺរ៉ុបប្រចាំកម្ពុជា(EU)បានលើកឡើងថានៅក្នុងតំបន់យើងបាននិយាយកន្លងមកស្រូវជាដំណាំសំខាន់ទីមួយរបស់កសិករកម្ពុជា ។ ប៉ុន្តែស្ថិតក្នុងដំណាក់ការសេដ្ឋកិច្ចកម្ពុជាមានការអភិវឌ្ឍ យើងមិនគួរផ្តោតតែទៅលើដំណាំតែមួយមុខនោះទេ។ យើងគួរតែធ្វើការដាំដុះចម្រុះ។ យើងឃើញមានដំណាំពីរប្រភេទសំខាន់ៗដែលជួយដល់សេដ្ឋកិច្ចជាតិ ក៏ដូចជាជួយដល់សេដ្ឋកិច្ចររបស់ប្រជាកសិករនៅក្នុងប្រទេសកម្ពុជា មានដំណាំម្រេចនិងស្វាយចន្ទី ទោះបីមិនត្រូវការហូបចុកជាប្រចាំ ប៉ុន្តែវាជួយដល់សេដ្ឋកិច្ចកសិកនៅក្នុងប្រទេសកម្ពុជា។
អ្នកស្រី ប៊ី សុគន្ធា បានគូសបញ្ជាក់ថា “សម្រាប់ដំណាំទាំងពីរប្រភេទនេះ ខាងសហភាពអឺរ៉ុបបានផ្តោតការយកចិត្តទុកដាក់ និងជួយជំរុញក្នុងការផលិតនិងការកែច្នៃដើម្បីធ្វើការនាំចេញទៅទីផ្សារអឺរ៉ុបនិងទីផ្សារសកលលោក”។
បើតាមអ្នកស្រី ប៊ី សុគន្ធា ការលើកឡើងអំពីដំណាំម្រេច និងស្វាយចន្ទី គឺចង់បង្ហាញទៅដល់យុវកសិករជំនាន់ក្រោយបានដឹងអំពីសក្តានុពលនៃដំណាំកសិកម្មនៅក្នុងប្រទេសកម្ពុជា ។ តួយ៉ាងម្រេចជាដំណាំមួយដែលតំណាងឱ្យផលិតផលដែលល្បីត្រូវបានគេទទួលស្គាល់នៅទូទាំងពិភពលោក រួមទាំងទីផ្សារនៅអឺរ៉ុប។ ស្វាយចន្ទីជាដំណាំសេដ្ឋកិច្ចដែលផ្តល់ចំណូលដល់កម្ពុជារហូតដល់១ពាន់លានដុល្លារ ហើយគេរំពឹងទុកថា កម្ពុជាអាចរកប្រាក់ចំណូលកើនឡើងដល់២ពាន់លានដុល្លារនៅឆ្នាំ២០៣៥។
អ្នកស្រីបន្តថា សហភាពអឺរ៉ុបនៅក្នុងរយៈពេល២០ឆ្នាំកន្លងមកនេះ បានធ្វើការយ៉ាងជិតស្និទ្ធជាមួយនិងក្រសួងកសិកម្ម រុក្ខាប្រមាញ់និងនេសាទ ក្រសួងពាណិជ្ជកម្ម ក្រសួងអភិវឌ្ឍន៍ជនបទ និងក្រសួងឧស្សាហកម្ម បច្ចេកវិទ្យា វិទ្យាសាស្ត្រនិងនវានុវតន៍ មើលទៅលើលក្ខណៈគោលនយោបាយ ទាក់ទងនិងការផលិត អ្វីខ្លះដែលសមស្របទៅនិងទីផ្សារដែលមានគុណភាព ហើយរាល់ការវិនិយោគទាំងអស់គឺធ្វើការជាក្រុមអឺរ៉ុប។
បើតាមប្រធានកម្មវិធី ខ្សែច្រវាក់តម្លៃកសិកម្មនិងប្រព័ន្ធស្បៀងនៃសហភាពអឺរ៉ុបប្រចាំកម្ពុជា ដំណាំស្វាយចន្ទីបានចូលរួមចំណែក ប្រមាណ៣,៨ភាគរយនៃផលិតផលក្នុងស្រុកសរុប បើប្រៀបធៀបទៅនិងដំណាំស្រូវ និងស្វាយចន្ទី គឺមានការប្រកួតប្រជែងយ៉ាងខ្លាំងក្នុងការរកប្រាក់ចំណូលសម្រាប់ប្រទេសកម្ពុជា។
យោងតាមរបាយការណ៍របស់អគ្គនាយកដ្ឋានកសិកម្ម បានបង្ហាញថានៅក្នុងរយៈពេល៥ខែឆ្នាំ២០២៥កន្លងទៅនេះ កម្ពុជានាំចេញម្រេចបានប្រមាណ ៧ ៨៩៦ តោន ថយចុះជាង១១ភាគរយ បើប្រៀបធៀបនិងរយៈពេលដូចគ្នាឆ្នាំ២០២៤មានប្រមាណ៨ ៩០៤តោន , គ្រាប់ស្វាយចន្ទីឆៅ កម្ពុជាបាននាំចេញបានជាង៥៧ម៉ឺនតោន កើនឡើងជាង៥ភាគរយ, គ្រាប់ស្វាយចន្ទីកែច្នៃបានជាង១០តោន ថយចុះជាង៧០ភាគរយ បើប្រៀបធៀបនិងរយៈពេលដូចគ្នាឆ្នាំ២០២៤មានចំនួន៥០តោន៕
