ភ្នំពេញ៖ រាជរដ្ឋាភិបាលកម្ពុជានៅថ្ងៃទី២៦ ខែមិថុនា ឆ្នាំ២០២៥ បានរៀបចំទិវាជាតិសហគ្រាសធុនមីក្រូ តូច និងមធ្យម លើកទី២ ផ្តោតលើការត្រៀមលក្ខណៈរបស់សហគ្រាសធុនមីក្រូ តូច និងមធ្យម សម្រាប់ការចាកចេញពីប្រទេសដែលមានការអភិវឌ្ឍតិចតួច «សំដៅលើកកម្ពស់ស្តង់ដា អនុលោមភាព នវានុវត្តន៍ និងផលិតភាព ជាមូលដ្ឋានសម្រាប់ភាពជោគជ័យរបស់សហគ្រាសធុនមីក្រូ តូច និងមធ្យមកម្ពុជា»។
ពិធីនេះធ្វើឡើងក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម ហែម វណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមានការអញ្ចើញចូលរួមជាកិត្តិយសពីតំណាងស្ថាប័នពាក់ព័ន្ធជាច្រើនផ្សេងទៀតផងដែរ។
ក្នុងឱកាសនេះដែរ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអានសារលិខិតរបស់មហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសប្រារព្ធទិវាជាតិ សហគ្រាសធុនមីក្រូ តូច និងមធ្យម។
សារលិខិតបានរំលេចពីការវិវត្តរបស់សហគ្រាសធុនមីក្រូ តូច និងមធ្យមថា បានធ្វើសមាហរណកម្មចូលក្នុងប្រព័ន្ធហិរញ្ញវត្ថុផ្លូវការកាន់តែច្រើន ដោយក្នុងនោះមានបុគ្គលស្វ័យនិយោជន៍ជាង ១,៥លាននាក់ បានបើកគណនីប្រើប្រាស់ QR និងម្ចាស់សហគ្រាសធុនមីក្រូ តូច និងមធ្យមជាង៨២០.០០០នាក់បានទទួលសេវាឥណទាន ស្មើនឹងជាងមួយភាគបីនៃប្រាក់កម្ចីសរុបក្នុងប្រព័ន្ធធនាគារ។ កម្ពុជាបន្តទទួលកំណើនវិនិយោគពីបរទេសខ្ពស់ ហើយវិស័យឧស្សាហកម្មត្រូវបានព្យាករណ៍ថា នឹងមានកំណើនខ្ពស់ជាងគេ ក្នុងអត្រា៧,៨ភាគរយ នៅឆ្នាំ២០២៥។ និន្នាការនេះបានផ្តល់នូវកាលានុវត្តភាពថ្មីៗ សម្រាប់សហគ្រាសធុនមីក្រូ តូច និងមធ្យម ក្នុងការចូលរួមពង្រីកពិពិធកម្មសេដ្ឋកិច្ច និងផ្សារភ្ជាប់ខ្លួនទៅនឹងខ្សែច្រវាក់ផ្គត់ផ្គង់ ដែលកំពុងត្រូវការធាតុចូលពីក្នុងស្រុកកាន់តែច្រើន និងការបង្កើនតម្លៃបន្ថែម ដែលកាន់តែមានសក្តានុពល។
យោងតាមជំរឿនឆ្នាំ២០២២ របស់វិទ្យាស្ថានជាតិស្ថិតិនៃក្រសួងផែនការ កម្ពុជា បានឱ្យដឹងថា ប្រទេសកម្ពុជាមានសហគ្រាសធុនមីក្រូ តូច និងមធ្យមចំនួន៧៥៣,៦៧០មូលដ្ឋាន មានកម្លាំងពលកម្មសរុបជិតបីលាននាក់ ក្នុងនោះមានស្រ្តី៦០ភាគរយ។ វិស័យនេះរួមចំណែក៦៣ភាគរយនៃផលិតផលក្នុងស្រុកសរុប និងនៅតែជាវិស័យស្នូលសម្រាប់មហិច្ឆតារបស់កម្ពុជា ក្នុងការកសាងសេដ្ឋកិច្ច ដែលកាន់តែមានពិពិធកម្មខ្ពស់ និងផ្អែកលើនវានុវត្តន៍។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ស្របពេលពិភពលោកទាំងមូល រួមទាំងកម្ពុជាត្រូវបានបន្តហ៊ុមព័ទ្ធដោយបញ្ហាប្រឈមកាន់តែស្មុគស្មាញ និងភាពមិនប្រាកដប្រជាកាន់តែខ្ពស់ ការជំរុញការអភិវឌ្ឍសហគ្រាសធុនមីក្រូ តូច និងមធ្យម ចាំបាច់ត្រូវមានការគិតគូរបន្ថែមសំដៅដោះស្រាយបញ្ហាប្រឈមជារចនាសម្ព័ន្ធ ដើម្បីបង្កើតកាលានុវត្តភាពបន្ថែមសម្រាប់សហគ្រាសធុនមីក្រូ តូច និងមធ្យម របស់កម្ពុជាសំដៅជំរុញសន្ទុះកំណើនសេដ្ឋកិច្ចជាតិឱ្យកាន់តែប្រសើរឡើង។
ឯកឧត្តមឧបនាយករដ្ឋមន្ត្រីបានផ្តល់នូវអនុសាសន៍មួយចំនួនដល់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក៏ដូចជាក្រសួង-ស្ថាប័នពាក់ព័ន្ធ ដើម្បីរួមគ្នាបន្តកសាងប្រព័ន្ធអេកូឡូស៊ីសហគ្រាសធុនមីក្រូ តូច និង មធ្យមឱ្យកាន់តែរស់រវើក និងគ្រប់ជ្រុងជ្រោយ ដែលមានចំណុចសំខាន់ៗដូចខាងក្រោម៖
ទី១)- ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ដោយមានកិច្ចសហការស្អិតល្មួតពីក្រសួង-ស្ថាប័នពាក់ព័ន្ធ ត្រូវបន្តជំរុញការអនុវត្តយុទ្ធ សាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ ដើម្បីចូលរួមអភិវឌ្ឍសេដ្ឋកិច្ចក្រៅប្រព័ន្ធឱ្យកាន់តែរីកធំធាត់រហ័ស និងអាចចូលរួមពេញលេញក្នុងដំណើរការនៃការអភិវឌ្ឍសេដ្ឋកិច្ចកម្ពុជា ប្រកបដោយចីរភាព បរិយាបន្ន និងភាពធន់។
ទី២)- ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយមាន កិច្ចសហការជិតស្និទ្ធពីក្រសួង-ស្ថាប័នពាក់ព័ន្ធ ត្រូវបន្តជំរុញការរៀបចំ និងបញ្ចប់យុទ្ធសាស្ត្រអភិវឌ្ឍន៍សហគ្រាសធុនតូច និងមធ្យម សំដៅកំណត់ឱ្យបានច្បាស់លាស់នូវទិសដៅក្នុងការអភិវឌ្ឍសហគ្រាសធុនមីក្រូ តូច និងមធ្យម ដោយគិតគូរឲ្យបានគ្រប់ជ្រុងជ្រោយនូវស្ថានភាពបច្ចុប្បន្ន កាលានុវត្តភាពកត្តាភូមិសាស្ត្រនយោបាយ ក៏ដូចជានិន្នាការរយៈពេលវែង។
ទី៣)- គ្រប់ក្រសួង-ស្ថាប័នពាក់ព័ន្ធ ត្រូវបន្តជំរុញការធ្វើឌីជីថលូបនីយកម្ម តាមរយៈថ្នាល CamDX ដើម្បីលើកកម្ពស់គុណភាព និងតម្លាភាពនៃសេវាសាធារណៈព្រមទាំងកាត់បន្ថយបន្ទុកចំណាយ និងផ្តល់ភាពងាយស្រួលឱ្យបានជាអតិបរមាដល់ការបង្កើត និងការធ្វើប្រតិបត្តិការអាជីវកម្មនៅកម្ពុជា
ទី៤)- គ្រប់ក្រសួង-ស្ថាប័នពាក់ព័ន្ធ ត្រូវបន្តយកចិត្តទុកដាក់លើការលើកកម្ពស់សហគ្រិនភាព ជាពិសេសសម្រាប់សហគ្រិនជាស្ត្រី ការលើកកម្ពស់ធុរកិច្ចថ្មី ព្រមទាំងការជំរុញការចាប់យកបច្ចេកវិទ្យាឌីជីថល ដើម្បីពង្រឹងសមត្ថភាពគ្រប់គ្រងអាជីវកម្ម និងបង្កើនផលិតភាព និងភាពប្រកួតប្រជែង
ទី៥)-អគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករកម្ពុជា នៃ ក្រសួងសេដ្ឋកិច្ច និងហិរញ្ញវត្ថុ ត្រូវបន្តជំរុញការផ្សព្វផ្សាយ និងការអនុវត្តការលើកទឹកចិត្តផ្នែកពន្ធដារ និងផ្នែកគយ ចំពោះសហគ្រាសធុនតូច និងមធ្យម ក្នុងវិស័យអាទិភាព ក៏ដូចជាការលើកទឹកចិត្តផ្នែកពន្ធដារ ចំពោះសហគ្រាសធុនមីក្រូ តូច និងមធ្យម សម្រាប់ការអភិវឌ្ឍសេដ្ឋកិច្ចក្រៅប្រព័ន្ធ ស្របតាមបទប្បញ្ញត្តិជាធរមាន។
ទី៦)-ម្ចាស់សហគ្រាសធុនមីក្រូ តូច និងមធ្យមទាំងអស់ ទាញយកអត្ថប្រយោជន៍ឱ្យបានជាអតិបរមាពីការគាំទ្រទាំងឡាយរបស់រាជរដ្ឋាភិបាល ដូចខ្ញុំបានគូសបញ្ជាក់ខាងលើ ដើម្បីបន្តអភិវឌ្ឍខ្លួន បង្កើនសមត្ថភាព និងផលិតភាព ជាពិសេស តាមរយៈការចាប់យកបច្ចេកវិទ្យាឌីជីថល ការបង្កើនភាពធន់ សំដៅឆ្លើយតបទៅនឹងការវិវត្តយ៉ាងរហ័ស នៃនិន្នាការតំបន់ និងសកល ព្រមទាំងការចូលរួមជាមួយរាជរដ្ឋាភិបាលឱ្យបានពេញលេញក្នុងកិច្ចដំណើរការនៃការអភិវឌ្ឍសង្គមសេដ្ឋកិច្ចជាតិ។
ឯកឧត្តមឧបនាយករដ្ឋមន្ត្រី បានណែនាំឱ្យម្ចាស់សហគ្រាសធុនមីក្រូ តូច និង មធ្យមទាំងអស់ ចូលរួមជាមួយរាជរដ្ឋាភិបាល តាមរយៈការកសាងសមត្ថភាពផ្ទៃក្នុងរបស់ខ្លួនក្នុងការពង្រឹងអនុលោមភាព ការកែលម្អអភិបាលកិច្ចធុរកិច្ច ការវិនិយោគលើស្តង់ដា គុណភាព សុវត្ថិភាព អនាម័យ និងការទទួលខុសត្រូវចំពោះបរិស្ថាន។ល។ ចំណុចទាំងនេះ មិនមែនត្រឹមតែជាការតម្រូវរបស់រាជរដ្ឋាភិបាលប៉ុណ្ណោះទេ ប៉ុន្តែថែមទាំងជាការចង់បាន និងការរំពឹងទុករបស់អតិថិជន វិនិយោគិន និងទីផ្សារផងដែរ។ ការណ៍នេះតម្រូវឲ្យមានការផ្លាស់ប្តូរផ្នត់គំនិតពីការយល់ឃើញថា អនុលោមភាព គឺជាបន្ទុកមកជាការទទួលស្គាល់ថា អនុលោមភាព គឺជាការវិនិយោគជាយុទ្ធសាស្ត្រ។
ឯកឧត្តមអគ្គបណ្ឌិតសភាចារ្យមានប្រសាសន៍សង្កត់ធ្ងន់ថា «ការប្រារព្ធទិវាជាតិសហគ្រាសធុនមីក្រូ តូច និងមធ្យម លើកទី២ នាថ្ងៃនេះសបញ្ជាក់ឱ្យឃើញច្បាស់អំពីការយកចិត្តទុកដាក់របស់រាជរដ្ឋាភិបាលលើសហគ្រាស ធុនមីក្រូ តូច និងមធ្យម ដែលជាកម្លាំងចលករជាក្បាលម៉ាស៊ីន និងជាឆ្អឹងខ្នងនៃកំណើន និងការអភិវឌ្ឍសង្គមសេដ្ឋកិច្ចជាតិ។ ក្នុងន័យនេះ ខ្ញុំសូមលើកទឹកចិត្តឱ្យមានការរៀបចំទិវាជាតិនេះជាទៀងទាត់រៀងរាល់ឆ្នាំ និងសូមលើកទឹកចិត្តឲ្យមានការចូលរួមពីគ្រប់តួអង្គពាក់ព័ន្ធទាំងអស់»។
គួរជម្រាបជូនថា ដោយយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB)ឯកឧត្តម ចាន់ សីហា អគ្គនាយករងធនាគារ ARDBបានអញ្ចើញចូលរួមនៅក្នុងកម្មវិធីបើកទិវាជាតិសហគ្រាសធុនមីក្រូ តូច និងមធ្យមលើក២ ឆ្នាំ២០២៥ ក្រោមប្រធានបទ ការត្រៀមលក្ខណៈរបស់សហគ្រាសធុនមីក្រូ តូច និងមធ្យមសម្រាប់ការចាកចេញពីប្រទេស ដែលមានការអភិវឌ្ឍតិចតួចផងដែរ៕
