ភ្នំពេញ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម ព្រមទាំងសហការី ចាប់ផ្តើមពីថ្ងៃទី១៤ ដល់ថ្ងៃទី១៥ ខែមិថុនា ឆ្នាំ២០២៥នេះ បានអញ្ជើញចុះពិនិត្យមើលខ្សែសង្វាក់ផលិតកម្ម និងសកម្មភាពនានារបស់ក្រុមហ៊ុនកែច្នៃក្នុងស្រុក នៅខេត្តចំនួនប្រាំជាប់បឹងទន្លេសាប។
ការអញ្ជើញចុះសួរសុខទុក្ ខនិងពិនិត្យមើលខ្សែសង្វាក់ផលិតកម្មរបស់ ឯកឧត្តមបណ្ឌិត កៅ ថាច គឺថ្ងៃទី១ ចាប់ផ្តើមនៅរោងម៉ាស៊ីនកិនស្រូវ ចំនួនពីរទីតាំងក្នុងខេត្តកំពង់ចាម រួមមានរោងម៉ាស៊ីនកិនស្រូវ យូឃីម ស្ថិតនៅក្នុងស្រុកបាធាយ និងរោងម៉ាស៊ីនកិនស្រូវ សេកមាស ស្ថិតក្នុងស្រុកជើងព្រៃ។
ជាមួយគ្នានេះដែរ ឯកឧត្តមបណ្ឌិតប្រតិភូ ក៏បានចុះពិនិត្យកសិដ្ឋានដាំបន្លែជាលក្ខណៈគ្រួសារពីរកន្លែងទៀត ដែលស្ថិតនៅក្រោមគម្រោងកម្ចីឥណទានខ្នាតតូចរបស់ធនាគារ ARDB ដែលស្ថិតនៅឃ៉ុំត្រពាំងឫស្សី ខេត្តកំពង់ធំ។ ចំណែកបន្ទាប់មកទៀត នារសៀលថ្ងៃដដែល ឯកឧត្តមបណ្ឌិត កៅ ថាច ព្រមទាំងសហការី បានអញ្ជើញចុះពិនិត្យទីតាំងផលិតជីកសិកម្មរបស់ក្រុមហ៊ុន Husk Ventured ដែលមានទីតាំងស្ថិតនៅភូមិបុស្សវែង ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។
ក្នុងឱកាសនេះ ឯកឧត្ដមបណ្ឌិតប្រតិភូ ក៏បានលើកទឹកចិត្តឱ្យក្រុមហ៊ុនខិតខំពង្រីកខ្សែចង្វាក់ផលិតកម្មរបស់ខ្លួន ដើម្បីផ្គត់ផ្គង់ជីតាមទីផ្សារក្នុងស្រុកបន្ថែមទៀត។ ព្រមជាមួយគ្នានេះដែរ ឯកឧត្តមបណ្ឌិត កៅ ថាច ក៏បានឆ្លៀតឱកាសចុះពិនិត្យមើលសកម្មភាពប្រមូលទិញ និងស្តុកពោត និងដំឡូងមី នៅតាមទីលានប្រមូលទិញ ឃ្លាំងស្កុក និងឡសម្ងួតពោត និងដំឡូងមីមួយចំនួន នៅក្នុងខេត្តឧត្តរមានជ័យ បន្ទាយមានជ័យ បាត់ដំបង និងខេត្តប៉ៃលិនផងដែរ។
ធនាគារ ARDB ក្នុងនាមជាធនាគារបម្រើគោលនយោបាយរបស់រាជរដ្ឋាភិបាលបាននិងកំពុងបំពេញបេសកកម្ម ក្នុងការផ្តល់ជូនហិរញ្ញប្បទានដល់គ្រប់តួអង្គ ក្នុងខ្សែច្រវ៉ាក់តម្លៃកសិកម្ម គាំទ្រការអភិវឌ្ឍសេដ្ឋកិច្ចជនបទ នឹងកំពុងឆ្ពោះទៅរកទស្សនវិស័យប្រែក្លាយជាធនាគារមានចីរភាព (Sustainable Bank) ដូចមានចែងក្នុងផែនទីចង្អុលផ្លូវ១០ឆ្នាំរបស់ធនាគារ។
ជាក់ស្តែងនៅក្នុងនីតិកាលទី៧នៃរដ្ឋសភា រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យវែងឆ្លាយ ថាមពល និងប្រាកដនិយមរបស់សម្តេចមហាបវរធីបតី ហ៊ុន ម៉ាណែត នាយករដ្ឋមន្រ្តី បន្តរក្សាការប្តេជ្ញាចិត្តខ្ពស់ ចំពោះការប្រយុទ្ធប្រឆាំងនិងការប្រែប្រួលអាកាសធាតុ ដោយកំណត់ការធានាចីរភាពបរិស្ថាន ការរៀបចំឆ្លើយតបការប្រែប្រួលអាកាសធាតុ និងការលើកកម្ពស់សេដ្ឋកិច្ចបៃតងជាអទិភាពគន្លឹះ ក្នុងមុំទី៥នៃយុទ្ធសាស្រ្តបញ្ចកោណដំណាក់កាលទី១ផងដែរ៕
