រាជធានីភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាកច្រកម្ពុជាមានប្រសាសន៍ថា វិស័យកសិកម្មនៅតែបន្តរួមចំណែកប្រមាណ១៦%នៃផលិតផលសរុបក្នុងស្រុក (ផ.ស.ស), តម្លៃបន្ថែមសរុបរបស់វិស័យកសិកម្មបន្តកើនឡើងពីប្រមាណជិត២០ប៊ីលានរៀលនៅឆ្នាំ២០១៥ដល់ជាង៣១ប៊ីលានរៀល ហើយវិស័យមួយនេះនៅតែបន្តមានកំណើនជាវិជ្ជមានជាមធ្យមក្នុងរង្វង់០,៧%នៅចន្លោះឆ្នាំ២០២០-២០២៤។
ថ្លែនៅក្នុងសមាជរដ្ឋសភា និងព្រឹទ្ធសភាលើកទី១ កាលថ្ងៃទី៣ខែមិថុនាឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍ ជារួមថា កត្តាដែលនាំឱ្យមានកំណើននៅក្នុងវិស័យកសិកម្មអាស្រ័យលើ ៖ (ទី១)-ការកើនឡើងនៃផ្ទៃដីដាំដុះ។ដំាំស្រូវកើនឡើងពី៣,៣៣លានហិកតានៅឆ្នាំ២០១៩ ដល់១៣,៥៥លានហិកតានៅឆ្នាំ២០២៣។ ដំណាំសាកវប្បកម្មកើនពី២៣ម៉ឺន៧ពាន់ហិកតានៅឆ្នាំ២០១៩ដល់៣១ម៉ឺន៩ពាន់ហិកតានៅឆ្នាំ២០២៣។ ដំណាំឧស្សាហកម្មកើនពី១លាន ២សែន៨ម៉ឺនហិកតានៅឆ្នាំ២០១៩រហូតដល់១លាន៦សែន៣ម៉ឺនហិកតានៅឆ្នាំ២០២៣។ (ទី២)-ការកើនឡើងនៃទិន្នផលដោយអាស្រ័យដោយភាពប្រសើរឡើងនៃការប្រើប្រាស់បច្ចេកទេសនិងគ្រាប់ពូជ និង(ទី៣)-ការផ្លាស់ប្តូររូបភាពនៃការធ្វើកសិកម្មបែបបុរាបទៅជាកសិកម្មទំនើបបែបសហគមន៍។
សម្តេចធិបតីនាយករដ្ឋមន្ត្រីលើកឡើងថា ដោយមើលឃើញពីសារៈសំខាន់ខាងលើនេះ ស្ថិតក្នុងបរិការណ៍នៃការប្រែប្រួលសកលលោកដែលកំពុងតែប្រែប្រួលលឿន និងមានភាពមិនពិតប្រាកដខ្ពស់។ ជាមួយនិងវិបត្តិនិងវិញ្ញាសារថ្មីៗដែលកើតឡើងគ្រប់ពេល នឹងអាចបន្ទុចបង្អាក់កំណើននិងដំណើរការសេដ្ឋកិច្ចកម្ពុជា រាជរដ្ឋាភិបាលយល់ច្បាស់អំពីភាពចាំបាច់ត្រូវការបង្កើនល្បឿននៃការពង្រឹងសមត្ថភាពស្ថាប័ន ជំរុញការលើកកម្ពស់អភិបាលកិច្ច និងជំរុញគ្រប់ការដ្ឋានកែទម្រង់រួម រួមទាំងការកែទម្រង់ជារចនាសម្ព័ន្ធ ដើម្បីរក្សាកំណើននិងសន្ទុះសេដ្ឋកិច្ច។
ដើម្បីធានាសាកសិទ្ធភាព ប្រសិទ្ធភាពនិងសមិទ្ធកម្មនៅក្នុងការអនុវត្តន៍គោលនយោបាយរាជរដ្ឋាភិបាលបាននិងកំពុងពង្រឹងយន្តការតាមដានត្រួតពិនិត្យនិងវាយតម្លៃ ទាំងកម្រិតគោលនយោបាយថ្នាក់ជាតិ ដូចជាយុទ្ធសាស្ត្របញ្ចកោណដំណាក់កាលទី១, គោលនយោបាយតាមវិស័យ និងគោលនយោបាយតាមក្រសួងស្ថាប័នរបស់រដ្ឋបាលថ្នាក់ក្រោមជាតិ។
ចំពោះគោលនយោបាយអាទិភាពទាំង៦, រាជរដ្ឋាភិបាលបានប្រគល់ភារកិច្ចជូនគណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុក្នុងការដឹកនាំ សម្របសម្រួលតាមដាន ត្រួតពិនិត្យ និងវាយតម្លៃ។ ដោយឡែកសម្រាប់គោលនយោបាយអាទិភាព២នៅក្នុងវិស័យកសិកម្មដែលដឹកនាំនិងអនុវត្តផ្ទាល់ដោយក្រសួងកសិកម្ម រុក្ខាប្រមាញ់និងនេសាទក្នុងការសម្របសម្រួលខ្សែច្រវ៉ាក់ផលិតកម្ម ផលិតផលកសិកម្ម ដែលមានភារកិច្ច៖ (ទី១)-តាមដានការវិវត្តន៍ថ្លៃកសិកម្ម កសិផល, (ទី២)-វិភាគផលវិបាកការប្រែប្រួលថ្លៃ, (ទី៣)-កំណត់ថាផលិតផលកសិកម្មណាមួយដែលអាចជួបវិបត្តិនិងត្រូវការអន្តរាគមន៍, (ទី៤)-អនុវត្តវិធានការអន្តារាគមន៍ឬ គោលការណ៍សម្រេចពី (គ.ស.ហ) និង (ទី៥)-រាយការណ៍ពីវឌ្ឍនៈភាពនិងលទ្ធផលពីកិច្ចអន្តរាគមន៍។
យោតាមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា, បច្ចុប្បន្នកម្ពុជាមានផ្ទៃដីកសិកម្មចំនួន១៧លានហិកតា ដោយបានបែងចែកផ្ទៃដីដាំដុះដំណាំ, ផ្ទៃដីព្រៃ, ផ្ទៃដីសម្រាប់ការចិញ្ចឹមសត្វ ព្រមទាំងដែនទឹកជាតំបន់គ្រប់គ្រងជលផលទឹកសាប-ទឹកសមុទ្រ។ ទន្ទឹមនិងនេះកម្ពុជាមានផ្ទៃដីធ្វើស្រែវស្សាប្រមាណ៣លានហិកតានិង ផ្ទៃដីស្រែប្រាំងប្រមាណ៧០ម៉ឺនហិកតា និងអាចពង្រីកបានដល់៩០ម៉ឺនហិកតាក្នុងឆ្នាំ២០២៥៕
