ភ្នំពេញ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធានាគារអភិវឌ្ឍន៍ជនបទ និងកសិកម្ម (ARDB) នាថ្ងៃទី៣ ខែមិថុនា ឆ្នាំ២០២៥នេះ បានចេញញត្តិគាំទ្រយ៉ាងពេញទំហឹងចំពោះចំណាត់ការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លើបញ្ហាព្រំដែនជាមួយថៃ ទាំងការប្តឹងទៅកាន់តុលាការយុត្តិធម៌អន្តរជាតិ (ICJ) និងការប្រើប្រាស់កម្លាំងការពារខ្លួន។
នៅក្នុងញត្តិសម្តែងការគាំទ្រចំពោះមនសិការស្នេហាជាតិនេះ ក្នុងនាមជាថ្នាក់ដឹកនាំធនាគារ ARDB ដែលជាធនាគារអនុវត្តគោលនយោបាយរបស់រាជរដ្ឋាភិបាល ឯកឧត្តមបណ្ឌិតប្រតិភូ បានមានប្រសាសន៍ថា «យើងខ្ញុំទាំងអស់គ្នាជាថ្នាក់ដឹកនាំ និងបុគ្គលិកទាំងអស់ នៃធនាគារអភិវឌ្ឍន៍ជនបទ និងកសិកម្ម ព្រមទាំងរូបខ្ញុំបាទផ្ទាល់ និងភរិយា សូមប្រកាសជាឱឡារិកគាំទ្រយ៉ាងពេញទំហឹងចំពោះចំណាត់ការរបស់ សម្តេចមហាបវរធិបតី ហ៊ុន ម៉ាណែត លើបញ្ហាព្រំដែនជាមួយថៃ ទាំងការប្តឹងទៅកាន់តុលាការយុត្តិធម៌អន្តរជាតិ (ICJ) និងការប្រើប្រាស់កម្លាំងការពារខ្លួន នាព្រឹកថ្ងៃទី០២ ខែមិថុនា ឆ្នាំ២០២៥ នៅក្នុងកិច្ចប្រជុំគណៈកម្មាធិការសមាជរដ្ឋសភា និងព្រឹទ្ធសភា នៃព្រះរាជាណាចក្រកម្ពុជា ដើម្បីដោះស្រាយឱ្យដាច់ស្រេចចំពោះជម្លោះព្រំដែន ដែលកំពុងអូសបន្លាយមួយនេះ។
«ព្រឹត្តិការណ៍ផ្ទុះអាវុធ ដែលបង្កដោយភាគីកងទ័ពនៃប្រទេសថៃក្នុងដែនអធិបតេយ្យភាពប្រទេសកម្ពុជា កាលពីថ្ងៃទី២៨ ខែឧសភា ឆ្នាំ២០២៥ គឺជាការបង្ហាញឱ្យឃើញកាន់តែច្បាស់នូវការចិញ្ចឹមចិត្តឈ្លានពាន ដែលមានតាំងពីអតីតកាលរបស់ប្រទេសជិតខាងមួយនេះ មកលើទឹកដីជាទីស្នេហានៃយើងទាំងអស់គ្នា ហើយក៏ជាការរំលឹកដល់កូនខ្មែរគ្រប់រូបត្រូវប្រកាន់ខ្ជាប់នូវស្មារតីសាមគ្គីភាព ស្នេហាជាតិ និងការពារជាដាច់ខាតនូវបូរណភាពទឹកដីជាទីស្រលាញ់នៃយើងគ្រប់គ្នា។
«យើងខ្ញុំទាំងអស់គ្នាសូមគោរពកោតសរសើរដោយស្មោះចំពោះ សម្តេចមហាបវរធិបតី ដែលបានចេញ យន្តការប្រកបដោយគតិបណ្ឌិតបំផុត គឺប្រើប្រាស់យន្តការច្បាប់អន្តរជាតិ ដើម្បីដោះស្រាយសំណុំរឿងព្រំដែនជាមួយប្រទេសថៃ។ ចំណាត់ការនេះបង្ហាញពីការតាំងចិត្តយ៉ាងម៉ឺងម៉ាត់ក្នុងការការពារទឹកដី ដែនអធិបតេយ្យភាពជាតិ ដោយមិនអនុញ្ញាតឱ្យភាគីណាមួយមករំលោភបំពានបាននោះទេ ព្រោះកម្ពុជាមិនចង់បានសង្គ្រាម ហើយក៏មិនអនុញ្ញាតឱ្យប្រទេសណាមួយមកឈ្លានពានបានឡើយ»៕
