អន្តរជាតិ៖ ដើម្បីបង្កើនលទ្ធភាពរបស់កសិករខ្នាតតូចក្នុងការទទួលបានគ្រាប់ពូជ ដែលមានគុណភាពល្អនៅក្នុងសហគមន៍ ធនាគារអភិវឌ្ឍន៍អាហ្វករិក (African Development Bank- AfDB) បានបោះទុនគាំទ្រដល់ការបង្កើតធនាគារគ្រាប់ពូជសហគម ដើម្បីរក្សាទុកពូជជាង១០០ប្រភេទ សម្រាប់ចែកចាយដល់កសិករនៅរដូវដាំដុះ។
ធនាគារអភិវឌ្ឍន៍អាហ្រ្វិក គ្រោងនឹងបើកដំណើរការធនាគារគ្រាប់ពូជដំណាំសហគមន៍ មានតម្លៃជាទឹកប្រាក់សរុបចំនួន៥០០លានដុល្លារ នៃគម្រោងផ្តល់ហិរញ្ញប្បទានជាទឹកប្រាក់សរុបទំហំ១០ពាន់លានដុល្លារសម្រាប់កសិករខ្នាតតូច និងសហគ្រាសធុនតូច នៅទូទាំងទ្វីបអាហ្រ្វិកទាំងមូល។
យោងតាមប្រធានធនាគារ បានឱ្យដឹងថា ថ្នាក់ដឹកនាំធនាគារកំពុងតែពិគ្រោះយោបល់ជាមួយក្រុមប្រឹក្សាភិបាលរបស់ខ្លួន ដើម្បីរកទីតាំងបើកការដ្ឋានសាងសង់ឃ្លាំងស្តុកគ្រាប់ពូជនៃគម្រោងបង្កើតធនាគារគ្រាប់ពូជសហគមន៍។
ធនាគារគ្រាប់ពូជសហគមន៍នេះ នឹងតើតួជាគ្រឹះស្ថានហិរញ្ញវត្ថុជាច្រើនផ្នែក មានទាំងការធានាឥណទានពាណិជ្ជកម្ម ការធានារ៉ាប់រងការបាត់បង់ដំបូង យន្តការហិរញ្ញវត្ថុចម្រុះ និងការលើកទឹកចិត្តពីប្រភពដើម ដើម្បីកាត់បន្ថយថ្លៃដើមប្រតិបត្តិការខ្ពស់នៃការបម្រើសហគ្រាស តាមរយៈជំនួយផ្នែកបច្ចេកទេស។
លោកបានមានប្រសាន៍នៅក្នុងសុន្ទរកថា នៅឯសន្និសីទស្តីពីការធ្វើមាត្រដ្ឋានហិរញ្ញវត្ថុសម្រាប់កសិករខ្នាតតូចនៅទីក្រុងណៃរ៉ូប៊ី ប្រទេសកេនយ៉ា ដោយលោកអះអាងថា “យើងឈរលើគោលការបង្កើតប្រវត្តិសាស្ត្រ ដោយពង្រីកកម្រិតច្នៃប្រឌិត និងបង្កើតសម្ព័ន្ធភាពយ៉ាងទូលំទូលាយ ដើម្បីតភ្ជាប់គម្លាតហិរញ្ញប្បទាន ដែលកសិករខ្នាតតូច និងកសិឧស្សាហកម្មខ្នាតតូចកំពុងតែជួបប្រទះ”។
លោកប្រធានធនាគារអភិវឌ្ឍន៍អាហ្វ្រិក ដែលកាលពីពេលថ្មីៗកន្លងមកនេះ បានទទួលរង្វាន់កិត្តិយសជាតិខ្ពស់បំផុតរបស់ប្រទេសកេនយ៉ា បានអំពាវនាវឱ្យមានសកម្មភាពរួមថា «រួមគ្នាអនុញ្ញាតឱ្យយើងបញ្ចេញសក្តានុពលនៃវិស័យកសិកម្មនៅទ្វីបអាហ្រ្វិក។ អនុញ្ញាតឱ្យយើងធ្វើឱ្យទ្វីបអាហ្រ្វិកក្លាយជាឃ្លាំងនំប៉័ងរបស់ពិភពលោក។ ហើយរួមគ្នា អនុញ្ញាតឱ្យយើងចិញ្ចឹមប្រជាជាតិអាហ្វ្រិកប្រកបដោយមោទនភាព»។
ការប្តេជ្ញាចិត្តផ្នែកហិរញ្ញវត្ថុពីដៃគូអភិវឌ្ឍន៍នៅទ្វីបអាហ្វ្រិក បានកើនឡើងពី៣០ពាន់លានដុល្លារ ដល់ទៅ៧២ពាន់លានដុល្លារ ក្នុងរយៈពេលតិចជាងមួយឆ្នាំ ខណៈធនាគារអភិវឌ្ឍន៍អាហ្រ្វិក បានសន្យាផ្តល់ឥណទានជាទឹកប្រាក់ចំនួន១០ពាន់លានដុល្លារ។
នាពេលកន្លងមក ធនាគារអភិវឌ្ឍន៍អាហ្វ្រិក បានអនុម័តគម្រោងចំនួន៧៧ ដែលមានតម្លៃ៣,៩ពាន់លានដុល្លារ ដើម្បីគាំទ្រដល់ការអនុវត្តគម្រោងដឹកជញ្ជូនស្បៀងអាហារ និងកសិកម្មទូទាំងប្រទេស៣២នៃទ្វីបអាហ្វ្រិក រួមនឹងទឹកប្រាក់បន្ថែមចំនួន១,៧២ពាន់លានដុល្លារ ដែលគ្រោងអនុម័តនៅក្នុងឆ្នាំនេះ។
ព្រមជាមួយគ្នានេះដែរ ដើម្បីឱ្យគម្រោងបង្កើតធនាគារគ្រាប់ពូជសហគមន៍ ដំណើរការទៅដោយជោគជ័យ ធនាគារអភិវឌ្ឍន៍អាហ្វរិក បានដាក់ចេញនូវគំនិតផ្តួចផ្តើមសំខាន់ៗមួយចំនួន ដើម្បីពង្រឹងកសិករខ្នាតតូច ដូចបច្ចេកវិទ្យាសម្រាប់ការផ្លាស់ប្តូរកសិកម្មអាហ្រ្វិក បានដល់កសិករចំនួន២៥លាននាក់ ដែលជាម្ចាស់ដំណាំមានទិន្នផលខ្ពស់ និងធន់នឹងអាកាសធាតុ អាចចូលរួមជំរុញផលិតកម្មស្បៀងអាហាររបស់ទ្វីបអាហ្រ្វិកម កើនឡើងរហូតដល់១២០លានតោន។
ចំណែកកម្មវិធីផលិតស្បៀងសង្គ្រោះបន្ទាន់របស់អាហ្រ្វិក ដែលជាគម្រោងមានទឹកប្រាក់ចំនួន១,៥ពាន់លានដុល្លារ បានចែកចាយគ្រាប់ពូជចំនួន៤៥៩ ០០០តោន និងជីចំនួន២,៨លានតោន ដល់កសិករជាង១២,៣លាននាក់ ដែលមានសមត្ថភាពផលិតស្បៀងអាហារបានចំនួន៣៧,៦លានតោន។
ចំណែកគំនិតផ្តួចផ្តើមបង្កើតតំបន់កែច្នៃកសិឧស្សាហកម្មពិសេស បានបណ្តាក់ទុនចំនួន៩៣៤,៥១លានដុល្លារ រួមនឹងប្រាក់សហហិរញ្ញប្បទានចំនួន០៣៨,២៧លានដុល្លារ ដែលគាំទ្រដល់គម្រោងចំនួន២៧ នៅក្នុងប្រទេសចំនួន១១នៃទ្វីបអាហ្វ្រិក៕
