ទីក្រុងប៉ីហៃ, ខេត្តក្វាងស៊ី៖ នៅថ្ងៃទី១៤ ខែមីនា ឆ្នាំ២០២៥, ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម ឯកឧត្តម បាន លឹម អគ្គនាយករងនៃធនាគារអភិវឌ្ឍន៍ជនបទ និងកសិកម្ម បានដឹកនាំសហការីចូលរួមពិធីទទួលដំឡូងមីស្ងួតកម្ពុជាលើកដំបូង នាំចូលដោយក្រុមហ៊ុន COFCO BIO-TECHNOLOGY CO.,LTD។
នៅក្នុងឱកាសនេះ ក៏មានពិធីចុះកិច្ចព្រមព្រៀងផងដែរ ស្តីពី ការទិញ-លក់ដំឡូងមីស្ងួតកម្ពុជា រវាងក្រុមហ៊ុន HANG HARVEST AGRICULTURE CO.,Ltd និងក្រុមហ៊ុន COFCO BIO-TECHNOLOGY CO.,Ltd ដែលសហការរៀបចំឡើងដោយការិយាល័យទំនាក់ទំនងពាណិជ្ជកម្មកម្ពុជាប្រចាំទីក្រុងណានីង, រដ្ឋាភិបាលប្រជាជនប៉ីហៃ, មន្ទីរពាណិជ្ជកម្មនៃតំបន់ស្វ័យតក្វាងស៊ី ព្រមទាំងសម្របសម្រួលដោយការិយាល័យពាណិជ្ជកម្មនៃទីក្រុងប៉ីហៃ និងគណៈកម្មការគ្រប់គ្រងតំបន់អភិវឌ្ឍន៍បច្ចេកទេសសេដ្ឋកិច្ចប៉ីហៃ។
ឆ្លៀតក្នុងឱកាសនៃពិធីទទួលដំឡូងមីស្ងួតកម្ពុជាលើកដំបូង និងពិធីចុះកិច្ចព្រមព្រៀងស្តីពី ការទិញ-លក់ដំឡូងមីស្ងួតកម្ពុជានេះ ដែលមានការចូលរួមពីអភិបាលនិងអភិបាលរងក្រុងប៉ីហៃ, តំណាងក្រសួងពាណិជ្ជកម្មនៃព្រះរាជាណាចក្រកម្ពុជា, តំណាងមន្ទីរពាណិជ្ជកម្មនៃប្រទេសកម្ពុជាប្រចាំទីក្រុងណានីង, មន្ទីរពាណិជ្ជកម្មនៃតំបន់ស្វ័យតក្វាងស៊ី, និងក្រុមហ៊ុនវិនិយោគមួយចំនួនទៀត, ឯកឧត្តម បាន លឹម បានណែនាំអំពីតួនាទីរបស់ធនាគារអភិវឌ្ឍន៍ជនបទ និងកសិកម្ម (ARDB) ជាពិសេសការគាំទ្រដល់វិស័យកសិកម្មកម្ពុជាតាមរយៈការផ្តល់ហិរញ្ញប្បទាន សេវាកម្មហិរញ្ញប្បទានពាណិជ្ជកម្ម និងសេវាទូទាត់ឆ្លងប្រទេស (Cross-Border Payment) ក្នុងគោលដៅជំរុញការវិនិយោគនៃប្រទេសទាំងពីរ។
សូមបញ្ជាក់ថា ធនាគារអភិវឌ្ឍន៍ជនបទ និងកសិកម្ម (ARDB) បាននឹងកំពុងចូលរួមកជំរុញលើកិច្ចសហប្រតិបត្តិការពាណិជ្ជកម្មរវាងប្រទេសទាំងពីរ តាមរយៈការផ្តល់សេវាធនាគារជូនវិនិយោគិន សំដៅលើកកម្ពស់ការអភិវឌ្ឍសេដ្ឋកិច្ច-សង្គមកម្ពុជា៕
