កំពង់ធំ៖ ក្រុមហ៊ុន MIRARTH Agri Tech Co Ltd នឹងនាំចេញគ្រាប់ស្វាយចន្ទីទៅកាន់ទីផ្សារសហគមអឺរ៉ុបដោយផ្ទាល់ក្នុងបរិមាណ ២៥០តោន ក្នុងឆ្នាំនេះ ដែលជាលទ្ធផលនៃកិច្ចខិតខំរបស់ក្រសួងពាណិជ្ជកម្មក្នុងការស្វែងរក និងធានាឱ្យបាននូវទីផ្សារអន្តរជាតិសម្រាប់ផលិតផលកម្ពុជា តាមរយៈក្រុមការងារជំរុញការនាំចេញ និងមជ្ឈមណ្ឌលសេវានាំចេញកំពុងជួយបណ្ដាក្រុមហ៊ុននានារបស់កម្ពុជា ក្នុងការពង្រឹងសមត្ថភាពដើម្បីនាំចេញ។
ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ ជាមួយនឹងគណៈប្រតិភូក្រសួងពាណិជ្ជកម្ម បានថ្លែងបញ្ជាក់ក្នុងពិធីអបអរសាទរការនាំចេញផលិតផលកែច្នៃគ្រាប់ស្វាយចន្ទីរបស់ក្រុមហ៊ុន MIRARTH Agri Tech Co Ltd ទៅកាន់សហគមន៍អឺរ៉ុបជាលើកដំបូង ដោយមានការអញ្ជើញចូលរួមពី ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម ឯកឧត្តម ញឹម បានខេង អភិបាលរង នៃគណៈអភិបាលខេត្តកំពង់ធំ ព្រមទាំងស្ថាប័ននិងតំណាងអង្គភាពពាក់ព័ន្ធ ក្រុមហ៊ុន សមាគមន៍ស្វាយចន្ទី ។
មន្រ្តីជាន់ខ្ពស់ខាងលើបញ្ជាក់ថា សមិទ្ធផលនេះសបញ្ជាក់ឱ្យឃើញពីកិច្ចខិតខំប្រឹងប្រែងរួមគ្នារបស់រាជរដ្ឋាភិបាល ដៃគូពាក់ព័ន្ធ និងវិស័យឯកជនក្នុងការពង្រឹងគុណភាពវិស័យកែច្នៃគ្រាប់ស្វាយចន្ទីកម្ពុជា ឱ្យសមស្របទៅតាមស្តង់ដារអន្តរជាតិ ព្រមទាំងបានបង្ហាញឱ្យឃើញថា ស្វាយចន្ទីដែលផលិតនៅរោងចក្រនៅខេត្តកំពង់ធំមួយនេះ មានគុណភាពស្តង់ដារអន្តរជាតិ ដែលបានចូលរួមចំណែកបង្កើតនូវផលិតផលដែលមានតម្លៃខ្ពស់ និងជាមោទនភាពសម្រាប់ក្រុមហ៊ុនផ្ទាល់ សហគម និងប្រទេសជាតិផងដែរ។
សម្រាប់លោក លោក អួន ស៊ីឡុត ប្រធានសមាគមស្វាយចន្ទី បានលើកឡើងថា សមាគមកំពុងតែរៀបចំផែនការមេ រៀបចំកំពង់ធំនឹងក្លាយជាមជ្ឈមណ្ឌលការប្រមូលគ្រាប់ឆៅនិងមជ្ឈមណ្ឌលនៃការផលិត ។ឥឡូវបានរៀបចំឃ្លាំងសហគមបាន៤ឃ្លាំង រៀបចំទីលានហាល នឹងកាលល្បងទិញគ្រាប់នាំចេញនិងផ្គត់ផ្គង់សហគ្រាសក្នុងស្រុក។ បញ្ហាសហគ្រាសក្នុងស្រុកគ្មានទុកបង្វិល ឃ្លាំងស្តុកទុក ជាហេដ្ឋារចនាសម្ពន្ធ ខាងសមាគមនឹងបង្កើតតំបន់មួយទុកគ្រាប់សម្រាប់កែច្នៃនាំចេញ។
ក្រសួងកសិកម្ម រក្ខាប្រមាញ់និងនេសាទ បានប្រកាសដាក់ឱ្យប្រើប្រាស់ជាផ្លូវការនូវ ឯកសារ “ស្តីពីតំបន់ដាំដុះស្វាយចន្ទីនៅកម្ពុជាកាលពីថ្ងៃទី២៥ខែតុលាឆ្នំាំ២០២៤ ។ ឯកសារ ក៏ដូចជាផែនទី ដែលបង្ហាញពីតំបន់ដាំដុះស្វាយចន្ទីនៅទូទាំងប្រទេសមានផ្ទៃដីប្រមាណ៥៨ម៉ឺនហិកតានេះ វាមានផលប្រយោជន៍ច្រើនទាំងក្នុងផ្នែកផលិតកម្ម និងជួយតម្រង់ទិសដល់វិនិយោគិនងាយស្រួលក្នុងការសម្រេចវិនិយោគ។
សមាគមស្វាយចន្ទី លោក អួន ស៊ីឡុត អឺរ៉ុបគឺជាទីផ្សារដ៏ធំមួយ ហើយទីផ្សារមួយនេះស្រូបយកផលិតផលប្រទេសផ្សេងៗមាន២៥% ។ ចន្ទីកម្ពុជា ទាមទារសហគ្រាសក្នុងស្រុកមានភាពរឹងមាំ និងមានសមត្ថភាព មានដើមទុន សម្រាប់ប្រមូលទិញគ្រាប់ស្វាយចន្ទី ស្តុកទុកធ្វើការកែច្នៃ ឬអាចធ្វើឱ្យថ្លៃដើមផលិតទាបទើបអាចប្រជែងជាមួយប្រទេសមួយចំនួននៅអាហ្វ្រិកបាន។
បើយោងតាមលោក អួន ស៊ីឡុតកន្លងមកមានសិប្បកម្មស្ទឹងត្រែងបាននាំចេញគ្រាប់ស្វាយចន្ទីទៅអឺរ៉ុប ទៅអង់គ្លេស អាល្លឺម៉ង់, សិប្បកម្មជ័យសម្បត្តិ និងក្រុមហ៊ុន មីរ៉ាត់ នាំទៅបារាំង និងអាល្លឺម៉ង់ តែក្នុងបរិមាណតិចតួច។
ខេត្តដែលមានផ្ទៃដីដាំដុះស្វាយចន្ទីមានចំនួន២៣ខេត្ត ក្រុង ហើយក្នុងនោះខេត្តដែលមានផ្ទៃដីដាំដុះស្វាយចន្ទីច្រើនជាងគេ មានខេត្ត កំពង់ធំ ស្ទឹងត្រែង មណ្ឌលគិរី ក្រចេះ ព្រះវិហារ ត្បូងឃ្មុំ ខេត្តកំពុងចាម ជាដើម ដោយបណ្តាខេត្តមួយចំនួនផ្សេងទៀតមានការដំាំដុះស្វាយចន្ទីតិចតួច។
