ហាណូយ៖ អ្នកជំនាញកសិកម្មវៀតណាម កំពុងជួយកែច្នៃដី ដែលត្រូវបានគេបោះបង់ចោលនៅទ្វីបអាហ្វ្រិក ឱ្យក្លាយទៅជាវាលស្រែ ខណៈពេលអ្នកជំនាញកសិកម្មរបស់អាហ្វ្រិកកំពុងខិតខំប្រឹងប្រែង ដើម្បីនាំចេញអង្ករទៅកាន់ទីផ្សារអន្តរជាតិ។
លោក ង្វៀន ដាងងៀ (Nguyen Dang Nghia) នាយកមជ្ឈមណ្ឌលស្រាវជ្រាវ និងប្រឹក្សាកសិកម្មត្រូពិច បាននិយាយកាលពីពេលថ្មីៗនេះថា ប្រទេសកុងហ្គោ មានសក្តានុពលយ៉ាងខ្លាំងសម្រាប់ធ្វើកសិកម្មដាំដំណាំស្រូវដោយប្រើបច្ចេកទេសវៀតណាម។
ដំណើរទស្សនកិច្ចមួយ ត្រូវបានរៀបចំឡើងដោយក្រុមហ៊ុន មានមូលដ្ឋាននៅក្នុងសហរដ្ឋអាមេរិក ដែលជាកម្មសិទ្ធិរបស់អាណិកជនវៀតណាម ដើម្បីវាយតម្លៃលទ្ធភាពនៃការផលិតស្រូវនៅប្រទេសកុងហ្គោ។ ក្រុមហ៊ុនគ្រោងនឹងអនុវត្តគំរូដាំស្រូវតាមតំបន់ដីសណ្តទន្លេមេគង្គ រួមមានពូជស្រូវ ជី ប្រព័ន្ធធារាសាស្ត្រ និងបច្ចេកទេសដាំដុះ។
លោក ង្វៀន ដាងងៀ បាននិយាយទៀតថា សំណាកដីប្រមូលបានក្នុងអំឡុងពេលពិនិត្យជាក់ស្តែងបានបង្ហាញថា ដីមានជីជាតិល្អ និងសមស្របសម្រាប់ការធ្វើកសិកម្មដាំស្រូវខ្នាតធំ។
ប្រទេសកុងហ្គោ មានផ្ទៃដីកសិកម្មធំទូលាយ ប៉ុន្តែនៅតែប្រឈមនឹងបញ្ហាសន្តិសុខស្បៀង។ដូច្នេះ អ្នកជំនាញការវៀតណាមផ្តោតលើវិស័យសំខាន់ពីរ គឺការគ្រប់គ្រងប្រព័ន្ធធារាសាស្ត្រ និងការកែលម្អរបៀបធ្វើកសិកម្ម។
ប្រសិទ្ធភាពនៃវិធីសាស្រ្តនេះ ត្រូវបានបង្ហាញរួចហើយនៅក្នុងប្រទេសមួយចំនួន។ នៅប្រទេសសៀរ៉ាឡេអូន អ្នកឯកទេសវៀតណាម បានជួយកសិករផ្លាស់ប្តូរពីការដាំដុះដោយពឹងផ្អែកលើទឹកភ្លៀង ទៅជាការធ្វើកសិកម្មប្រើប្រព័ន្ធធារាសាស្ត្រ ណែនាំពូជស្រូវរយៈពេលខ្លី និងកែលម្អហេដ្ឋារចនាសម្ព័ន្ធវាលស្រែ។
ជាលទ្ធផល តំបន់ដាំដុះតែម្តងក្នុងមួយឆ្នាំ អាចដាំស្រូវបានពីរ ឬបីដងក្នុងមួយឆ្នាំ ដើម្បីជួយបង្កើនទាំងការផ្គត់ផ្គង់ស្បៀងអាហារ និងប្រាក់ចំណូលរបស់កសិករ។
គម្រោងស្រដៀងគ្នានេះ ត្រូវបានពង្រីកទៅកាន់ប្រទេសម៉ូហ្សំប៊ិក តង់ហ្សានី និងប្រទេសស៊ូដង់ ដែលការកែលម្អប្រព័ន្ធធារាសាស្ត្រ បានជួយជំរុញទិន្នផលស្រូវនៅតាមតំបន់មួយចំនួនឱ្យកើនឡើងដល់៨,៥ តោនក្នុងមួយហិកតា។
ប្រទេសវៀតណាម ក៏បានចុះហត្ថលេខាលើកិច្ចសហប្រតិបត្តិការកសិកម្មកម្រិតរដ្ឋាភិបាលជាមួយប្រទេស អង់ហ្គោឡា ដោយគ្រោងនឹងចាប់ផ្តើមនៅក្នុងឆ្នាំ២០២៦នេះ ដោយផ្តោតលើដំណាំស្រូវ ដំឡូងមី និងសណ្តែកសៀង។
អ្នកជំនាញវៀតណាម ក៏បានលើកឡើងពីកម្មវិធីកិច្ចសហប្រតិបត្តិការស្រូវ-អង្កររបស់វៀតណាមជាមួយប្រទេសគុយបា ដែលជាឧទាហរណ៍ដ៏ជោគជ័យបំផុតនៃការនាំចេញគំរូកសិកម្មរបស់ខ្លួន។
គម្រោងស្រូវ-អង្ករ គុយបារបស់វៀតណាម បានដំណើរការអស់រយៈពេល២៣ឆ្នាំ ចាប់ពីឆ្នាំ២០០២ ដល់ឆ្នាំ២០២៥ និងបានធ្វើឱ្យផលិតកម្មស្រូវរបស់ប្រទេសគុយបា មានភាពប្រសើរឡើងគួរឱ្យកត់សម្គាល់។ ក្នុងអំឡុងឆ្នាំ២០០៥-២០១១ នៅពេលប្រទេសគុយបា ប្រឈមនឹងទណ្ឌកម្មសេដ្ឋកិច្ច និងត្រូវនាំចូលអង្ករពី៤០០ ០០០ ទៅ៤៥០ ០០០តោនក្នុងមួយឆ្នាំ។ ប្រទេសវៀតណាម បានផ្តល់ការគាំទ្រយ៉ាងទូលំទូលាយ រួមមានគ្រឿងចក្រកសិកម្ម ការបណ្តុះបណ្តាលបច្ចេកទេស និងកម្មវិធីបង្កាត់ពូជស្រូវ។
ពូជស្រូវក្នុងស្រុករបស់វៀតណាមចំនួនបួនប្រភេទ ត្រូវបានអភិវឌ្ឍសម្រាប់ជួយប្រទេសគុយបា ឱ្យទទួលបាន គ្រាប់ពូជដោយខ្លួនឯង។ ចំណែកទិន្នផលស្រូវ ក៏បានកើនឡើងរហូតដល់ប្រាំតោន ហើយនៅតំបន់ខ្លះទទួលបានទិន្នផលរហូតដល់ប្រាំពីរតោន ក្នុងមួយហិកតា។
នៅឆ្នាំ២០២៤ ការនាំចូលអង្កររបស់គុយបា បានធ្លាក់ចុះមកនៅត្រឹមប្រហែល២១០ ០០០តោន ដោយរំពឹងទុក ការពង្រីកគម្រោងនេះដល់១០០ ០០០ហិកតា។
ទន្ទឹមនឹងកិច្ចខិតខំប្រឹងប្រែងជាសកល ដើម្បីប្រយុទ្ធប្រឆាំងនឹងការប្រែប្រួលអាកាសធាតុ វៀតណាមក៏កំពុងផ្លាស់ប្តូរតួនាទីរបស់ខ្លួននៅក្នុងខ្សែច្រវាក់តម្លៃអង្ករពិភពលោក ពីការនាំចេញគ្រាប់ធញ្ញជាតិ ទៅជាការនាំចេញគំរូកសិកម្មប្រកបដោយនិរន្តរភាព។
សសរស្តម្ភដ៏សំខាន់នៃយុទ្ធសាស្ត្រនេះ ដើម្បីអភិវឌ្ឍដំណាំស្រូវឱ្យមានគុណភាពខ្ពស់ និងបំភាយឧស្ម័នទាបចំនួនមួយលានហិកតា នៅតំបន់ដីសណ្តទន្លេមេគង្គនៅឆ្នាំ២០៣០។ គំនិតផ្តួចផ្តើមនេះ ទទួលបានការគាំទ្រពីធនាគារពិភពលោក ដើម្បីកាត់បន្ថយការបំភាយឧស្ម័នក្នុងផលិតកម្មស្រូវ៕
