ហាណូយ៖ រដ្ឋាភិបាលនៃប្រទេសជប៉ុន គ្រោងផ្តល់ជំនួយ ក្រោមកម្មវិធីអភិវឌ្ឍន៍ផ្លូវការជំនាន់ថ្មីរបស់ខ្លួន សរុបជាថវិកាចំនួន៥០ពាន់លានយ៉េន ឬស្មើនឹងជាង៣១៦លានដុល្លារ ដើម្បីគាំទ្រដល់ប្រទេសវៀតណាមក្នុងការផ្លាស់ប្តូរទៅរកកំណើនបៃតង និងការបន្សាំនឹងការប្រែប្រួលអាកាសធាតុ។
គម្រោងផ្តល់កញ្ចប់ថវិកានេះ ត្រូវបានធ្វើឡើងកាលថ្ងៃទី១៨ ខែមីនា ឆ្នាំ២០២៦ ក្នុងគ្រាដែលទីភ្នាក់ងារសហប្រតិបត្តិការអន្តរជាតិជប៉ុន (JICA) និងក្រសួងហិរញ្ញវត្ថុវៀតណាម បានរួមគ្នារៀបចំសិក្ខាសាលាមួយ នៅទីក្រុងហាណូយ ដើម្បីពិភាក្សាអំពីកម្មវិធីប្រាក់កម្ចីសម្រាប់គាំទ្រដល់កិច្ចខិតខំប្រឹងប្រែងក្នុងការអនុវត្តគោលនយោបាយពាក់ព័ន្ធនឹងបរិស្ថាន និងការប្រែប្រួលអាកាសធាតុ។
គំនិតផ្តួចផ្តើមនេះ គឺជាគំរូនៃ «កម្មវិធីអភិវឌ្ឍន៍ផ្លូវការជំនាន់ថ្មី» ដែលមានគោលបំណងកាត់បន្ថយពេលវេលារៀបចំ និងបង្កើនល្បឿននៃការបញ្ចេញថវិកា។ ក្នុងពេលដំណាលគ្នានេះដែរ ក៏ធានាបាននូវប្រសិទ្ធភាពតាមរយៈការរៀបចំគោលនយោបាយ និងការប្រើប្រាស់ធនធានឱ្យមានប្រសិទ្ធភាពផងដែរ។
បច្ចុប្បន្នទីភ្នាក់ងារសហប្រតិបត្តិការអន្តរជាតិជប៉ុន កំពុងអនុវត្តគម្រោងបច្ចេកទេសជាច្រើននៅក្នុងប្រទេសវៀតណាម ដូចជាការអភិរក្សព្រៃឈើ ការកាត់បន្ថយហានិភ័យគ្រោះមហន្តរាយ ការឆ្លើយតបនឹងបញ្ហាប្រែប្រួលអាកាសធាតុ និងការលើកកម្ពស់សេដ្ឋកិច្ចចក្រា។
ក្នុងឱកាសនេះ លោក អ៊ីតូ ណាអូគី (Ito Naoki) ឯកអគ្គរាជទូតជប៉ុន ប្រចាំប្រទេសវៀតណាម បានលើកឡើងថា ប្រាក់កម្ចីនេះជាចំណុចចាប់ផ្តើមនៃគំនិតផ្តួចផ្តើមថ្មីៗ ដែលផ្តោតលើកំណើនបៃតង ការកាត់បន្ថយការបំភាយឧស្ម័នឲ្យដល់សូន្យ និងការកសាងសហគមន៍បំភាយឧស្ម័នសូន្យនៅអាស៊ី។ លោកបានបន្ថែមថា ជប៉ុននឹងបន្តគាំទ្រតាមរយៈថវិកា និងការអនុវត្តគោលនយោបាយ។
ចំណែកខាងភាគីវៀតណាមវិញ លោក ចាន កួកភួង (Tran Quoc Phuong) អនុរដ្ឋមន្ត្រីក្រសួងហិរញ្ញវត្ថុ បានមានប្រសាសន៍ថា កំណើនបៃតង និងការបន្សាំនឹងអាកាសធាតុ កំពុងក្លាយជាបញ្ហាបន្ទាន់នៅលើពិភពលោក ខណៈ បរិស្ថានកំពុងរងការខូចខាត និងធនធានកំពុងថយចុះ។
លោកបានបញ្ជាក់ទៀតថា វៀតណាមជាប្រទេសមួយក្នុងចំណោមប្រទេសផ្សេងទៀត ដែលកំពុងរងផលប៉ះពាល់យ៉ាងខ្លាំងពីការប្រែប្រួលអាកាសធាតុ ជាពិសេសការកើនឡើងនៃកម្រិតទឹកសមុទ្រ ព្យុះ និងទឹកជំនន់ ដែលបង្កការខូចខាតដល់សេដ្ឋកិច្ច និងសង្គមយ៉ាងធ្ងន់ធ្ងរ។
តាមការប៉ាន់ប្រមាណ ប្រទេសវៀតណាមត្រូវការថវិកា ប្រហែល៦៨,៧៥ពាន់លានដុល្លារ នៅឆ្នាំ២០៣០ សម្រាប់កាត់បន្ថយការបំភាយឧស្ម័ន។ ក្នុងនោះ ប្រហែល២៤,៧លានដុល្លារ ស្មើនឹង៣៦ភាគរយ បានមកពីធនធានក្នុងស្រុក និង ៤៤លានដុល្លារ ស្មើនឹង៦៤ភាគរយ ត្រូវការពឹងផ្អែកលើការគាំទ្រពីអន្តរជាតិ។
ភាគីវៀតណាមសង្ឃឹមថា ដៃគូអន្តរជាតិ រួមទាំងប្រទេសជប៉ុន នឹងបន្តផ្តល់ការគាំទ្រផ្នែកហិរញ្ញវត្ថុ បច្ចេកវិទ្យា និងធនធានមនុស្ស ដើម្បីសម្រេចគោលដៅទាំងនេះ។
កម្មវិធីកម្ចីនេះ ត្រូវបានអនុម័តដោយរដ្ឋាភិបាលទាំងពីរ ហើយត្រូវបានរំពឹងថា នឹងចុះហត្ថលេខានៅក្នុងខែមីនា ឆ្នាំ ២០២៦នេះ ។ កម្មវិធីនេះ ត្រូវបានចាត់ទុកថា ជាជំហានសំខាន់មួយក្នុងការពង្រឹងកិច្ចសហប្រតិបត្តិការរវាងប្រទេសទាំងពីរ ជាពិសេសក្នុងវិស័យកំណើនបៃតង និងបញ្ហាប្រឈមនឹងការប្រែប្រួលអាកាសធាតុ៕
