ដោយ អៀវ ឈៀងនី
ភ្នំពេញ៖ ទឹកខ្មេះអង្កាម ត្រូវបានផលិតឡើងពីឡដុតធ្យូងអង្កាម ដែលជាឧបករណ៍មួយបង្កើតឡើងដើម្បីដុតអង្កាមសម្រាប់ផលិតជាធ្យូង និងផលិតទឹកខ្មេះ ដែលអាចទុកប្រើជាប្រយោជន៍សម្រាប់វិស័យកសិកម្ម ដូចជាការដាំដុះបន្លែ និងការចិញ្ចឹមត្រី។ ការប្រើប្រាស់ឡប្រភេទនេះ ជាជម្រើសល្អសម្រាប់ការធ្វើកសិកម្មបែបធម្មជាតិ។
លោក វង្ស រ៉ាបៃ អ្នកបច្ចេកទេស ឡដុតអង្កាម នៃសហគមន៍កសិកម្មតាសីសាមគ្គី បានឱ្យដឹងថា ទឹកខ្មេះ អង្កាម គេយកទៅប្រើប្រាស់ ដើម្បីបណ្តេញសត្វល្អិតផ្សេងៗក្នុងផ្ទះសំណាញ់ ធ្វើឱ្យបន្លែដុះល្អ។ រីឯធ្យូងអង្គាម គេយកទៅកែប្រែគុណភាពដី ធ្វើឱ្យដំណាំដុះល្អ និងផលិតជាជីកំបុស្តិ៍ ចំពោះផេះវិញ គេយកទៅកែច្នៃទឹកល្អក់ឱ្យថ្លាល្អ សម្រាប់ស្រះចិញ្ចឹមត្រី។
អ្នកបច្ចេកទេសឡដុតអង្កាម បានបន្តឱ្យដឹងថា ទឹកខ្មេះអង្កាម មិនត្រឹមតែផ្តល់អត្ថប្រយោជន៍ដល់ការបណ្តេញសត្វល្អិត ប៉ុណ្ណោះទេ ប៉ុន្តែវាថែមទាំងផ្តល់ចំណូលទៀតផង។ អង្កាមមួយបេចំណុះ២៥គីឡូក្រាម មានតម្លៃ២ ០០០រៀល ហើយការដុតអង្កាមមួយឡអស់៧៥គីឡូក្រាម ស្មើនិងពីរបេកន្លះ គឺចំណាយទឹកប្រាក់អស់៥ ០០០រៀល ប៉ុន្តែយើងទទួលបានធ្យូង ៤៥គីឡូ និងទឹកខ្មេះអង្កាមប្រមាណពីរលីត្រ ហើយទឹកខ្មេះ ក៏អាចលក់បានថ្លៃពី២០ ០០០រៀល ទៅ២៥ ០០០រៀល ក្នុងមួយលីត្រ។
លោក វង្ស រ៉ាបៃ បានឱ្យដឹងថា ឡដុតធ្យូងអង្កាមនេះ បើយើងប្រើប្រាស់មានរបៀបរៀបរយត្រឹមត្រូវ គឺអាចប្រើបានរយៈពេលយូររហូតដល់ពីប្រាំពីរឆ្នាំ ទៅ១០ឆ្នាំ ហើយការប្រើឡនេះ ជាជម្រើសល្អសម្រាប់ការធ្វើកសិកម្មបែបធម្មជាតិ។
គួររំលឹកឡើងវិញថា អ្នកបច្ចេកទេសឡដុតធ្យូងអង្កាម បានឱ្យដឹងថា អត្ថប្រយោជន៍ធ្យូងអង្គាមអាចយកទៅផលិតជាជីកំបុស្តិ៍ កាត់បន្ថយការចំណាយលើជីគីមី និងកែប្រែគុណភាពដី ជួយឱ្យដីមានជីជាតិបន្លែដុះល្អ និងរក្សាសំណើមសម្រាប់ដំណាំ។ លើសពីនេះ ផេះអង្កាម ក៏អាចយកទៅកែច្នៃស្រះទឹកដែលល្អក់ឱ្យថ្លាល្អ សម្រាប់ការចិញ្ចឹមត្រី។ ចំណែកឯទឹកខ្មេះអង្កាម ក៏អាចប្រើបណ្តេញសត្វល្អិតផ្សេងៗនៅក្នុងផ្ទះសំណាញ់បានផងដែរ៕
