ម៉ានីល៖ ក្រសួងកសិកម្មរបស់ប្រទេសហ្វីលីពីន កាលពីសប្តាហ៍មុន បានបញ្ជាឱ្យមានការស៊ើបអង្កេតភាពមិនប្រក្រតីក្នុងការទិញ និងចែកចាយជី រួមទាំងគ្រឿងចក្រកសិកម្ម នៅក្នុងប្រទេស បន្ទាប់ពីអង្គការការពារកសិករជាច្រើន បានដាក់ពាក្យបណ្តឹងទៅទីភ្នាក់ងារស៊ើបអង្កេត ជាប់សង្ស័យពីភាពមិនប្រក្រតី នៅក្នុងនាយកដ្ឋាននេះ។
នៅក្នុងសេចក្តីថ្លែងការណ៍មួយ រដ្ឋមន្ត្រីក្រសួងកសិកម្មហ្វីលីពីន លោក ហ្វ្រេនស៊ីស្កូ ធៀវ ឡូរ៉ែល (Francisco Tiu Laurel) បានមានប្រសាសន៍ថា ការស៊ើបអង្កេតថ្មីនេះនឹងស៊ីជម្រៅជាងការត្រួតពិនិត្យតាមស្តង់ដារ ដើម្បីការពារប្រាក់របស់អ្នកបង់ពន្ធពីសកម្មភាពខុសច្បាប់ ឬអំពើពុករលួយ។
លោកបានមានប្រសាសន៍ថា “យើងសូមអញ្ជើញក្រុមកសិករទាំងនេះ និងអង្គការផ្សេងទៀតឱ្យជួយយើងកម្ចាត់អំពើពុករលួយនៅក្នុងចំណោមពួកយើង”។
លោករដ្ឋមន្ត្រីបានបញ្ជាក់ថា នាយកដ្ឋានច្បាប់របស់ក្រសួងកសិកម្មនឹងបើកការស៊ើបអង្កេតលើសេចក្តីរាយការណ៍អំពីការពន្យារពេលនាំចូលជី។
ក្រសួងកសិកម្មបាននិយាយថា អ្នកផ្គត់ផ្គង់ណា ដែលខកខានមិនបានផ្តល់ ឬមិនបំពេញកាតព្វកិច្ចរបស់ខ្លួន ឱ្យទាន់រដូវដាំដុះខិតជិតមកដល់ នឹងត្រូវដាក់ពិន័យ ឬដាក់ក្នុងបញ្ជីខ្មៅ។
កាលពីនៅ២០២៥ ក្រសួងកសិកម្មបានស៊ើបអង្កេតបណ្តឹងស្រដៀងគ្នានេះ ដែលនាំឱ្យមានការដាក់ទណ្ឌកម្មលើអ្នកផ្គត់ផ្គង់ និងអ្នកពាក់ព័ន្ធមួយចំនួនទៀត។ ទន្ទឹមនឹងនេះដែរ ក្រសួងកសិកម្មហ្វីលីពីនគ្រោងសាកល្បងជីគីមី ដើម្បីវាយតម្លៃប្រសិទ្ធភាពរបស់វាក្នុងការជំរុញទិន្នផលក្នុងស្រុក រួមជាមួយការអនុវត្តសាកល្បងនូវប្រព័ន្ធលទ្ធកម្មថ្មីសម្រាប់ជីគីមី។
ក្រោមប្រព័ន្ធលទ្ធកម្មថ្មីនេះ កសិករហ្វីលីពីននឹងត្រូវបានអនុញ្ញាតឱ្យទិញជី ដែលបានចុះបញ្ជីតាមរយៈកាតតាមដានអន្តរាគមន៍របស់ពួកគេ។ ទន្ទឹមនឹងនេះ មជ្ឈមណ្ឌលហ្វីលីពីនសម្រាប់ការអភិវឌ្ឍក្រោយការប្រមូលផល និងគ្រឿងចក្រកសិម្ម បានបដិសេធការចោទប្រកាន់ថា ការពិគ្រោះយោបល់របស់ខ្លួនជាមួយអ្នកទទួលផលពីកសិករ គឺជាមុខសញ្ញា។
ជារៀងរាល់ឆ្នាំ មជ្ឈមណ្ឌលហ្វីលីពីនសម្រាប់ការអភិវឌ្ឍក្រោយការប្រមូលផល និងគ្រឿងយន្ត គ្រប់គ្រងថវិកាប្រមាណ៥ ០០០លានប៉េសូ ឬស្មើ៨០លានដុល្លារ សម្រាប់គ្រឿងចក្រ និងគ្រឿងចក្រកសិកម្ម ក្រោយការប្រមូលផល ក្រោមមូលនិធិពង្រឹងភាពប្រកួតប្រជែងអង្ករក្នុងរយៈពេលប្រាំមួយឆ្នាំចុងក្រោយនេះ។
ចំណែកសេចក្តីប្រកាសព័ត៌មានបានឱ្យដឹងថា លទ្ធកម្មទាំងអស់ត្រូវឆ្លងកាត់ការដេញថ្លៃជាសាធារណៈប្រកបដោយការប្រកួតប្រជែង ស្របតាមច្បាប់ស្តីពីលទ្ធកម្មរបស់រដ្ឋាភិបាល និងវិធានសវនកម្ម ដោយមានការជូនដំណឹងអំពីការដេញថ្លៃ និងលទ្ធផលត្រូវបានបិទផ្សាយនៅលើប្រព័ន្ធផ្សព្វផ្សាយផ្លូវការ។
មជ្ឈមណ្ឌលហ្វីលីពីនសម្រាប់ការអភិវឌ្ឍក្រោយការប្រមូលផល និងគ្រឿងចក្រកសិកម្ម បានបន្ថែមថា ខ្លួនបានទទួលឧបករណ៍ពីអ្នកផ្គត់ផ្គង់ ដែលមានលក្ខណៈសម្បត្តិគ្រប់គ្រាន់ជាច្រើន រួមមានត្រាក់ទ័រ ម៉ាស៊ីនច្រូតស្រូវ និងបច្ចេកវិទ្យាគ្រឿងចក្រកសិម្មផ្សេងទៀត។
លើសពីនេះទៅទៀត ការជ្រើសរើសអ្នកទទួលផលចំណេញនៅក្នុងរចនាសម្ព័ន្ធ និងការពិគ្រោះយោបល់ដោយផ្ទាល់ ក៏ត្រូវបានធ្វើឡើងផងដែរ ដើម្បីធានាបាននូវគុណភាព និងភាពសមស្របរវាងតម្រូវការផលិតកម្មរបស់កសិករ ស្ថានភាពដីជាក់ស្តែង និងសមត្ថភាពប្រតិបត្តិការក្នុងលក្ខខណ្ឌកសិកម្មចម្រុះ៕
