ហាណូយ ៖ ប្រទេសវៀតណាម នៅដើមឆ្នាំ២០២៦នេះ បានជាប់ចំណាត់ថ្នាក់លេខរៀងទី៤ នៅលើពិភពលោក សម្រាប់តម្រូវការសាច់ជ្រូកក្នុងចំណោមប្រជាជនវៀតណាម យកទៅធ្វើជាម្ហូបអាហារប្រចាំថ្ងៃ ដែលប្រជាជនវៀតណាមម្នាក់បរិភោគសាច់ជ្រូកកាន់តែច្រើនឡើងៗ ក្នុងរយៈពេលបីឆ្នាំជាប់ៗគ្នា។
យោងតាមសន្ទស្សន៍តម្លៃអ្នកប្រើប្រាស់របស់ប្រទេសវៀតណាម បានឱ្យដឹងថា តម្រូវការសាច់ជ្រូករបស់ពលរដ្ឋវៀតណាមបានកើនឡើងជាបន្តបន្ទាប់រៀងរាល់ឆ្នាំ ដែលជាមធ្យមក្នុងមនុស្សម្នាក់បរិភោគសាច់ជ្រូលរហូតដល់៣០គីឡូក្រាម ក្នុងឆ្នាំ២០២១ និងកើនដល់៣៧គីឡូក្រាម ក្នុងឆ្នាំ២០២៤ និងកើនដល់៣៩គីឡូក្រាម ក្នុងឆ្នាំ២០២៥។
ចំណែករបាយការណ៍ចេញថ្មីរបស់ក្រសួងឧស្សាហកម្ម និងពាណិជ្ជកម្មវៀតណាម បានឱ្យដឹងថា បច្ចុប្បន្ន បរិមាណសាច់ជ្រូកនៅក្នុងប្រទេសវៀតណាមស្មើនឹង៦៣ភាគរយ ក្នុងចំណោមផលិតផលសាច់សត្វសរុប ដែលប្រជាជនវៀតណាមបរិភោគ។ ប្រការនេះ បានធ្វើឱ្យប្រទេសវៀតណាម ជាប់ចំណាត់ថ្នាក់លេខរៀងទី៤ នៅលើពិភពលោក និងនាំមុខគេក្នុងតំបន់អាស៊ីអាគ្នេយ៍ ខាងយកសាច់ជ្រូកធ្វើជាអាហារ។
បើតាមប្រភពដដែល នៅក្នុងអំឡុងពេលបុណ្យចូលឆ្នាំថ្មីប្រពៃណីវៀតណាម ត្រូវបានគេរំពឹងថា តម្រូវការសាច់ជ្រូកបានកើនឡើងប្រហែលពី១០ ទៅ១៥ ភាគរយ។
ទាក់ទិននឹងបញ្ហានេះ ក្រសួងកសិកម្ម និងបរិស្ថានវៀតណាម បានឱ្យដឹងថា វិស័យចិញ្ចឹមសត្វនៅក្នុងប្រទេសវៀតណាម ក្នុងរយៈពេលប៉ុន្មានឆ្នាំកន្លងមកនេះ មានអត្រាកំណើនដ៏រឹងមាំ និងអាចផលិតសាច់សរុប៨,៦លានតោន ក្នុងនោះសាច់ជ្រូកមានចំនួន៥,៤លានតោន ដែលគ្រប់គ្រាន់សម្រាប់បំពេញតម្រូវការក្នុងអំឡុងពេលបុណ្យចូលឆ្នាំថ្មី។
លោក ផាម គឹមសាង (Pham Kim Dang) អនុប្រធាននាយកដ្ឋានបសុព្យាបាល និងផលិតកម្មសត្វ នៃក្រសួងកសិកម្ម និងបរិស្ថានវៀតណាម បានឲ្យដឹងដែរថា ក្តីបារម្ភបានកើតមានឡើងអំពីហានិភ័យចំពោះការខ្វះខាតសាច់ជ្រូក ដោយសារគ្រោះមហន្តរាយធម្មជាតិ និងការផ្ទុះជំងឺប៉េសជ្រូកអាហ្វ្រិក។ ប៉ុន្តែ សព្វថ្ងៃនៅទូទាំងវៀតណាមប្រទេសប្រមាណ៣១,៤លានក្បាល សម្រាប់ផ្គត់ផ្គង់គ្រប់គ្រាន់ក្នុងអំឡុងពេលពិធីបុណ្យចូលឆ្នាំថ្មី។
តម្លៃសត្វជ្រូករស់នៅក្នុងប្រទេសវៀតណាម បច្ចុប្បន្នស្ថិតនៅចន្លោះពី៧១ ០០០ ទៅ៧៤ ០០០ដុង ឬស្មើនឹង២,៧៣ ទៅ២,៨៥ដុល្លារ ក្នុងមួយគីឡូក្រាម បើធៀបនឹងខែមករាកន្លងមកនេះ មានការថយចុះបន្តិច ពោលគឺមានតម្លៃ៨១ ០០០ដុង ឬស្នើនឹង៣,១២ដុល្លារ ក្នុងមួយគីឡូក្រាម។ ទោះជាយ៉ាងណា អ្នកជំនាញនិយាយថា តម្លៃនេះ នៅតែស្ថិតក្នុងកម្រិតខ្ពស់ដដែល។
ការប្រែប្រួលតម្លៃខាងលើនេះ ប្រធានសមាគមអ្នកចិញ្ចឹមសត្វវៀតណាម បានពន្យល់ថា បណ្តាលមកពីការធ្វើពាណិជ្ជកម្មប្រថុយប្រថាន និងចិត្តសាស្ត្រទីផ្សាររបស់ពាណិជ្ជករតូចតាច។ មួយវិញទៀត ដោយសារសាច់ជ្រូកជាចំណែកធំក្នុងការចំណាយប្រចាំគ្រួសារ។ ដូច្នេះ ការកើនឡើងតម្លៃខ្លាំងពេកអាចប៉ះពាល់ដល់ជីវភាពរស់នៅរបស់ប្រជាជនវៀតណាម ហើយក៏អាចបង្កើតសម្ពាធបន្ថែមលើសន្ទស្សន៍តម្លៃអ្នកប្រើប្រាស់ផងដែរ។
យោងតាមទិន្នន័យកាលពីពេលថ្មីៗនេះ បង្ហាញថា ក្នុងប្រទេសក្នុងសហគមន័អាស៊ាន ប្រទេសវៀតណាម និងប្រទេសហ្វីលីពីន បានឈានមុខគេក្នុងការប្រើប្រាស់សាច់ជ្រូកធ្វើជាអាហារប្រចាំថ្ងៃ។ ក្នុងនោះ ប្រទេសវៀតណាមបានឈរនៅលំដាប់លេខរៀងទី១ ដោយគិតជាមធ្យមក្នុងមនុស្សម្នាក់បរិភោគសាច់ជ្រូកអស់៣៨គីឡូក្រាម ក្នុងមួយឆ្នាំ។
ដោយឡែក បើគិតពីតំបន់អាស៊ីបូព៌ា និងអឺរ៉ុប ដែលប្រើប្រាស់សាច់ជ្រូកច្រើនជាគេវិញ គឺប្រទេសវៀតណាមស្ថិតនៅក្នុងលំដាប់លេខរៀងទី៥ បន្ទាប់ពីប្រទេសក្រូអាត អេស្ប៉ាញ ម៉ុងតេណេហ្គ្រោ និងប្រទេសប៉ូឡូញ៕
