ដោយ នៅ ស៊ីវុត្ថា
ភ្នំពេញ៖ បន្ទាប់ពីទទួលបានជោគជ័យនៃការដាំបន្លែ និងប្រមូលផលរួចរាល់កាលពីខែមុន ថ្នាក់ដឹកនាំ និងសិស្សានុសិស្ស នៃសាលាបឋមសិក្សាភ្នំពេញថ្មី ស្ថិតនៅក្នុងខណ្ឌសែនសុខ រាជធានីភ្នំពេញ បាននាំគ្នាដាំបន្លែបន្ថែមទៀត ដើម្បីលើកស្ទួយផលិតផលកសិកម្មនៅក្នុងស្រុក និងផ្ដល់ជូនវីរៈកងទ័ព និងជនភៀសសឹក។
ការដាំបន្លែនេះ ក្រោមការជួយជ្រោមជ្រែងពីឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ លោក ចេង មុន្នីរ៉ា អភិបាលនៃគណៈអភិបាលខណ្ឌសែនសុខ អភិបាលរង ការិយាល័យចំណុះរដ្ឋបាលខណ្ឌ គណៈគ្រប់គ្រងសាលាលោកគ្រូ-អ្នកគ្រូ និងក្មួយៗសិស្សានុសិស្សនៃសាលាបឋមសិក្សាភ្នំពេញថ្មី។
លោក ឆិល សុវណ្ណារិទ្ធ នាយកសាលបឋមសិក្សាភ្នំពេញថ្មី នៅថ្ងៃទី១២ ខែកុម្ភៈ ឆ្នាំ២០២៦ បានប្រាប់ទូរទស្សន៍ ARDB ថា កាលពីថ្ងៃទី១៨ ខែមករា ឆ្នាំ២០២៦ សាលាបានប្រមូលផលបន្លែម្តងរួចហើយ ដោយទទួលបានផលសរុប៦៤២គីឡូក្រាម។ ក្រោយប្រមូលផល ក្រុមការងារបានដឹកយកទៅជូនដល់វីរៈកងទ័ព និងជនភៀសសឹក ដែលស្ថិតនៅសមរភូមិជួរមុខ។
លោកបន្តថា ដោយឡែក នៅថ្ងៃទី៧ ខែកុម្ភៈ ឆ្នាំ២០២៦ សាលាបានរៀបចំពិធីដាំបន្លែឡើងវិញ ប្រមាណ ៥៦រង ដែលភាគច្រើនជាប្រភេទបន្លែត្រប់ ដែលបន្លែប្រភេទនេះអាចនឹងត្រូវចំណាយពេលយូររហូតដល់៧០ថ្ងៃ ទើបអាចទទួលបានផល។ ក្រៅពីនេះ មានបន្លែខាត់ណាដើម និងខាត់ណាផ្កា។
បើតាមលោក ឆិល សុវណ្ណារិទ្ធ ចំពោះការដាំបន្លែទាំងនេះទទួលបានបច្ចេកទេស និងពូជពីមន្ទីរកសិកម្ម រុក្ខាប្រមាញ់ និងនេសាទ រាជធានីភ្នំពេញ និងការជួយជ្រោមជ្រែងពីលោក ចេង មុន្នីរ៉ា អភិបាលនៃគណៈអភិបាលខណ្ឌសែនសុខ។
ចំពោះការថែទាំវិញ លោកនាយកសាលារូបនេះបញ្ជាក់ថា លោកបានរៀបចំឱ្យសិស្សានុសិស្សពីថ្នាក់ទី៤ ដល់ថ្នាក់ទី៦ ចូលរួមស្រោចទឹក និងដាក់ជីធម្មជាតិ ដោយមិនប្រើជីគីមីនោះទេ។ ទោះបីយ៉ាងនេះក្តី លោកថា សិស្សានុសិស្សរបស់លោកបានអនុវត្តជាប្រចាំរួចហើយ ចំពោះការដាំបន្លែនេះ ប៉ុន្តែមិនទាន់ជាផុលផុសដូចលើកនេះនោះទេ។
លោកសង្កត់ធ្ងន់ទៀតថា ការផុលផុសក្នុងការដាំបន្លែនេះ បន្ទាប់ពីលោកជំទាវ បណ្ឌិត ពេជ ចន្ទមុនី ហ៊ុនម៉ាណែត បានបំផុសយកទីតាំងសាលារៀនរបស់លោកធ្វើជាចំណុចចាប់ផ្តើមអនុវត្តនៃការដំាបន្លែ ដើម្បីចែកជូនដល់វីរៈកងទ័ព និងជនភៀសសឹកនៅជួរមុខ។
លើសពីនេះ លោកថា ការដំាបន្លែនេះ ក៏បានរួមចំណែកដល់ការយល់ដឹងពីបំណិនជីវិត ពាក់ព័ន្ធនឹងវិស័យកសិកម្មដល់សិស្សានុសិស្សផងដែរ ពីព្រោះសិស្សានុស្សភាគច្រើននៅក្នុងរាជធានីភ្នំពេញមិនបានយល់ដឹងស៊ីជម្រៅនោះទេ។ ប្រការនេះ នៅពេលពួកគេបានអនុវត្តជាក់ស្តែងនៅសាលារៀន ពួកគេនឹងអាចយកបទពិសោធន៍ទៅដាំនៅផ្ទះរបស់ពួកគេ បើសិនជាមានដី ឬកន្លែងដំាដុះ ដើម្បីលើកស្ទួយវិស័យកសិកម្មក្នុងស្រុក។
ជាមួយគ្នានេះ លោកនាយកសាលារូបនេះ ក៏បានអំពាវនាវដល់បណ្តាសាលារៀននានានៅទូទាំងប្រទេស បើសិនជាមានទីធ្លាធំទូលាយ ក៏គួរតែរៀបចំឱ្យមានសួនដាំបន្លែ ដើម្បីឱ្យសិស្សានុសិស្សបានអនុវត្តជាក់ស្តែងលើការដាំបន្លែទាំងនេះ។
គួររំលឹកថា កាលពីពេលថ្មីៗនេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានដាក់ចេញកម្មវិធី “យើងរួមគ្នាដើម្បីជាតិ” នៅសាលាបឋមសិក្សាភ្នំពេញថ្មី ខណ្ឌសែនសុខ រាជធានីភ្នំពេញ ដោយចាប់ផ្តើមដាំបន្លែនៅតាមផ្ទះ និងសហគមន៍ ដើម្បីប្រមូលផលជូនវីរៈកងទ័ពជួរមុខ និងជួយដល់បងប្អូនយើង ដែលកំពុងភៀសសឹក។
ក្នុងពិធីបើកចលនា “យើងរួមគ្នាដើម្បីជាតិ” លោកជំទាវបណ្ឌិតបានមានប្រសាសន៍ថា “ដើម្បីបង្កើនទឹកចិត្ត និងកម្លាំងខ្មែរជួយខ្មែរ លោកជំទាវបានរៀបចំឱ្យសាខារបស់កាយឫទ្ធិនារីកម្ពុជាទាំងអស់ បំផុសបំផុលសមាជិកសកម្មធ្វើការចាប់ផ្តើមដាំបន្លែ នៅតាមសាលារៀនរបស់ខ្លួន ឬនៅដីរបស់សហគមន៍ ទុកសម្រាប់ផ្គត់ផ្គង់ និងជួយគាំទ្រដល់ជនភៀសសឹកបានមួយចំនួន”៕
