អូតាវ៉ា៖ ប្រទេសចិន បានសម្រេចលុបចោលបម្រាមនាំចូលសាច់គោរបស់កាណាដា ដែលត្រូវបានហាមឃាត់អស់រយៈពេលមួយឆ្នាំកន្លងមកហើយ ដោយមន្ត្រីឧស្សាហកម្មសាច់គោសង្ឃឹមថា នឹងរួមចំណែកដល់កំណើនរបស់វិស័យនេះ និងគាំទ្រដល់ការធ្វើពិពិធកម្មទីផ្សារនាពេលអនាគត។
រដ្ឋមន្ត្រីក្រសួងកសិកម្មកាដាណា លោក ហៀត ម៉ាដូណាល់ (Heath MacDonald) បានមានប្រសាសន៍ថា ប្រកាសដកបម្រាមនេះ បានកើតឡើងកាលពីដើមសប្តាហ៍មុន បន្ទាប់ពីលោកបានធ្វើដំណើរទៅកាន់ទីក្រុងប៉េកាំង កាលពីពេលថ្មីៗកន្លងមកនេះ ដោយបន្ថែមថា លោកបានដឹងពីក្រុមហ៊ុនកាណាដា ដែលគ្រោងដឹកជញ្ជូនសាច់គោទៅកាន់ប្រទេសចិន នៅសប្តាហ៍ក្រោយ។
ចំណែកលោក ដេនីស ឡេក្រាហ្វ (Dennis Laycraft) អនុប្រធានប្រតិបត្តិនៃសមាគមចិញ្ចឹកគោកាណាដា បានមានប្រសាសន៍ថា ការដកចេញនូវបម្រាមនេះ គឺជាពេលវេលាដ៏វែងឆ្ងាយ ដែលអ្នកផលិត និងអ្នកកែច្នៃសាច់គោ កំពុងខ្នះខ្នែងវិលត្រលប់ចូលទៅក្នុងទីផ្សារប្រទេសចិនឡើងវិញ។
លោកបានមានប្រសាសន៍បន្ថែមថា ឥឡូវនេះយើងមានសិទ្ធិចូលទីផ្សារចិនម្តងទៀត យើងទន្ទឹងរង់ចាំមើលការលក់របស់យើងកើនឡើងដូចមុនការផ្អាកនាំចូល។
ប្រទេសចិន បានបិទការនាំចូលសាច់គោពីរោងចក្រកែច្នៃរបស់កាណាដា ចាប់តាំងពីខែធ្នូ ឆ្នាំ២០២១មកម្លេះ បន្ទាប់ពីមានករណីផ្ទុះជំងឺរលាកខួរក្បាលគោ (Bovine Spongiform Encephalopathy) នៅក្នុងកសិដ្ឋានចិញ្ចឹមគោមួយកន្លែងនៅក្នុងខេត្តអាល់ប៊ើតា (Alberta) ភាគខាងលិចកាណាដា។ ព្រមជាមួយគ្នានោះ ប្រទេសកូរ៉េខាងត្បូង និងហ្វីលីពីន ក៏បានហាមឃាត់ដូចគ្នានេះផងដែរ ប៉ុន្តែពីរខែក្រោយមកបានលុបបម្រាមនោះទៅវិញ។ ចំណែកប្រទេសចិន ដែលនៅឆ្នាំ២០២១ គឺជាទីផ្សារនាំចេញសាច់គោធំជាងគេទីបួនរបស់កាណាដា នៅតែរក្សាការហាមឃាត់រហូតមកដល់ពេលនេះ។
ការលុបចោលការហាមឃាត់នាំចូលសាច់គោនេះ ធ្វើឡើងបន្ទាប់ពីនាយករដ្ឋមន្ត្រីកាណាដា លោក ម៉ាក ខានី (Mark Carney) ឯកភាពគ្នាលើកិច្ចព្រមព្រៀងពាណិជ្ជកម្មជាមួយប្រទេសចិន ដោយអនុញ្ញាតឱ្យរថយន្តអគ្គិសនីផលិតដោយប្រទេសចិន អាចចូលទៅលក់ក្នុងប្រទេសកាណាដា ជាថ្នូរនឹងការមិនយកពន្ធនាំចូលលើផលិតផលកសិកម្មរបស់កាណាដា មានដូចជាគ្រាប់កាណូឡាជាដើម។
ខណៈពេលការនាំចេញសាច់គោ មិនត្រូវបានបញ្ជាក់នៅក្នុងកិច្ចព្រមព្រៀងនេះ អ្នកជំនាញមួយរូប បាននិយាយថា ការធ្វើឱ្យប្រសើរឡើងនូវទំនាក់ទំនងនយោបាយ និងសេដ្ឋកិច្ចរវាងប្រទេសទាំងពីរ អាចមានផលជាវិជ្ជមានសម្រាប់ឧស្សាហកម្មផ្សេងទៀត។
លោក ហ្គោដុន ហូលដិន (Gordon Houlden) នាយកវិទ្យាស្ថានចិននៅសាកលវិទ្យាល័យ អាល់ប៊ើតា បាននិយាយថា អ្នកផលិតសាច់គោកាណាដា គួរតែសាទររឿងនេះ។
លោកបានបន្ថែមថា ប្រសិនបើយើងអាចប្រើប្រាស់ទំនាក់ទំនងនយោបាយ ដើម្បីជួយដល់ឧស្សាហកម្មសាច់គោនោះ គឺជារឿងល្អ។ ទោះបីជាការហាមឃាត់នេះប៉ះពាល់ដល់ឧស្សាហកម្មនៅក្នុងប្រទេសកាណាដាក៏ដោយ ក៏លោក ដេនីស ឡេក្រាហ្វ បានលើកឡើងថា វាក៏ផ្តល់ឱកាសសម្រាប់អ្នកផលិតក្នុងការពិនិត្យមើលទីផ្សារនៅកន្លែងផ្សេងទៀតផងដែរ។ លោកបានចង្អុលបង្ហាញពីទំនាក់ទំនងកាន់តែរឹងមាំជាមួយប្រទេសជប៉ុន កូរ៉េខាងត្បូង តៃវ៉ាន់ ម៉ិកស៊ិក និងសហរដ្ឋអាមេរិក ជារបៀបដែលទីផ្សារសាច់គោ បានធ្វើពិពិធកម្មចាប់តាំងពីការហាមឃាត់។ សហរដ្ឋអាមេរិក នៅតែជាអ្នកនាំចូលដ៏ធំបំផុត និងសំខាន់បំផុតរបស់ឧស្សាហកម្មសាច់គោកាណាដា។
លោកបានឱ្យដឹងកាលពីឆ្នាំមុនថា ប្រទេសកាណាដាបាននាំចេញសាច់គោ និងគោរស់ ដែលមានតម្លៃជាទឹកប្រាក់ចំនួន៧ ០០០លានដុល្លារ ដោយក្នុងនោះ៦ ០០០លានដុល្លារ កំពុងឆ្ពោះនាំចេញទៅភាគខាងត្បូងនៃព្រំដែនកាណាដា។
លោកបានឱ្យដឹងថា ប្រទេសចិនបានលុបចោលបម្រាមនាំចូល មានន័យថា ឧស្សាហកម្មសាច់គោអាចបន្តពង្រីកទីផ្សាររបស់ខ្លួន ទៅរកដៃគូខាងក្រៅបាន។
លោកបានមានប្រសាសន៍ថា ជាការពិត គោលដៅរបស់យើង គឺធ្វើពិពិធកម្មលើសពីទីផ្សារសហរដ្ឋអាមេរិក មិនមែនជំនួសឱ្យសហរដ្ឋអាមេរិកទេ។ ការធ្វើពិពិធកម្មនេះ គឺជាការធ្វើពិពិធកម្មអាចជួយរក្សាតម្លៃឱ្យមានស្ថិរភាពផងដែរ សម្រាប់ទាំងអ្នកផលិត និងអ្នកប្រើប្រាស់។ ស្របពេលលោកមិនរំពឹងថា តម្លៃសាច់គោនឹងធ្លាក់ចុះក្នុងពេលឆាប់ៗនេះទេ ប៉ុន្តែវានឹងឡើងថ្លៃខ្លាំងទៅវិញ។
ទោះបីជាការលុបចោលសម្រាមនេះ គឺជាសារលើកទឹកចិត្តក៏ដោយ វាមិនមានន័យថា សាច់គោកាណាដានឹងអាចនាំចូលទីផ្សារចិនបានភ្លាមៗនោះទេ។ កាលពីឆ្នាំមុន ក្នុងវិធានការការពារឧស្សាហកម្មគោក្នុងស្រុករបស់ខ្លួន ប្រទេសចិន បានអនុវត្តពន្ធ៥៥ភាគរយលើការនាំចូលសាច់គោ ដែលលើសកូតាបានកំណត់ទុកជាមុន។ មានកូតាជាក់លាក់ សម្រាប់អ្នកផ្គត់ផ្គង់ធំៗរបស់ប្រទេសចិន ដូចជាប្រេស៊ីល និងអាហ្សង់ទីន រួមជាមួយនឹងកូតាទូទៅសម្រាប់ប្រទេស ដែលមិនមែនជាអ្នកនាំចេញធំក៏ដោយ។
នៅឆ្នាំ២០២៦ កូតាសម្រាប់ប្រទេសកាណាដា ឬតំបន់នាំសាច់គោចេញ ផ្សេងទៀតចូលទៅកាន់ទីផ្សារចិន មានប្រហែល១៥៦ ០០០តោនប៉ុណ្ណោះ។
លោក ដេនីស ឡេក្រាហ្វ អនុប្រធានប្រតិបត្តិនៃសមាគមចិញ្ចឹកគោកាណាដា បានឱ្យដឹងបន្ថែមទៀតថា ដោយសារតែការហាមឃាត់នេះ ប្រទេសកាណាដា មិនត្រូវបានកំណត់កូតាជាក់លាក់ទេ តែផ្ទុយទៅវិញ នឹងត្រូវប្រកួតប្រជែងដើម្បីនាំចេញផលិតផលសាច់គោករបស់ខ្លួនក្រោមកូតាទូទៅ។ តម្លៃសាច់គោលំដាប់ខ្ពស់ ត្រូវបានគេរំពឹងថា នឹងបន្តកើនឡើងនៅឆ្នាំ២០២៦នេះ៕
