ភ្នំពេញ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារ អភិវឌ្ឍន៍ជនបទ និងកសិកម្ម (ARDB)និងឯកឧត្តមបណ្ឌិត អោម សេងបូរ៉ា ស្ថាបនិកវិទ្យាស្ថានស៊ីអីអូ នារសៀលថ្ងៃទី១៣ ខែមករា ឆ្នាំ២០២៦នេះ បានសហការរៀបចំវេទិកាជួបជុំសហគ្រិនកសិកម្មដាំដុះ និងចិញ្ចឹមសត្វ ឆ្នាំ២០២៦ ដែលរៀបចំឡើងនៅទីស្នាក់ការកណ្តាលធនាគារ ARDB ស្ថិតនៅសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
វេទិកានេះមានការចូលរួមពីថ្នាក់ដឹកនាំធនាគារ ARDB តំណាងសមាគមបណ្តាញកសិករតេជោ ព្រមទាំងសមាជិក សមាជិកា ជាសហគ្រិនវ័យក្មេងជាច្រើននាក់ផងដែរ សរុបជាង១០០នាក់។ ក្នុងឱកាសនេះ ឯកឧត្តមបណ្ឌិត កៅ ថាច បានថ្លែងកោតសរសើរ និងវាយតម្លៃខ្ពស់ដល់ក្រុមការងារសមាគមបណ្តាញកសិករតេជោ, វិទ្យាស្ថានស៊ីអ៊ីអូ និងបុគ្គលិកធនាគារអភិវឌ្ឍន៍ជនបទ និងកសិកម្ម ដែលបានខិតខំរៀចំវេទិកានេះឡើង ដើម្បីផ្តល់ឱកាសសម្រាប់កិច្ចពិភាក្សាពីលទ្ធភាពទទួលបានហិរញ្ញប្បទានពិសេសគាំទ្រវិស័យកសិកម្ម។
ឯកឧត្តមបណ្ឌិតប្រតិភូបានថ្លែងថា ក្រោមការដឹកនាំដ៏ឈ្លាសវៃ ប៉ិនប្រសប់ ម៉ឺងម៉ាត់ និងប្រាកដនិយមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលជាអគ្គមគ្គុទេសក៍វ័យក្មេងដ៏ឆ្នើម និងពោរពេញដោយសមត្ថភាពចំណេះដឹង និងថាមពល រាជរដ្ឋាភិបាលកម្ពុជាបានដាក់ចេញនូវក្របខណ្ឌយុទ្ធសាស្ត្របញ្ចកោណដំណាក់កាលទី១ ដែលធ្វើឱ្យកំណើនសេដ្ឋកិច្ចកម្ពុជាងើបឡើងវិញយ៉ាងឆាប់រហ័ស ក្នុងអត្រាប្រមាណប្រាំមួយភាគរយ នៅឆ្នាំ២០២៤ ជាកំណើនមួយខ្ពស់ បើធៀបនឹងកំណើនមធ្យមក្នុងតំបន់ ៥,២ភាគរយ នៅឆ្នាំ២០២៥។
ទន្ទឹមគ្នានេះដែរ គោលនយោបាយនានារបស់រាជរដ្ឋាភិបាលគាំទ្រទៅលើវិស័យកសិកម្មនេះ ស្របពេលសេដ្ឋកិច្ចសកលមានភាពមិនប្រាកដប្រជា និងសេដ្ឋកិច្ចកម្ពុជាកំពុងងើបឡើងវិញ និងបានបង្ហាញឱ្យឃើញអំពីសារៈសំខាន់ នៃវិស័យសហគ្រិនភាពដើរតួជាកម្លាំងចលករមួយ ក្នុងការជំរុញកំណើនសេដ្ឋកិច្ចជាតិ តាមរយៈការអភិវឌ្ឍន៍ផ្នែកសង្គម សេដ្ឋកិច្ច,ការបង្កើតឱកាសការងារថ្មី, និងការជះឥទ្ធិពល វិជ្ជមានដល់ផលិតផលក្នុងស្រុករបស់ប្រទេសកម្ពុជា។
ឯកឧត្តមបណ្ឌិត កៅ ថាច បានមានប្រសាសន៍បន្ថែមថា គោលនយោបាយរាជរដ្ឋាភិបាលក្នុងការគាំទ្រវិស័យកសិកម្ម ក៏ដូចជាបច្ចុប្បន្នភាពក្នុងការឆ្លើយតបទៅនឹងបរិបទក្រោយសង្គ្រាមឈ្លានពានពីប្រទេសថៃ។
ក្នុងឱកាសដ៏មានសារៈសំខាន់នេះ ឯកឧត្តមបណ្ឌិតប្រតិភូបានផ្តល់ជាអនុសាសន៍មួយចំនួនសម្រាប់សហគ្រិន ដូចខាងក្រោម៖
ទី ១- សមាគមបណ្តាញកសិករតេជោ, វិទ្យាស្ថានស៊ីអ៊ីអូ, និងធនាគារអភិវឌ្ឍន៍ជនបទ និងកសិកម្ម សូមធ្វើការរួមគ្នាសំដៅចូលរួមជាមួយរាជរដ្ឋាភិបាលក្នុងការជំរុញផលិតកម្មកសិកម្ម តាមរយៈបង្កើនការដាំដុះ ចិញ្ចឹមសត្វ ដោយអនុញ្ញាតឱ្យមានការចូលរួមកម្លាំងពលកម្មពីប្រជាជនតាមជនបទ ជាពិសេសជនភៀសសឹកនៅតាមតំបន់ព្រំដែន ដូចជាធនាគារអភិវឌ្ឍន៍ជនបទ និងកសិកម្ម អាចសិក្សាកញ្ចប់ហិរញ្ញប្បទានពិសេស (Special Scheme) សម្រាប់ជំរុញការដាំដុះបន្លែ និងការចិញ្ចឹមសត្វនៅតាមតំបន់ព្រំដែន, សមាគមបណ្តាញកសិករតជោអាចផ្តល់ជាជំនួយបច្ចេកទេស និងការតភ្ជាប់ទីផ្សារ,វិទ្យាស្ថានស៊ីអ៊ីអូ អាចផ្តល់វគ្គបណ្តុះបណ្តាលអំពីការគ្រប់គ្រងអាជីវកម្ម ឬការគ្រប់គ្រងហិរញ្ញវត្ថុជាដើម។
ទី២- វិទ្យាស្ថានស៊ីអ៊ីអូ គួរពិនិត្យលទ្ធភាពជាមួយសមាគមបណ្តាញកសិករតេជោ ក្នុងការផ្តល់វគ្គបណ្តុះបណ្តាលជំនាញ ជូនសមាជិកសមាគមបណ្តាញកសិករតេជោ ដូចជាជំនាញភាពជាអ្នកដឹកនាំ, ជំនាញទំនាក់ទំនង, និងជំនាញគ្រប់គ្រង ជាដើម។
ចំណែកធនាគារអភិវឌ្ឍន៍ជនបទ និងកសិកម្ម អាចពិនិត្យមើលលទ្ធភាពរៀបចំយន្តការ និងក្រមខណ្ឌការងាររួមមួយ ដើម្បីអនុវត្តកិច្ចការងារនេះ។
ចំណុចចុងក្រោយ បន្តឈរលើស្មារតីខ្មែរតែមួយ ដោយចូលរួមជាមួយរាជរដ្ឋាភិបាល ពង្រឹងសាមគ្គីភាព បង្កើនស្មារតីទទួលខុសត្រូវរួម និងរួមកម្លាំងជាធ្លុងមួយសម្រាប់ការស្តារ នឹងជំរុញការអភិវឌ្ឍប្រទេសកម្ពុជានៃយើងទាំងអស់គ្នា៕
