ភ្នំពេញ៖ យោងតាមសហព័ន្ធស្រូវអង្ករកម្ពុជាបានបញ្ជាក់ថា សម្រាប់បងប្អូនប្រជាកសិករទាំងអស់ដែលមានចំណាប់អារម្មណ៍ក្នុងការលក់ស្រូវ សូមមេត្តាទំនាក់ទនងទៅកាន់រោងម៉ាស៊ីនកិនស្រូវដែលស្ថិតនៅជិតបំផុតនៃមូលដ្ឋានរបស់ខ្លួន តាមលេខទំនាក់ទំនងដែលមាននៅក្នុងបញ្ជីដូចខាងក្រោម ក្នុងនោះមានរោងម៉ាស៊ីនកិនស្រូវចំនួន ១៤០ កំពុងតែត្រៀមទិញស្រូវផ្ការំដួលផងដែរ។
មន្រ្តីជាន់ខ្ពស់ក្រសួងកសិកម្មបានលើកឡើងថា ឥឡូវនេះយើងមានរោងម៉ាស៊ីនចំនួន 140 ដែលជាសមាជិកសហព័ន្ធស្រូវអង្ករ CRF កំពុងប្រមូលទិញស្រូវនៅទូទាំងប្រទេស ហើយក្នុងនាមក្រសួងកសិកម្មរុក្ខាប្រមាញ់និងនេសាទសូមអរគុណដល់សហព័ន្ធស្រូវអង្ករកម្ពុជាក្នុងការផ្តល់បញ្ជីឈ្មោះរោងម៉ាស៊ីនទាំងអស់នេះ។
មន្រ្តីខាងលើបន្ថែមថា ចូលមកដល់សប្តាហ៍ទី3 តម្លៃស្រូវនៅតែល្អជាពិសេសផ្ការំដួលកាន់តែល្អថែមទៀតការតាមដាននិងផ្សព្វផ្សាយតម្លៃស្រូវដោយមន្រ្តីកសិកម្មឃុំដែលជាផ្នែកមួយនៃសកម្មភាពដោះស្រាយបញ្ហាទីផ្សារនិងរក្សាស្ថិរភាពថ្លៃស្រូវជូនកសិករជាពិសេសស្រូវផ្ការំដួលពូជសុទ្ធ កម្មវិធីគោលនយោបាយអាទិភាពទី 5 និងទី 6។
សម្រាប់ លោកឧកញ៉ា ឡាយ ឈុនហូរ អគ្គនាយកក្រុមហ៊ុន City Rice Import &Export Co Ltd បានមានប្រសាសន៍ ក្រុមហ៊ុន City Rice នៅថ្មគោល ខេត្តបាត់ដំបង ក្នុងកិច្ចសហការជាមួយក្រសួងកសិកម្ម និងធនាគារ ARDB កំពុងសម្រុកប្រមូលទិញស្រូវផ្ការំដួលដែលសរុបមកដល់ពេលនេះបានប្រមាណ 30000 តោននៃផែនការ 50000 តោន។
លោកឧកញ៉ាបន្ថែមថា តម្លៃទិញនៅរោងម៉ាស៊ីនពេលនេះគឺ 1400 រៀលមួយគីឡូ ហើយអាចឡើងថែមទៀតអាស្រ័យលើគុណភាព។
តាមផែនការប្រចាំឆ្នាំ២០២៤នេះ ក្រុមហ៊ុនអេមរុរ៉ាយស៍របស់លោកកញ៉ា សុង សារ៉នវិញ កំពុងតែទិញស្រូវសរីរាង្គផ្ការំដួល និងស្រូវសរីរាង្គប្រពៃណីប្រភេទនាងអុក និងនាងអំ និងម្លិះក្រហម ពីសហគមន៍កសិកម្មចំនួន២៨ ដែលបានចុះកិច្ចសន្យា ជាមួយក្រុមហ៊ុននាពេលកន្លងទៅ ក្នុងបរិមាណប្រហែល២៥០០០តោន និងក្រុមហ៊ុន CACC ក៏បានចុះកិច្ចសន្យាលើដំឡូងមីសរីរាង្គ ជាមួយសហគមន៍កសិកម្មចំនួន ៩សហគមន៍ ដែលគិតជាចំនួនសមាជិកផលិតស្រូវសរុបនៃ៣៧សហគមន៍នេះ មានចំនួនប្រហែល៥០០០គ្រួសារ។
ក្រសួងកសិកម្ម រុក្ខាប្រមាញ់ និងនេសាទ បានអំពាវនាវឲ្យកសិករខ្មែរ ផ្លាស់ប្តូទម្លាប់ពីដាំពូជស្រូវ OM5451មកប្រើពូជ ផ្ការំដួល សែនក្រអូប០១ គឺជាពូជស្រូវស្រាល មិនប្រកាន់រដូវ ដែលបន្សុទ្ធនិងបញ្ចេញដោយវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (កាឌី) នៃក្រសួងកសិកម្ម រុក្ខាប្រមាញ់ និងនេសាទ នៅចុងឆ្នាំ២០១៩។
ក្រសួងកសិកម្ម រុក្ខាប្រមាញ់ និងនេសាទបានលើកទឹកចិត្តប្រជាកសិករឱ្យងាកមកដាំពូជស្រូវសែនក្រអូប០១ ស្រូវផ្ការំដួល ដោយសារពូជនេះ ផ្ដល់ទិន្នផលខ្ពស់ និងជាពិសេស វាមានតម្លៃខ្ពស់នៅលើទីផ្សារជាតិ និងអន្តរជាតិ។
