ភ្នំពេញ៖ វិទ្យាស្ថានជាតិកសិកម្ម ព្រែកលៀប និងអង្គការជាតិ អង្គការអន្តរជាតិប្រមាណ១០ស្ថាប័ន នៅថ្ងៃទី២៣ ខែកក្កដា ឆ្នាំ២០២៥នេះ បានរៀបចំកម្មវិធីយុវកសិករ និងកសិ-ឡាំពិកកម្ពុជា លើកទី១ ដោយផ្តោតលើប្រធានបទ ការពង្រឹងនិរន្តរភាពអភិវឌ្ឍន៍ជនបទ។
កម្មវិធីនេះ មានការអញ្ចើញចូលរួមជាកិត្តិយសពីលោកជំទាវ ចាន់ ផលលឿន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ, ឯកឧត្តមបណ្ឌិត ឈុន តូរី នាយកវិទ្យាស្ថានជាតិកសិកម្មព្រែកលៀប, លោក អាមីរុល អ៊ីស្លាម (AMIRUL ISLAM) តំណាងសមាគមកសិករអាស៊ីសម្រាប់ការអភិវឌ្ឍជនបទ ប្រកបដោយនិរន្តរភាព (AFA) លោកស្រី ប៊ី សុគន្ធា ប្រធានកម្មវិធីខ្សែច្រវាក់តម្លៃកសិកម្ម និងប្រព័ន្ធស្បៀង នៃសហភាពអឺរ៉ុបប្រចាំកម្ពុជា,លោក សួស ពិនរក្ស អ្នកជំនាញកម្មវិធី និងបរិស្ថាននៃមូលនិធិអន្តរជាតិ សម្រាប់អភិវឌ្ឍន៍កសិកម្ម (IFAD) លោកស្រី Rebekah Bell នាយិកា អង្គការស្បៀង និងកសិកម្មប្រចាំកម្ពុជា (FAO) រួមនិងតំណាងអង្គការដៃគូជាច្រើនទៀត។
លោកជំទាវ ចាន់ ផលលឿន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទមានប្រសាសន៍ថា កម្មវិធីនេះគឺជាព្រឹត្តិការណ៍មួយដ៏សំខាន់ បញ្ជាក់ពីការយកចិត្តទុកដាក់ ពីការទំនាក់ទំនងរបស់រាជរដ្ឋាភិបាល ក៏ដូចជាអង្គការយុវកសិករ និងនិស្សិត ដើម្បីផ្តល់ចំណេះដឹង ចែករំលែកបទពិសោធន៍ និងបច្ចេកទេសឱ្យគ្នាទៅវិញទៅមក។
រាជរដ្ឋាភិបាលកម្ពុជាអាណត្តិទី៧នេះបានបន្តយកសេដ្ឋកិច្ចកសិកម្ម ដើម្បីឆ្លើយតបទៅនិងបរិបទឧស្សាហកម្ម៤.០នេះ ដើម្បីបង្កើតនូវក្របខណ្ឌ គោលនយោបាយយុទ្ធសាស្ត្រដំណាក់កាលទី១ មុំទី៣នៃបញ្ញកោណទី៤ ស្តីពីការអភិវឌ្ឍប្រកបដោយចីរភាព និងបរិយាបន្ន ដើម្បីជំរុញសន្ទុះកំណើនសេដ្ឋកិច្ច និងលើកកម្ពស់សុខមាលភាពសង្គម ដែលមានការចូលរួមទាំងវិស័យសាធារណៈ សង្គមសេដ្ឋកិច្ច វិស័យឯកជន និងប្រជាជន។ ម្យ៉ាងវិញទៀត កសិកម្ម ក៏ដូចជាប្រជាពលរដ្ឋទូទៅបាននិងកំពុងអនុវត្តគោលដៅអភិវឌ្ឍន៍ប្រកបដោយចីរភាព។
កម្មវិធីថ្ងៃនេះ គឺជាឱកាសមួយ ដើម្បីចូលរួមផ្តល់នូវចំណេះដឹង និងជាមូលដ្ឋានបច្ចេកទេសក្នុងវិស័យកសិកម្ម និងមានការចែករំលែកនៅបទពិសោធន៍គ្រប់គ្រង ពីក្រុមជំនាញបច្ចេកទេសដោយផ្ទាល់ពីវិទ្យាស្ថានជាតិកសិកម្ម ព្រែកលៀប។ ដូច្នេះយុវកសិករអាចស្វែងយល់ពីលក្ខណៈបច្ចេកទេសផ្សារភ្ជាប់និងការអនុវត្តន៍ផ្ទាល់។
គួរជម្រាបជូនផងដែរថា វេទិការយុវកសិករ និងកសិ-ឡាំពិក គឺជាវេទិកាមួយ ដែលអាចនាំឱ្យមានការជួបជុំគ្នារវាងកសិករវ័យក្មេង ដែលជាអ្នកផលិត អ្នកនេសាទ អ្នកចិញ្ចឹមសត្វ និងអ្នកប្រើប្រាស់ផល-អនុផលព្រៃឈើមកពីតំបន់ផ្សេងៗ ដើម្បីលើកកម្ពស់ បំផុសគំនិត និងពង្រឹងការចូលរួមរបស់យុវកសិករនៅក្នុងវិស័យកសិកម្ម ប្រកបដោយនិរន្តរភាព។
ក្នុងឆ្នាំ២០២៥នេះ វេទិការយុវកសិករ និងកសិ-ឡាំពិកកម្ពុជា ជាលើកដំបូងក្នុងព្រះរាជាណាចក្រកម្ពុជា ត្រូវបានរៀបចំឡើងក្រោមការខិតខំប្រឹងប្រែងសម្រសម្រួលរបស់សមាគមកសិករអាស៊ីសម្រាប់ការអភិវឌ្ឍជនបទប្រកបដោយនិរន្តរភាព កិច្ចសហការរវាងសមាគមបណ្តាញកសិករ និងធម្មជាតិជាមួយអង្គការកសិករថ្នាក់ជាតិចំនួនប្រាំផ្សេងទៀត រួមនឹងកិច្ចសហការពីវិទ្យាស្ថានជាតិកសិកម្មព្រែកលៀប ដើម្បីផ្តល់ឱកាសដល់យុវកសិករដែលរស់នៅក្នុងតំបន់ផ្សេងៗគ្នាមានឱកាសជួបជុំ បង្កើតសាមគ្គីភាព កសាងបណ្តាញទំនាក់ទំនង ជាពិសេសគឺការទទួលបាននូវព័ត៌មាន និងធាតុចូលសំខាន់ៗ ដែលមានសារៈសំខាន់នៅក្នុងកិច្ចការងារវិស័យកសិកម្ម ដែលពួកគេកំពុងតែអាស្រ័យផងដែរ។
គោលបំណងនៃវេទិកាយុវកសិករ និងកសិ-ឡាំពិកកម្ពុជាលើកទី១ រៀបចំឡើងក្នុងគោលបំណង៖(១)ផ្តល់ឱកាសដល់យុវកសិករជាអ្នកផលិត អ្នកចិញ្ចឹមសត្វ អ្នកនេសាទ និងអ្នកប្រើប្រាស់ផល-អនុផលព្រៃឈើមកពីសហគមន៍ ឬក្រុមផលិតនានាក្នុងប្រទេសកម្ពុជា កសាងទំនាក់ទំនងសាមគ្គីភាព និងចែករំលែកនូវបទ ពិសោន៍ផ្ទាល់ខ្លួនរបស់ពួគគេទៅវិញទៅមក (២) លើកកម្ពស់ស្មារតី និងការយល់ដឹងជាទូទៅ ពិសេសសំរាប់យុវជនដែលធ្វើកសិកម្ម ភាគីពាក់ព័ន្ធនានា ដូចជាម្ចាស់មូលនិធិ ឬជំនួយជាតិ អន្តរជាតិ អ្នករៀបចំគោលនយោបាយ ដើម្បីផ្តួចផ្តើមបង្កើតកម្មវិធី ឬរៀបចំគោលនយោបាយផ្សេងៗ ដែលផ្តោតលើការគាំទ្រ លើកកម្ពស់ និងជំរុញយុវកសិករក្នុងវិស័យកសិកម្មឱ្យកាន់តែរីកចម្រើន,(៣) ផ្តល់នូវឱកាសកិច្ចសន្ទនារវាងវាគ្មិនកិត្តិយស សាស្ត្រាចារ្យ និងយុវកសិករ ដើម្បីបណ្តុះស្មារតី បង្កើតគំនិត ច្នៃប្រឌិតថ្មីៗ ដែលអាចកែលម្អផលិតកម្ម និងផលិតភាពកសិកម្ម និង (៤) រៀបចំតំណាងយុវកសិករក្នុងក្របខណ្ឌគម្រោងកសិករអាស៊ីប៉ាស៊ីហ្វិក៕
