ហាណូយ៖ ស្ត្រីជនជាតិវៀតណាមអាយុ៦៧ឆ្នាំម្នាក់ រស់នៅក្នុងខេត្តនិញប៊ិញ ភាគខាងជើងប្រទេសវៀតណាម កំពុងប្រឈមមុខនឹងការចោទប្រកាន់បទល្មើសព្រហ្មទណ្ឌ បន្ទាប់ពីគាត់បានបិទផ្លូវសាធារណៈសម្រាប់ហាលសម្ងួតស្រូវសើម ដែលនាំឱ្យមានគ្រោះថ្នាក់ដ៏ធ្ងន់ធ្ងរដល់អ្នកជិះម៉ូតូម្នាក់។
សារព័ត៌មានវៀតណាម អេចប្រេស បានចេញផ្សាយថា នគរបាលវៀតណាម ក្នុងខេត្តនិញប៊ិញ (Ninh Binh) បានប្រកាសកាលពីថ្ងៃទី១០ ខែវិច្ឆិកា ឆ្នាំ២០២៥នេះថា ពួកគេកំពុងតែស៊ើបអង្កេតប្រមូលភស្តុតាមចោទប្រកាន់ស្ត្រីរូបនេះពីបទរារាំងចរាចរណ៍សាធារណៈ ដែលបង្កគ្រោះថ្នាក់ដល់ជីវិតអ្នកធ្វើដំណើរ។
យោងតាមការស៊ើបអង្កេតបឋម បានឱ្យដឹងថា ស្ត្រីរូបនេះបានដាក់របាំងបេតុង និងដុំថ្ម នៅលើផ្លូវមួយ នៅក្នុងភូមិរបស់គាត់ ហើយបានយកស្រូវសើម ដែលទើបតែប្រមូលផលថ្មី មកដាក់ហាលសម្ងួងដើម្បីស្តុកទុកបានយូរ។ ស្រាប់តែ មានស្ត្រីម្នាក់ជិះម៉ូតូនៅលើផ្លូវនោះ បានបុករបាំងបេតុង ហើយបានដួលស្លាប់នៅនឹងកន្លែងតែម្តង ដោយសាររបួសធ្ងន់ធ្ងរពេក។
នគរបាលវៀតណាម បានចាប់ខ្លួន និងចោទប្រកាន់ស្ត្រីម្ចាស់ស្រូវ មិនឱ្យចាកចេញពីផ្ទះឡើយ ដើម្បីកសាងសំណុំរឿងបញ្ជូនទៅតុលាការឱ្យចាត់ការតាមផ្លូវច្បាប់។
បន្ទាប់ពីហេតុការណ៍នេះកើតឡើងភ្លាម នគរបាលខេត្តនិញប៊ិញ បានចេញការព្រមានយ៉ាងតឹងរឹងដល់ប្រជាពលរដ្ឋដទៃ ត្រូវជៀសវាងការដាក់របាំងបេតុថ ដុំថ្ម ឬរបស់របរផ្សេងទៀត នៅលើដងផ្លូវសាធារណៈ ឬចិញ្ចើមផ្លូវ» សម្រាប់បម្រើប្រយោជន៍ផ្ទាល់ខ្លួន ជាពិសេសនៅពេលយប់ ឬនៅតំបន់ ដែលអ្នកដំណើរមើលមិនច្បាស់ ហើយបង្កគ្រោះថ្នាក់ដល់អាយុជីវតិ។
សូមរំឭកផងដែរថា តម្លៃនាំចេញអង្កររបស់ប្រទេសវៀតណាម បានបន្តធ្លាក់ចុះយ៉ាងគំហុក បន្ទាប់ពីប្រទេសហ្វីលីពីន ដែលជាទីផ្សារដ៏ធំបំផុត បានបន្តហាមឃាត់នាំចូលអង្ករពីបរទេសរហូតដល់ចុងឆ្នាំ២០២៥នេះ។
របាយការណ៍របស់អង្គការស្បៀងអាហារ និងកសិកម្មរបស់អង្គការសហប្រជាជាតិ បានសង្កេតឃើញថា ការធ្លាក់ចុះនៃទីផ្សារអង្ករជាសកលនៅក្នុងឆ្នាំ២០២៥នេះ ដោយសារការផ្គត់ផ្គង់នៅតែមានបរិមាណច្រើនលើសតម្រូវការជាក់ស្តែង។
ទិន្នន័យរបស់អង្គការស្បៀងអាហារ និងកសិកម្ម បានបញ្ជាក់ថា អង្ករវៀតណាមបាក់ប្រាំភាគរយ ជាមធ្យមមានតម្លៃ៣៧២ដុល្លារក្នុងមួយតោន កាលក្នុងខែកញ្ញា ឬប្រហែលចុះថោកបួនភាគរយទាបជាង ក្នុងខែសីហា ដែលមានតម្លៃ៣៨៩ ដុល្លារក្នុងមួយតោន។ សម្រាប់ប្រចាំឆ្នាំ តម្លៃអង្ករវៀតណាមបានធ្លាក់ចុះ៣២ភាគរយ ធៀបនឹងឆ្នាំ២០២៤ ដែលធ្លាប់តែមានតម្លៃ៥៤៦,៥ ដុល្លារក្នុងមួយតោន។
ទិន្នន័យដដែល បានបង្ហាញទៀតថា តម្លៃអង្ករវៀតណាមបាក់ប្រាំភាគរយ គិតចាប់ពីខែមករា ដល់ខែកញ្ញា ឆ្នាំ២០២៥ មានតម្លៃជាមធ្យម៣៨៩,៣ដុល្លារក្នុងមួយតោន គឺចុះថោក៣២ភាគរយពីមួយឆ្នាំទៅមួយឆ្នាំ។
ការធ្លាក់ចុះតម្លៃអង្ករ គឺបណ្តាលមកពីការចាប់ផ្តើមនាំចេញអង្ករឡើងវិញរបស់ឥណ្ឌា ទៅកាន់ទីផ្សារពិភពលោក។ ទោះបីជាយ៉ាងណាក៏ដោយ ស្ថានភាពធ្លាក់ថ្លៃកាន់តែថោកថែមទៀត ដោយសារប្រទេសហ្វីលីពីន បានប្រកាសដាក់បម្រាមការនាំចូលអង្ករពីបរទេស ជាពិសេសអង្ករសរបស់ប្រទេសវៀតណាម។
យោងតាមការសង្ខេបអំពីទីផ្សាររបស់វិទ្យាស្ថានស្រាវជ្រាវអង្ករអន្តរជាតិ បានឱ្យដឹងថា ស្ថានភាពទីផ្សារអង្ករពិភពលោក បាននាំឱ្យប្រទេសនាំចេញអង្ករ ដូចជាវៀតណាម និងថៃ នឹងទទួលបានប្រាក់ចំណេញតិចជាងមុន៕
