នគរបាលវៀតណាមរឹបអូសសាច់គោជប៉ុនក្លែងក្លាយ៦៤តោន និងចាប់ខ្លួនមនុស្សបួននាក់
ហាណូយ៖ នគរបាលវៀតណាមក្នុងទីក្រុងហាណូយ កាលពីពេលថ្មីៗកន្លងមកនេះ បានចាប់ខ្លួនឈ្មួញទុច្ចរិតបួននាក់ និងរឹបអូសបានសាច់គោជប៉ុនក្លែងក្លាយជាង៦៥តោន ដែលកែច្នែពីសាច់ក្របីតាមរយៈការចាក់បញ្ចូលសារធាតុគីមី។
សារព័ត៌មានវៀតណាម អេចប្រេស បានចេញផ្សាយកាលពីនៅថ្ងទី១៦ ខែតុលា ឆ្នាំ២០២៥នេះថា នាយកប្រតបត្តិក្រុមវៀតណាម ឈ្មោះ ហីដា ហ្វូដ ជេអេសស៊ី (HIDA FOOD JSC) ឈ្មោះ ង្វៀង ធិហ្វឺងថាវ ( Nguyen Thi Phuong Thao) ភេទស្រី និងបុគ្គលិកជាន់ខ្ពស់របស់ក្រុមហ៊ុនបីនាក់ផ្សេងទៀត ពីបទផលិត និងចែកចាយផលិតផលអាហារក្លែងក្លាយ។
បុគ្គលិកជាន់ខ្ពស់របស់ក្រុមហ៊ុនកែច្នៃសាច់គោក្លែងក្លាយនេះ មានឈ្មោះ ង្វៀង ធិទ្វីហ៊រ ( Nguyen Thi Thuy Hoa) ភេទស្រី ជាប្រធានគណនេយ្យ ឈ្មោះ ង្វៀង ធិស៊ុង (Nguyen Thi Dung) ភេទស្រី ជានាយកផ្នែកផលិតកម្ម និងឈ្មោះ ចិន ហ័ងហ្វឺក (Tran Hoang Phuoc) ភេទប្រុស ជានាយកក្រុមហ៊ុន អេសខេ ហ្វូដ (SK FOODS) ដែលនៅពេលនេះត្រូវឃុំបណ្តោះអាសន្ននៅក្នុងពន្ធនាគាររងចាំតុលាការជំនុំជម្រះ ពីបទផលិត និងចែកចាយផលិតផលអាហារក្លែងក្លាយ។
ជនសង្ស័យឈ្មោះ ចិន ហ័ងហ្វឺក បានបញ្ជាក់ថា តម្រូវការសាច់គោ វ៉ែកគ្យូ (WAGYU) ឬហៅថា សាច់គោ កូបេ (KOBE) របស់ជប៉ុន មានការកើនឡើងយ៉ាងខ្លាំងនៅក្នុងប្រទេសវៀតណាម ដូច្នេះទើបសម្រេចចិត្តសហការជាមួយក្រុម ហីដា ហ្វូដ ជេអេសស៊ី ឱ្យផលិតសាច់គោក្លែងក្លាយ ដោយកែច្នៃពីសាច់ក្របី តាមរយៈការលាយផ្សំជាមួយសារធាតុគីមី។
ចំណែកជនសង្ស័យឈ្មោះ ង្វៀង ធិហ្វឺងថាវ ជាអ្នកទិញសាច់ក្របីថោកៗ ពីប្រទេសឥណ្ឌាក្នុងតម្លៃ ១២០ ០០០ដុង ឬស្មើនឹង៤,៧០ដុល្លារ ក្នុងមួយគីឡូក្រាម រួចនាំចូលមកក្នុងប្រទេសវៀតណាម ដើម្បីចាក់បញ្ចូលសារធាតុគីមីឱ្យបង្កើតជាសាច់មានជាប់ខ្លាញ់ ដួចសាច់គោជប៉ុនបេះបិទ។
បន្ទាប់ពីកែច្នៃសាច់ក្របីឱ្យមានខ្លាញ់ដូចសាច់គោរួចហើយ ក្រុមហ៊ុនទាំងពីរនេះ បានវេចខ្ចប់ និងដាក់ស្លាកផលិតផលថា ជាសាច់គោជប៉ុន ហើយក្រុមហ៊ុន ហីដា ហ្វូដ ជាអ្នកលក់ចែកចាយនៅតាមទីផ្សារក្នុងប្រទេសវៀតណាម មានតម្លៃរហូតដល់៦០០ ០០០ដុង ឬស្មើនឹង២២,៧៨ដុល្លារ ក្នុងមួយគីឡូក្រាម។
នគរបាលវៀតណាម បានឱ្យដឹងថា ភ្នាក់ងារសម្ងាត់របស់ខ្លួន បានបើកការស៊ើបអង្កេតសំណុំរឿងនេះ តាំងក្នុងខែឧសភា ឆ្នាំ២០២៤មកម្លេះ ប៉ុន្តែទើបចាប់ខ្លួនបានមេក្លោងធំៗ នៅពាក់កណ្តាលខែតុលា ឆ្នាំ២០២៥នេះ បន្ទាប់ជនសង្ស័យទាំងបួននាក់បានផលិតសាច់គោក្លែងក្លាយចំនួន១៤តោន ហើយលក់ចែកចាយនៅទីក្រុងហាណូយ ទីក្រុងដាណាង ទីក្រុងញ៉ាចាង និងទីក្រុងហូជីមិញ។
ពាក់ព័ន្ធករណីនេះដែរ កាលពីថ្ងៃទី១៩ ខែកញ្ញា ឆ្នាំ២០២៥ នគរបាលវៀតណាមក្នុងក្រុងហាណូយ និងមន្ត្រីឃ្លាំមើលទីផ្សារ បានឆ្មក់ចូលឆែកឆេទីតាំងរបស់ក្រុមហ៊ុន ហីដា ហ្វូដ មួយកន្លែង ហើយចាប់ខ្លួនបុគ្គលិកក្រុមហ៊ុន ដែលអ្នកជំនាញខាងចាក់ថ្នាំក្រហមលើសាច់ក្របី ឱ្យក្លាយជាសាច់គោមានស្រទាប់ខ្លាញ់ ហើយដាក់ស្លាកថា ជាសាច់គោ វ៉េកគ្យូ (Wagyu) ម៉ាក ហីដាសាន់ (Hidasan) មានន័យជាភាសាជប៉ុនថា លោកហីដា។
នៅក្នុងប្រតិបត្តិការបង្ក្រាបអំពើទុច្ចរិតនេះ នគរបាលវៀតណាម ក៏បានរឹបអូសសាច់ក្របី និងសាច់គោក្លែងក្លាយចំនួនជាង៦៥តោន ព្រមទាំងរឹបអូសសម្ភារៈប្រើសម្រាប់ផលិតសាច់គោក្លែងក្លាយ រួមទាំងសារធាតុគីមីចំនួន ១៧តោន ដែលគេជឿថា ជាសារធាតុខ្លាញ់។
លទ្ធផលនៃការធ្វើតេស្តដោយវិទ្យាស្ថានជាតិគ្រប់គ្រងចំណីអាហាររបស់វៀតណាម បានរកឃើញថា សំណាកសាច់គោ២៤ប្រភេទ ក្នុងចំណោមសំណាក២៩ប្រភេទ គឺជាសាច់ក្របីសុទ្ធសាធតែម្តង។
រហូតមកដល់ពេលនេះ នគរបាលវៀតណាម កំពុងតែរង់ចាំរបាយការណ៍អំពីជាតិពុលរបស់សារធាតុគីមី ដើម្បីកំណត់ថា តើសាច់គោក្លែងក្លាយនេះមានគ្រោះថ្នាក់ដល់សុខភាពមនុស្សកម្រិតណា។
សូមរំឭកថា កាលពីដើមខែឧសភា ឆ្នាំ២០២៥នេះ នគរបាលវៀតណាម បានចាប់ខ្លួនអតីតប្រធានរដ្ឋបាលសុវត្ថិភាពចំណីអាហារវៀតណាម និងមន្ត្រីជំនាញផ្នែកសុវត្ថិភាពចំណីអាហារបួននាក់ផ្សេងទៀត ពីបទស៊ីសំណូក ក្នុងរឿងអាស្រូវផលិតអាហារបំប៉នក្លែងក្លាយដ៏ធំមួយ បន្ទាប់ពីភ្នាក់ងារសម្ងាត់មកពីនាយកដ្ឋានប៉ូលិសប្រឆាំងអំពើពុករលួយ នៃក្រសួងសន្តិសុខសាធារណៈរបស់ប្រទេសវៀតណាម បានឆ្មក់ចូលឆែកឆេបានរកឃើញថ្នាំបំប៉នក្លែងក្លាយចំនួន១០០តោន៕
