វ៉ាស៊ីនតោន៖ តម្លៃសាច់គោអាម៉េរិក បានឡើងថ្លៃខ្ពស់បំផុត បន្ទាប់ពីជួបគ្រោះរាំងស្ងួតធ្វើឱ្យបរិំមាណគោរស់នៅសល់ចំនួនតិចបំផុតក្នុងប្រវត្តិសាស្ត្ររយៈពេល៧០ឆ្នាំកន្លងមកនេះ ស្របគ្នានឹងការដំឡើងពន្ធនាំចូលរបស់សហរដ្ឋអាម៉េរិក។
របាយការណ៍សន្ទស្សន៍តម្លៃទំនិញប្រើប្រាស់របស់ការិយាល័យស្ថិតិការងារ សម្រាប់ខែសីហា ឆ្នាំ២០២៥ បានបង្ហាញពីតម្លៃសាច់គោកើនឡើងលើតម្លៃកាលពីឆ្នាំមុន។ តម្លៃសាច់គោកិនល្អិតបានកើនឡើង១២,៨ភាគរយ ពីមួយឆ្នាំទៅមួយឆ្នាំ ខណៈតម្លៃសាច់គោដុំបានកើនឡើង១៣,៦ភាគរយ ហើយតម្លៃសាច់គោដុំល្អបំផុត គឺតម្លៃឡើងខ្ពស់ជាង១៦,៦ភាគរយ។ តួលេខអតិផរណាទាំងនេះ គឺខ្ពស់ជាងការកើនឡើង៣,២ភាគរយ ពីមួយឆ្នាំទៅមួយឆ្នាំ នៅក្នុងប្រភេទចំំណីអាហារទាំងអស់ ក៏ដូចជាការកើនឡើង៥,៤ភាគរយនៃតម្លៃសាច់ កាលពីឆ្នាំ២០២៤។
អ្នកចិញ្ចឹមគោនៅក្នុងរដ្ឋអីល្លីណាយ សហរដ្ឋអាម៉េរិក បាននិយាយថា ចំនួនគោរស់បានធ្លាក់ចុះក្នុងរយៈពេលប៉ុន្មានឆ្នាំថ្មីៗកន្លងនេះ ដោយសារគ្រោះរាំងស្ងួតប៉ះពាល់ដល់តំបន់ចិញ្ចឹមសំខាន់ៗមួយចំនួន ។
លោកបាននិយាយថា «បញ្ហាពិតនៅទីនេះ គឺគ្រោះរាំងស្ងួត ដែលបានកើតឡើងកាលពីប៉ុន្មានឆ្នាំមុន ហើយរដ្ឋតិចសាស់ អូក្លាហូម៉ា និងរដ្ឋកាន់សាស ស្ថិតនៅភាគអាគ្នេយ៍ក៏លែងមានស្មៅដុះទៀតដែរ ដូច្នេះទើបគ្មានចំណីឱ្យគោស៊ី។ យើងមានស្តុកគោតិចបំផុត ចាប់តាំងពីឆ្នាំ១៩៥១ ដូច្នេះហើយទើបសាច់គោឡើងថ្លៃ»។
ចំណែកការចំណាយរបស់អ្នកចិញ្ចឹមគោវិញ ក៏បានកើនឡើងផងដែរ រាប់ទាំងការចំណាយលើចំណីគោ កម្លាំងពលកម្ម ប្រេងឥន្ធនៈ និងតម្លៃគ្រឿងចក្រក៏កំពុងកើនឡើងជាបន្តបន្ទាប់។
រីឯការនាំចូលសាច់គោ និងគោរស់ ត្រូវបានហាមឃាត់ដោយសារបញ្ហាជំងឺឆ្លង ដូចជាការដឹកជញ្ជូនសត្វគោរស់ពីប្រទេសម៉ិកស៊ិក ត្រូវក្រសួងកសិកម្មសហរដ្ឋអាម៉េរិក ផ្អាកចាប់តាំងពីក្នុងខែឧសភា ឆ្នាំ២០២៥ ដោយសារករណីជំងឺដង្កូវក្នុងសាច់គោ ដែលប៉ះពាល់ដល់គោចិញ្ចឹមនៅក្នុងស្រុក។
អត្រាពន្ធនាំចូលខ្ពស់ក៏បានបង្កឱ្យតម្លៃសាច់គោឡើងកាន់តែខ្ពស់ ដែលប៉ះពាល់ដល់អ្នកប្រើប្រាស់ទូទៅ ដោយសាច់គោនាំចូលពីប្រទេសប្រេស៊ីល ប្រឈមមុខនឹងអត្រាពន្ធ៧៦ភាគរយ ហើយប្រទេសផលិតសាច់គោផ្សេងទៀតក៏ប្រឈមនឹងពន្ធខ្ពស់ដូចគ្នានេះផងដែរ។
អ្នកចិញ្ចឹមដដែលនេះ បាននិយាយទៀតថា សាច់គោ គឺជារឿងសំខាន់ ដែលរដ្ឋាភិបាលរបស់លោក ដូណាល់ ត្រាំ (Donald Trump) ត្រូវជួយកសិករ និងអ្នកចិញ្ចឹមគោ ដែលរងផលប៉ះពាល់ដោយអត្រាពន្ធខ្ពស់ ពីព្រោះម្ចាស់កសិដ្ឋានចិញ្ចឹមគោភាគច្រើនត្រូវពឹងផ្អែកលើផលដំណាំ និងបសុសត្វ ដើម្បីឱ្យមុខរបរអាចបន្តទៅមុខបាន។
លោកបាននិយាយបន្ថែមថា វាជារឿងសំខាន់ ដោយសារការធ្លាក់ចុះតម្លៃមួយចំនួន ដែលគេបានឃើញដោយផ្ទាល់ភ្នែកពាក់ព័ន្ធនឹងគ្រាប់ធញ្ញជាតិធ្លាក់ថ្លៃ ក៏បង្កឡើងដោយសារអាត្រាពន្ធខ្ពស់។
ក្រុមតំណាងឱ្យអ្នកចិញ្ចឹមគោ បាននិយាយថា តម្លៃសាច់គោកាន់តែខ្ពស់បានបង្កបញ្ហាប្រឈមផ្នែកសេដ្ឋកិច្ច ដែលបានកើតឡើងក្នុងប៉ុន្មានឆ្នាំថ្មីៗនេះ ក្រោមការគ្រប់គ្រងរបស់ប្រធានាធិបតីមុន។
រីឯនាយកប្រតិបត្តិសមាគមសាច់គោ សហរដ្ឋអាម៉េរិក បាននិយាយថា រវាងអតិផរណា ការកើនឡើងថ្លៃដើម និងការរឹតបន្តឹងរបស់រដ្ឋាភិបាល ធ្វើឱ្យកសិករចិញ្ចឹមគោ និងអ្នកចិញ្ចឹមសត្វផ្សេងទៀត បានទទួលផលប្រយោជន៍ច្រើន។ កសិករ និងអ្នកចិញ្ចឹមសត្វឥឡូវនេះទទួលបានតម្លៃល្អប្រសើរជាងមុនសម្រាប់សាច់គោរបស់ពួកគេ គឺជាការប្រែប្រួលគួរឱ្យពេញចិត្ត។ ការធ្វើស្រែចម្ការ និងការចិញ្ចឹមសត្វ ឥឡូវនេះមានប្រាក់ចំណេញ ដើម្បីដោះស្រាយបញ្ហា និងថែរក្សាមុខរបរចិញ្ចឹមសត្វរបស់ពួកគេទៅថ្ងៃអនាគត។
លោកបានបន្ថែមថា តម្លៃទាំងនេះ គួបផ្សំនឹងការបន្ធូរបន្ថយពន្ធ ក្នុងស្រុករបស់ប្រធានាធិបតី ដូណាល់ ត្រាំ មានសារៈសំខាន់សម្រាប់ភាពជោគជ័យនៃឧស្សាហកម្មចិញ្ចឹមគោរបស់អាម៉េរិក។ គ្រួសារកសិករ និងអ្នកចិញ្ចឹមគោ ឥឡូវនេះមានលុយកាន់តែច្រើនដើម្បីវិនិយោគក្នុងប្រតិបត្តិការរបស់ខ្លួន ដោយទិញឧបករណ៍ថ្មី និងបន្តបំពេញតម្រូវការដ៏រឹងមាំសម្រាប់សាច់គោអាម៉េរិក ដែលមានគុណភាពល្អបំផុត៕
