ប៉េកាំង៖ រដ្ឋមន្ត្រីក្រសួងធនធានទឹករបស់ប្រទេសចិន បាននិយាយកាលពីថ្ងៃទី២៩ ខែកញ្ញាថា ប្រទេសចិនបានសាងសង់ទំនប់ស្ទាក់ទឹកដ៏ធំបំផុតរបស់ពិភពលោក ក្នុងផែនការប្រាំឆ្នាំរំកិល លើកទី១៤ សម្រាប់ឆ្នាំ២០២១-២០២៥ ត្រូវបានព្យាករណ៍ថា នឹងមានទំហំទឹកប្រាក់វិនិយោគជិត៧៥៧ពាន់លានដុល្លារ ដើម្បីផ្តល់អត្ថប្រយោជន៍ដល់ប្រជាជនកាន់តែច្រើន។
សារព័ត៌មាន គ្លូបល ថែមស៍ (Global Times) របស់ចិន បានចេញផ្សាយថា ក្នុងឆ្នាំ២០២២ ការវិនិយោគរបស់ចិនក្នុងការសាងសង់ទំនប់ស្ទាក់ទឹក មានទឹកប្រាក់កើនជិតដល់១ ៥០០ពាន់លានដុល្លារ ហើយបានបង្កើតកំណត់ត្រាថ្មីសម្រាប់រយៈពេលបីឆ្នាំបន្តបន្ទាប់ រហូតមានទឹកប្រាក់កើនជិតដល់១ ១៩០ពាន់លានដុល្លារ ក្នុងឆ្នាំ២០២៤។ ការវិនិយោគសរុបក្នុងអំឡុងពេលអនុវត្តផែនការប្រាំឆ្នាំរំកិល លើកទី១៣ ត្រូវបានគេរំពឹងថា នឹងមានចំនួន១,៦ដងនៃផែនការ ឆ្នាំ២០១៦-២០២០។
សាស្ត្រាចារ្យនៃបណ្ឌិត្យសភាសិក្សាសេដ្ឋកិច្ចបើកទូលាយរបស់ប្រទេសចិន នៅសាកលវិទ្យាល័យពាណិជ្ជកម្មអន្តរជាតិ និងសេដ្ឋកិច្ច បានមានប្រសាសន៍ថា ការវិនិយោគលើគម្រោងរក្សាទុកទឹកមានទំហំធំ និងយូរអង្វែង ប៉ុន្តែវាអាចជំរុញការវិនិយោគក្នុងសង្គមប្រកបដោយប្រសិទ្ធភាព និងផ្តល់ការគាំទ្រដល់និរន្តរភាពនៃការអភិវឌ្ឍសេដ្ឋកិច្ចប្រកបដោយគុណភាពខ្ពស់។
ចាប់តាំងពីឆ្នាំ២០២១ គម្រោងសាងសង់ប្រពន្ធធារាសាស្ត្រសំខាន់ៗសរុបចំនួន១៧២គម្រោង ត្រូវបានដាក់ឱ្យដំណើរការ ដើម្បីពន្លឿនការគូរប្លង់ និងរចនាសម្ព័ន្ធ។ នៅចុងឆ្នាំ២០២៤ ប្រទេសចិនបានសាងសង់អាងស្តុកទឹកចំនួន៩៥ ០០០ រួមទាំងទ្វារបង្វែរទឹកតូចធំ និងមធ្យមចំនួន២០០ ប្រព័ន្ធធារាសាស្ត្រចំនួន៦ ៩២៤ និងទំនប់ទឹកប្រវែង៣១៨ ០០០គីឡូម៉ែត្រ ដោយបានបញ្ចប់នូវហេដ្ឋារចនាសម្ព័ន្ធស្ទាក់ទឹកឈានមុខគេ លើពិភពលោក ទាំងក្នុងទំហំមុខងារ និងចំនួនប្រជាជនទទួលបានផលប្រយោជន៍។
លោករដ្ឋមន្ត្រីក្រសួងធនធានទឹក បានកត់សម្គាល់ថា ប្រទេសចិនបាននិងកំពុងពង្រឹងប្រព័ន្ធការពារទឹកជំនន់ និងការពារគ្រោះរាំងស្ងួត ដោយមានអាងស្តុកទឹកបានចំនួន១៨៥,៦ពាន់លានម៉ែត្រគូប ទំនប់ការពារប្រជាជនចំនួន៦៦០លាននាក់ និងសមត្ថភាពទប់ទឹកជំនន់បានចំនួន១០៩ពាន់លានម៉ែត្រគូប។ ចាប់តាំងពីឆ្នាំ២០២១ ការខាតបង់ដោយទឹកជំនន់បំផ្លាញ បានធ្វើឱ្យផលិតផលក្នុងស្រុកសរុបធ្លាក់ចុះពី០,២៨ភាគរយទៅ០,១៨ភាគរយ។
ក្រៅពីនេះ ប្រទេសចិនបានសាងសង់គម្រោងផ្គត់ផ្គង់ទឹក ការបង្វែរទឹក និងប្រព័ន្ធធារាសាស្ត្រមួយចំនួន។ នៅចុងបញ្ចប់នៃផែនការរយៈពេលប្រាំឆ្នាំរំកិល លើកទី១៤ បណ្តាញផ្លូវទឹករបស់ចិន ត្រូវបានគេរំពឹងថា នឹងគ្របដណ្តប់៨០,៣ភាគរយនៃផ្ទៃដីកសិកម្មរបស់ប្រទេសចិន អាចស្រោចស្រពដីស្រែចម្ការរហូតដល់៧២,៧លានហិកតា ហើយអាចផ្គត់ផ្គង់ទឹកស្អាតនៅតាមជនបទរហូតដល់៩៦ភាគរយ ដែលធានាបាននូវសន្តិសុខទឹកសម្រាប់យុទ្ធសាស្ត្រជាតិ ផលិតកម្មស្រូវមានស្ថេរភាព និងសុខុមាលភាពរបស់ប្រជាពលរដ្ឋ។
ការអភិវឌ្ឍហេដ្ឋារចនសម្ព័ន្ធរក្សាទុកទឹកមានលក្ខណៈធំធេង និងស្មុគស្មាញណាស់ ប៉ុន្តែយុទ្ធសាស្ត្រសំខាន់ គឺផ្តល់អាទិភាពដល់វិស័យកសិកម្ម និងអភិវឌ្ឍន៍ជនបទ និងស្ថិរភាពសេដ្ឋកិច្ចប៉ុណ្ណោះទេ ប៉ិន្តែថែមទាំងបង្កើនប្រាក់ចំណូលដល់ប្រជាកសិករចិនផងដែរ។
ក្រសួងធនធានទឹកចិន ក៏កំពុងបង្កើនការរួមបញ្ចូលគ្នានៃបច្ចេកវិទ្យាប្រើបញ្ញាសិប្បនិមិត្តក្នុងការងារការពារធនធានទឹកផងដែរ។ អគ្គនាយកនៃនាយកដ្ឋានផែនការ និងកម្មវិធីនៃក្រសួងធនធានទឹករបស់ចិន បានសង្កត់ធ្ងន់ថា ឌីជីថលភាវូបនីយកម្ម ដូចជាបណ្តាញ និងបញ្ញាសិប្បនិម្មិត គឺជានិន្នាការ និងទិសដៅអភិវឌ្ឍនាពេលអនាគត ដោយកត់សម្គាល់ថា ក្រសួងបានពន្លឿនការអភិវឌ្ឍប្រព័ន្ធឌីជីថលសម្រាប់គ្រប់គ្រងអាងស្តុកទឹក បណ្តាញទឹក និងគ្រប់គ្រងគម្រោងផ្សេងៗទៀត។
នាពេលបច្ចុប្បន្ននេះ ដោយផ្អែកលើប្រព័ន្ធត្រួតពិនិត្យឌីជីថល ការព្យាករណ៍ទឹកជំនន់តាមដងទន្លេសំខាន់ៗនៅទូទាំងប្រទេសចិន ត្រូវបានព្យាករណ៍ទុកមុន ក្នុងរយៈពេលពីពីរ ទៅ១០ថ្ងៃ ដោយផ្នែកលើលំហូរអេកូឡូស៊ីសំខាន់ៗ ចំនួន២៦៨ប្រភេទ ត្រូវបានត្រួតពិនិត្យ និងធានាសុវត្ថិភាពនៃការផ្គត់ផ្គង់ទឹក គុណភាពទឹក និងប្រតិបត្តិការគម្រោងបង្វែរទឹកឱ្យហូរបញ្ច្រាសទិសនៅក្នុងប្រទេសចិន៕
