ក្រុងសៀមិន៖ នារសៀលថ្ងៃទី៨ ខែកញ្ញា ឆ្នាំ២០២៥ តបតាមការអញ្ជើញរបស់តំណាងអង្គការសហប្រជាជាតិទទួលបន្ទុកផ្នែកពាណិជ្ជកម្ម និងការអភិវឌ្ឍ (United Nations Trade and Development – UNCTAD) ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ី និងប៉ាស៊ីហ្វិក បានអញ្ជើញចូលរួមក្នុងកម្មវិធីបើកជាផ្លូវការនៃពិព័រណ៍អន្តរជាតិចិន សម្រាប់ការវិនិយោគ និងពាណិជ្ជកម្ម លើកទី២៥ និងបានចូលរួមធ្វើជាវាគ្មិនកិត្តិយសក្នុងកិច្ចពិភាក្សាជាន់ខ្ពស់ (High-Level Plenary Discussion)នៃសន្និសីទស្តីពី «ការវិនិយោគសម្រាប់អនាគត» ដោយកិច្ចពិភាក្សាផ្តោតទៅលើចក្ខុវិស័យចំពោះយុទ្ធសាស្រ្តស្វែងរកប្រភពទុនសម្រាប់អនាគតនៃការវិនិយោគសកល ការវិនិយោគលើហេដ្ឋារចនាសម្ព័ន្ធ និងថាមពលសម្រាប់អនាគត។
ក្នុងកម្មវិធីបើកជាផ្លូវការនៃសន្និសីទនេះ ក៏មានការចូលរួមជាអធិបតីពីថ្នាក់ដឹកនាំជាន់ខ្ពស់ក្នុងការថ្លែងសន្ទរកថាស្វាគមន៍ សន្ទរកថាបើកពីអគ្គលេខាធិការងនៃអង្គការសហប្រជាជាតិ និងនាយកកម្មវិធីគំនិតផ្តួចផ្តើមទីផ្សារមូលបត្រប្រកបដោយចីរភាពរបស់អង្គការសហប្រជាជាតិ និងជាប្រធានផ្នែកវិនិយោគ និងសហគ្រាសនៃអង្គការសហប្រជាជាតិ ទទួលបន្ទុកផ្នែកពាណិជ្ជកម្ម និងការអភិវឌ្ឍ, តំណាងពីខេត្ដហ្វូជៀន និងអនុរដ្ឋមន្រ្តីក្រសួងពាណិជ្ជកម្មនៃសាធារណរដ្ឋប្រជាមានិតចិន។
ជាពិសេស សន្ទរកថាគន្លឹះ ថ្លែងដោយឯកឧត្តមឧបនាយករដ្ឋមន្ត្រីនៃសាធារណរដ្ឋអ៊ូសបេគីស្ថាន និងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា តំណាងពីព្រះរាជាណាចក្រកម្ពុជា។
ជាកិច្ចបន្ទាប់ ក្នុងការពិភាក្សានេះ ឯកឧត្តមបណ្ឌិត កៅ ថាច បានចែករំលែកនូវទស្សននៃសក្តានុពលការវិនិយោគសម្រាប់អនាគត តាមរយៈបន្ស៊ីជាមួយនឹងតួនាទីរបស់ធនាគារអភិវឌ្ឍន៍ រួមមានការវិវត្តន៍នៃឧបករណ៍ហិរញ្ញវត្ថុ, យន្តការនៃផ្តល់ហិរញ្ញប្បទានសម្រាប់ការអភិវឌ្ឍ ដែលមានប្រសិទ្ធភាព, សារៈសំខាន់នៃបច្ចេកវិទ្យាសម្រាប់ហិរញ្ញប្បទានសម្រាប់ការអភិវឌ្ឍ និងឧត្តមានុវត្តន៍របស់ធនាគារ ARDB។
បន្ថែមពីនេះ ក្នុងនាមជាប្រធានសមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ី និងប៉ាស៊ីហ្វិក ឯកឧត្តមបណ្ឌិត កៅ ថាច ក៏បានរំលេចអំពីសារៈសំខាន់នៃកិច្ចសហប្រតិបត្តិការរវាងគ្រឹះស្ថានហិរញ្ញវត្ថុអភិវឌ្ឍ ពិសេសការបង្កើនសមត្ថភាពស្ថាប័ន និងការអនុវត្តកម្មវិធីហិរញ្ញប្បទានរួមគ្នា សំដៅជំរុញផលជះនៃសហថាមពល និងប្រសិទ្ធភាពនៃការផ្តល់ហិរញ្ញប្បទាន។
មុននឹងអញ្ជើញចូលរួមជាវាគ្មិនកិត្តិយសនៃសន្និសីទស្តីពី «ការវិនិយោគសម្រាប់អនាគត» ឯកឧត្តមបណ្ឌិត កៅ ថាច នៅថ្ងៃទី៨ ខែកញ្ញា ឆ្នាំ២០២៥នេះ បានឆ្លៀតឱកាសអញ្ជើញចូលរួម «ពិព័រណ៌អន្តរជាតិចិន សម្រាប់ការវិនិយោគ និងពាណិជ្ជកម្ម លើកទី២៥» នៅទីក្រុង សៀមិន ប្រទេសចិន។
ក្នុងឱកាសនេះ ឯកឧត្តមបណ្ឌិត បានដឹកនាំសហការីជួបពិភាក្សាទ្វេភាគី ជាមួយតំណាងអង្គការសហប្រជាជាតិទទួលបន្ទុកផ្នែកពាណិជ្ជកម្ម និងការអភិវឌ្ឍ (United Nations Trade and Development – UNCTAD) ដែលដឹកនាំដោយលោកស្រី ណានលី ខូល្លីន (Nan Li Collins), ប្រធានគំនិតផ្តួចផ្តើមទីផ្សារមូលបត្រប្រកបដោយចីរភាពរបស់អង្គការសហប្រជាជាតិ និងជាប្រធានផ្នែកវិនិយោគ និងសហគ្រាសនៃអង្គការសហប្រជាជាតិទទួលបន្ទុកផ្នែកពាណិជ្ជកម្ម និងការអភិវឌ្ឍ។
កិច្ចពិភាក្សាទ្វេភាគីនេះ បានផ្តោតសំខាន់ទៅលើការពិនិត្យលទ្ធភាពក្នុងការបង្កើនកិច្ចសហប្រតិបត្តិការរវាងធនាគារ ARDB ដែលជាធនាគារគោលនយោបាយសម្រាប់ការអភិវឌ្ឍរបស់ប្រទេសកម្ពុជា សំដៅរួមគ្នាចូលរួមការអភិវឌ្ឍប្រកបដោយចីរភាព ទាំងក្នុងប្រទេសកម្ពុជា តំបន់ និងសកល។
ជាលទ្ធផល, ធនាគារអភិវឌ្ឍន៍ជនបទ និងកសិកម្ម និងអង្គការសហប្រជាជាតិទទួលបន្ទុកផ្នែកពាណិជ្ជកម្ម និងការអភិវឌ្ឍ បានចែករំលែកនូវនិន្នាការវិវត្តនៃស្ថានភាពសង្គម-សេដ្ឋកិច្ចនាពេលបច្ចុប្បន្ន និងបញ្ហាប្រឈមពាក់ព័ន្ធហិរញ្ញប្បទានប្រកបដោយចីរភាព ព្រមទាំងការសែ្វងរកដំណោះស្រាយរួមគ្នា៕
