ញូវដេលី៖ ក្រុមហ៊ុននាំចេញផ្លែនៅក្នុងប្រទេសឥណ្ឌា បាននិយាយថា ទីផ្សារផ្លែទៀបបាយរបស់ឥណ្ឌាបានបង្ហាញពីភាពប្រសើរឡើងគួរឱ្យកត់សម្គាល់ក្នុងរដូវប្រមូលផល ឆ្នាំ២០២៥នេះ បន្ទាប់ពីបានឆ្លងកាត់ស្ថានភាពលំបាក កាលពីក្នុងឆ្នាំ២០២៤។
គេហទំព័របន្លែ និងផ្លែឈើ បានផ្សាយថា លោកនាយកក្រុមហ៊ុនប្រមូលទិញ និងនាំចេញទៀបបាយឥណ្ឌា មានប្រសាសន៍ថា ផ្លែទៀបមានគុណភាពល្អនៅឆ្នាំ២០២៥នេះ ដោយសារទឹកភ្លៀងបានធ្លាក់ទាន់ពេលវេលាល្អ បន្ទាប់ពីមានគ្រោះរាំងស្ងួត កាលពីឆ្នាំ២០២៤។ រដូវប្រមូលផលផ្លែទៀបបាយនៅក្នុងប្រទេសឥណ្ឌា ជាធម្មតាចាប់ផ្តើមពីខែសីហា ដល់ខែកុម្ភៈ ហើយការប្រមូលផល នៅឆ្នាំ២០២៥នេះ ទទួលបានការចាប់អារម្មណ៍យ៉ាងខ្លាំងពីអ្នកទិញក្នុងស្រុក និងអ្នកនាំចេញ។
កន្លងមកដំណើរការផ្គត់ផ្គង់ផ្លែទៀបបាយនៅលើទិផ្សារមិនបាល្អរលូន ដោយសារបណ្តាលមកពីទឹកភ្លៀងធ្លាក់មិនទៀងទាត់ លោកនាយកក្រុមហ៊ុន បានកត់សម្គាល់ថា ផ្លែទៀបបាយរបស់ឥណ្ឌាមានទំហំធំ រសជាតិផ្អែមឆ្ងាញ់ និងមានសម្រស់ស្អាតជាងផ្លែទៀប ដែលរងផលប៉ះពាល់ដោយគ្រោះរាំងស្ងួត កាលពីឆ្នាំ២០២៤។
យោងទៅតាមលោកនាយកក្រុមហ៊ុននាំចេញ បានឱ្យដឹងទៀតថា នៅក្នុងប្រទេសឥណ្ឌា មានដាំពូជទៀបបាយជាច្រើនប្រភេទ ប៉ុន្តែភាគច្រើនសម្រាប់តែបរិភោគក្នុងស្រុក ដោយសារតែផ្លែឆាប់បែក និងឆាប់រលួយស្អុយ។ ប៉ុន្តែសម្រាប់ពូជទៀបបាយស្វិត គឺជាពូជតែមួយគត់ ដែលអាចនាំចេញបាន ដោយសារវាមានគុណភាពខ្ពស់ និងអាចរក្សាទុកបានយូរ។
ប្រទេសអារ៉ាប់រួម គឺជាទីផ្សារនាំចេញផ្លែទៀបបាយធំជាងគេ ដែលសហគមន៍ជនជាតិភាគតិចមួយចំនួនធ្លាប់ស្គាល់ផ្លែទៀប និងចូលចិត្តទិញបរិភោគ។ ចំណែកការសាកល្បងថ្មីៗ បង្ហាញពីចំណង់ចំណូលចិត្តនៅក្នុងប្រទេសអង់គ្លេស ម៉ាឡេស៊ី និងប្រទេសសិង្ហបុរី ដែលអ្នកលក់រាយកំពុងស្វែងរកផ្លែទៀបបាយនេះ។
លោកប្រធានក្រុម បានបន្ថែមថា ក្រុមហ៊ុនបានកសាងទំនុកចិត្ត និងកេរ្តិ៍ឈ្មោះរួចហើយ តាមរយៈការដឹកជញ្ជូនផ្លែឈើស្រស់ និងផ្លែទៀបបាយទៅកាន់ទីផ្សារនៅអាស៊ី និងអឺរ៉ុប ក៏ដូចជាការនាំចេញទឹកផ្លែឈើ ទៅកាន់ចក្រភពអង់គ្លេស ប៉ូឡូញ និងសហរដ្ឋអាមេរិក។
នៅឆ្នាំ២០២៥នេះ អ្នកនាំចេញផ្លែឈើកំពុងប្រមូលប្រាក់ចំណេញយ៉ាង ស្របពេលផលិតផ្លែទៀបបាយនៅក្នុងប្រទេសកាន់តែសម្បូរ ហើយលោកជឿជាក់លើការប្តេជ្ញាចិត្តក្នុងការនាំចេញ ដើម្បីកសាងទំនុកចិត្តលើទីផ្សារអន្តរជាតិក្នុងរយៈពេលវែង។
សម្រាប់ពេលនេះ ក្រុមហ៊ុននាំចេញកំពុងតែស្វែងរកការដោះស្រាយបញ្ហាប្រឈមមួយចំនួន ដូចជាអាយុកាលរក្សាទុកមិនបានយូរ ដូច្នេះទុកដាក់យ៉ាងប្រុងប្រយ័ត្នក្នុងអំឡុងពេលដឹកជញ្ជូនតាមផ្លូវអាកាស និងត្រូវមានការគ្រប់គ្រងយ៉ាងម៉ត់ចត់បន្ទាប់ពីប្រមូលផល។
ដោយសម្លឹងទៅអនាគត អ្នកនាំចេញផ្លែទៀបបាយត្រូវរក្សាឱ្យបាននូវការនាំចេញប្រចាំសប្តាហ៍ប្រកបដោយស្ថិរភាព ដំណើរការសម្រិតសម្រាំងផ្លែទឿបពីកសិដ្ឋានរហូតដល់ការដឹកជញ្ជូន ដើម្បីធានាបាននូវនូវគុណភាព និងបង្កើនភាពជឿជាក់ក្នុងទីផ្សារនាំចេញ៕
