ភ្នំពេញ៖ ក្រុមហ៊ុនសាជីវកម្មសហគមន៍កសិកម្មកម្ពុជា (CACC)ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនអេមរុរ៉ាយស៍នៅស្រុកកោះញែក ខេត្តមណ្ឌលគិរី កាលពីថ្ងៃទី១៩ ខែសីហា ឆ្នាំ២០២៥នេះ បានប្រារព្ធពិធីចុះហត្ថលេខាលើកិច្ចសន្យាកសិកម្មផលិតកម្ម ជាមួយសហគមន៏កសិកម្មចំនួន៦ និងក្រុមផលិតរបស់គម្រោងអេមស៍ចំនួន ១៨ ក្រុម។
នៅក្នុងនោះមានកិច្ចសន្យាផលិតស្រូវសរីរាង្គប្រភេទប្រកាន់រដូវសរុបចំនួន ៤.០៧៦ តោន លើផ្ទៃដីផលិតសរុបចំនួន ៤.១៩៧ ហិកតា សមាជិកសរុបចំនួន ១.៣៦៤ គ្រួសារ និងប្រភេទពូជស្រូវសែនក្រអូបសរុបចំនួន ១.០០០ តោន លើផ្ទៃដីផលិតសរុបចំនួន ៣៩៦.៨៥ ហ.ត ស្មើនឹង ៥៧២ គ្រួសារ ដែលសរុបស្មើនឹង ៥.០៧៦ តោន និងមានកសិករចូលរួមផលិត ២.១១៦ គ្រួសារ និងមានបងប្អូនជនជាតិភាគតិច ប្រមាណ ៧០%នៃអ្នកផលិតសរុប។
ពិធីចុះកិច្ចសន្យាទិញលក់នេះ រៀបចំឡើង មានការចូលរួមពីលោកបណ្ឌិត ចាយ ជីម ប្រធាននាយកដ្ឋានកសិ-ឧស្សាហកម្មនៃក្រសួងកសិកម្ម លោកបណ្ឌិតសុង ឃាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តមណ្ឌលគិរី, លោក មូល សារិទ្ធ អនុប្រធានមន្ទីរពាណិជ្ជកម្មខេត្ត មណ្ឌលគិរី, លោក សី ទូច អភិបាលស្រុកកោះញែក លោក កាន់ គន្ធី អគ្គនាយក CACC។
លោក អៀ ចុង អ្នកសម្របសម្រួលអង្គការអុកស្វាមកម្ពុជា និងកញ្ញា ចក់ មួយគា តំណាងកម្មវិធីស្បៀងអាហារពិភពលោក (WFP) ប្រចាំកម្ពុជា និងមានការចូលរួមផងដែរពីសំណាក់ អស់លោកលោកស្រី ដែលជាឃុំ មេភូមិ មន្ត្រីកសិកម្មឃុំ ប្រធានសហគមន៍កសិកម្ម និងតំណាងក្រុមផលិត និងតំណាងស្ថាប័ននិងដៃគូពាក់ព័ន្ធផ្សេងៗទៀតចំនួន ៨៤នាក់ ស្រី ៤៦។
ពិធីចុះកិច្ចសន្យានេះ គឺជាឆ្នាំទី៣នៃដំណើរការអនុវត្តគម្រោង “ធ្វើឱ្យប្រសើរឡើងវិញនូវកសិកម្មសរីរាង្គសម្រាប់កសិករខ្នាតតូចនៅភាគខាងជើងប្រទេសកម្ពុជា” ដែលបាននឹងកំពុងអនុវត្តរួមគ្នា រវាង CACC និងកម្មវិធីស្បៀងអាហារពិភពលោក(WFP) ដែលគម្រោងនេះទទួលបានថវិកាគាំទ្រពីកម្មវិធីកសិកម្មនិងសន្តិសុខស្បៀងសកល(GAFSP) នៃធនាគារពិភពលោក និងគម្រោង Rice Tech ដែលទទួលបានការគំាទ្រពីរដ្ឋាភិបាលហូឡង់ ក្នុងគោលបំណងចូលរួមចំណែកលើកកម្ពស់ជីវភាពប្រជាកសិករនៅភាគខាងជើងប្រទេសកម្ពុជា ជាពិសេសខេត្តមណ្ឌលគិរីនិងខេត្តរតនៈគិរី។
ដើម្បីសម្រេចបាននូវគោលដៅរបស់គម្រោង ការផ្សារភ្ជាប់កិច្ចសន្យាផលិតកម្មកសិកម្ម និងខ្សែសង្វាក់ផ្គត់ផ្គង់ស្រូវ គឺដើរតួនាទីយ៉ាងសំខាន់ ក្នុងការផ្សារភ្ជាប់ផលិតផលស្រូវសរីររាង្គកសិករទៅកាន់ទីផ្សារតាមរយៈគម្រោង ដោយCACC ជាអ្នកប្រមូលទិញ និងក្រុមហ៊ុនអេមរុរ៉ាយស៍ ជាអ្នកនាំចេញផលិតផលសរីរាង្គទាំងនោះទៅកាន់ទីផ្សារអន្តរជាតិ។
លើសពីនេះ CACC ក្រោមកិច្ចសហការជាមួយមន្ទីរពាណិជ្ជកម្មខេត្តមណ្ឌលគិរី ដែលមន្ទីរបាននឹងកំពុងអនុវត្ត “គម្រោងជំរុញទីផ្សារសម្រាប់កសិករខ្នាតតូច” ហៅកាត់ថា អេមស៍ (AIMS) ក៏បានលើកទឹកចិត្តផងដែរសម្រាប់ក្រុមផលិតទាំងអស់ទូទាំងខេត្តមណ្ឌលគិរី និងខេត្តរតនៈគិរី ដែលចង់ផ្សារភ្ជាប់កិច្ចសន្យាទិញ-លក់ជាមួយក្រុមហ៊ុន ជាពិសេសប្រភេទពូជស្រូវប្រណីតមានដូចជា ពូជស្រូវសែនក្រអូប និងពូជស្រូវផ្ការំដួលជាដើម៕ ដោយ ហៃ ស៊ីណា
