ភ្នំពេញ៖ ថ្មីៗនេះ ក្រុមហ៊ុន ស៊ីធី រ៉ាយស៍ អ៊ឹមផត អិចផត ខូ អិលធីឌី (City Rice Import Export Co., Ltd) លោក លី លាង អគ្គនាយករង និងរោងម៉ាស៊ីនកិនស្រូវ ឡាយសែ និងមន្រ្តីជំនាញកសិកម្មខេត្ត, លោក ហាក់ ង៊ិក ប្រធានផ្នែកគុណភាពស្រូវ បានដឹកនាំកិច្ចប្រជុំ និងធ្វើបទបង្ហាញអំពីស្ថានភាពបច្ចុប្បន្នរបស់ក្រុមហ៊ុន និងតម្លៃស្រូវដែលកំពុងធ្លាក់ចុះ។
ក្នុងឱកាសជួបជាមួយមន្ត្រីក្រសួងកសិកម្ម រុក្ខាប្រមាញ់ និងនេសាទ ជាច្រើនរូប លោក លី លាង បានលើកឡើងអំពីបញ្ហាតម្លៃអង្ករជាសកល ដែលកំពុងធ្លាក់ចុះ និងបញ្ហាដែលរោងម៉ាស៊ីនកំពុងប្រឈមមុខ ដូចជាកាកសំណល់ អង្កាម កន្ទក់ និងកញ្ចុងអង្ករ ដែលបង្កឱ្យមានការរាំងស្ទះក្នុងដំណើរការចង្វាក់ផលិតកម្មកិនស្រូវ។ ដែលនាំឲ្យក្លាយជារបាំងរបស់រោងម៉ាស៊ីនផ្សេងៗក្នុងការប្រមូលស្រូវពីប្រជាកសិករ។
ដើម្បីដោះស្រាយបញ្ហានេះ ត្រូវមានយុទ្ធសាស្រ្ត និងដំណោះស្រាយឲ្យទាន់ពេលវេលា កុំអោយស្ទះដល់ ប្រតិបត្តិការរបស់រោងម៉ាស៊ីននីមួយៗ។ បើសិនជារោងម៉ាស៊ីនក្នុងស្រុកអសមត្ថភាពប្រមូលស្រូវ នោះវៀតណាមនិងទំលាក់តំលៃស្រូវរបស់កសិករយើងបានតាមចិត្ត។
លោក ហាក់ ង៊ិក ប្រធានផ្នែកគុណភាព ក៏បានបង្ហាញ និងបង្រៀនអំពីវិធីស្គាល់ស្រូវគុណភាព លេខ ១ និងលេខ ២ ដល់មន្ត្រីជាច្រើនរូប ដើម្បីឲ្យមានការយល់ដឹងច្បាស់លាស់អំពីកម្រិតគុណភាពស្រូវ។ ទាំងក្រុមហ៊ុន និងមន្ត្រីកសិកម្ម បានបញ្ជាក់ថា តម្លៃស្រូវកំពុងធ្លាក់ចុះយ៉ាងច្រើន។ ដូច្នេះ ការចូលរួមរបស់រោងម៉ាស៊ីននីមួយៗក្នុងការទិញស្រូវពីប្រជាកសិករឲ្យបានច្រើន ត្រូវបានចាត់ទុកថាជាចំណុចសំខាន់ក្នុងការជួយទប់ស្កាត់ការធ្លាក់ចុះ និងជួយលើកស្ទួយទឹកចិត្តដល់កសិករ។
ជារួមទាំងរោងម៉ាស៊ីនកិនស្រូវនិងមន្រ្តីកសិកម្ម បានអំពាវនាវដល់បងប្អូនកសិករទាំងអស់ កុំច្រូតស្រូវដែលមិនទាន់ទុំល្អ ឬនៅខ្ចីច្រើន ដែលនាំឱ្យប៉ះពាល់ដល់គុណភាពស្រូវ និងធ្លាក់ថ្លៃ ហើយអ្នកប្រមូលទិញស្រូវ ក៏មិនចង់ទិញស្រូវប្រភេទនេះពីបងប្អូនកសិករផងដែរ។ ប្រសិនបើបងប្អូនប្រមូលផលស្រូវបានទុំល្អនោះនឹងធ្វេីឱ្យទទួលបានផលចំណេញទាំងអស់គ្នា ទាំងប្រជាកសិករ និងអ្នកកែច្នៃអង្ករ៕ ដោយ ហៃ ស៊ីណា
