បាត់ដំបង៖ ក្រុមហ៊ុន ស៊ីធី រ៉ាយស៍ អ៊ីមផត អិចផត ខូ អិលធីឌី (City Rice Import Export Co., Ltd) និងរោងម៉ាស៊ីនកិនស្រូវ ឡាយសែ កាលពីថ្ងៃទី១៧ ខែសីហា ឆ្នាំ២០២៥នេះ បានជម្រាបជូនដំណឹងដល់ប្រជាកសិករ និងសាធារណជនជាទីគោរពថា ក្រុមហ៊ុនមិនដែលព្រងើយកន្តើយចំពោះការប្រមូលទិញស្រូវពីកសិករឡើយ។ ទោះបីជាសំណង់មួយចំនួននៅមិនទាន់បញ្ចប់ ក្រុមហ៊ុនក៏នៅតែខិតខំប្រឹងប្រែងប្រមូលស្រូវជាបន្តបន្ទាប់។
យោងតាមការប្រកាសរបស់ក្រុមហ៊ុនខាងលើ គឺក្នុងកំឡុងពេលនេះ បុគ្គលិកគ្រប់ជាន់ថ្នាក់បានរួមគ្នាខិតខំប្រឹងប្រែង អស់ពីកម្លាំងពីកាយចិត្ត ទោះមានការលំបាក ឬឧបសគ្គក៏ដោយ ដើម្បីធានាថា ការប្រមូលស្រូវអាចធ្វើទៅបានពេញលេញ និងទាន់ពេលវេលា។
ក្រុមហ៊ុន ស៊ីធី រ៉ាយស៍ អ៊ឹមផត អិចផត ខូ អិលធី និងរោងម៉ាស៊ីនកិនស្រូវ ឡាយសែ គឺយកចិត្តទុកដាក់ចំពោះផលប៉ះពាល់របស់បងប្អូនកសិករ ព្រោះរោងម៉ាស៊ីនរស់នៅ និងធ្វើការជាមួយប្រជាកសិករជារៀងរាល់ថ្ងៃ។ យើងយល់ពីអារម្មណ៍ពេលមានភ្លៀងធ្លាក់ និងទឹកជន ដែលនាំឲ្យកសិករមានកង្វល់ និងបារម្ភជាច្រើនអំពីស្រែស្រូវរបស់បងប្អូន។
ខាងរោងម៉ាស៊ីន សូមជម្រាបជូនដល់បងប្អូនប្រជាកសិករឲ្យបានជ្រាបថា បើសិនស្រូវនៅខៀវ សូមកុំប្រញាប់ប្រញាល់ច្រូតកាត់ឡើយ។ សូមអត់ធ្មត់បន្តិចទៀត ដើម្បីឲ្យស្រូវទុំស្របពេល និងមានគុណភាពល្អ ព្រោះវានឹងជួយឲ្យបងប្អូនទទួលបានតម្លៃល្អប្រសើរ។
លើសពីនេះ បងប្អូនប្រជាកសិករ កុំប្រញាប់ច្រូតពេក រោងម៉ាស៊ីននៅតែបន្តទិញស្រូវស្អាតជារៀងរាល់ថ្ងៃ ហើយរោងម៉ាស៊ីនសង្ឃឹមថា សារនេះនឹងធ្វើឱ្យបងប្អូនកសិករឲ្យមានកម្លាំងចិត្ត និងឆ្លងកាត់ស្ថានភាពពិបាកៗនេះ ដោយជឿជាក់ថា ក្រោយពេលភ្លៀង គឺមេឃស្រឡះ។
ចំណែក ឯកឧត្តម ឡាយ ឈុនហាំង នាយកគ្រប់គ្រងទូទៅរបស់ក្រុមហ៊ុន ស៊ីធីរាយស៍ កាលពីថ្ងៃទី១៧ ខែសីហានេះ បានចុះសម្រួលការកកស្ទះស្រូវនៅសហគមន៍ ខ្នាចរមាស ស្រុកថ្មគោល ជាងមួយរយគោយន្ត ដោយសារបញ្ហាគុណភាព សំណេីម និងស្រូវខៀវ ព្រមទាំងភ្លៀងធ្លាក់រហូតទៀត។ មូលហេតុចម្បង ដែលបងប្អូនប្រជាកសិករសម្រុកច្រូតទាំងស្រូវនៅខៀវ ហើយសើម ដោយសារតែស្រូវដួល បណ្តាលមកពីភ្លៀងធ្លាក់ជាប់គ្នាប៉ុន្មានថ្ងៃនេះ។
ឯកឧត្តមបានសំណូមពរឱ្យបងប្អូនប្រជាកសិករ ធ្វើការឱ្យជិតស្និទ្ធជាមួយមន្រ្តីកសិកម្មឃុំ ដើម្បីកំណត់ពេលដាំដុះ និង ពេលវេលាច្រូតកាត់ឱ្យមានសមាមាត្រទៅនឹងកម្លាំងឡរសម្ងួតរបស់រោងម៉ាស៊ីនកិនស្រូវក្នុងស្រុកយើង។ ដូច្នេះសូមបងប្អូនប្រជាកសិករកុំមានការព្រួយបារម្មណ៍ខ្លាំង ដោយខ្លាចពុំមានអ្នកទទួលទិញស្រូវ។ នៅប៉ុន្មានថ្ងៃខាងមុខនេះ ក្រុមហ៊ុននឹងនៅទទួលទិញស្រូវពីបងប្អូនកសិកររហូត ចន្លោះពី១៥០០តោន ទៅ២០០០តោនក្នុងមួយថ្ងៃ។
ក្រុមហ៊ុនសូមថ្លែងអំណរគុណយ៉ាងជ្រាលជ្រៅចំពោះកសិករ និងដៃគូទាំងអស់ ដែលបានផ្ដល់ទំនុកចិត្ត និងសហការជាមួយក្រុមហ៊ុន ស៊ីធីរាយស៍ ជានិច្ចនាពេលកន្លងមក៕