ខេត្តកណ្តាល៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍជនបទ និងកសិកម្ម និងជាប្រធានក្រុមការងារចលនា យុវជនស្រុកខ្សាច់កណ្តាល ខេត្តកណ្កាល និងសហការី,នៅថ្ងៃទី១៦ ខែសីហាឆ្នាំ២០២៥នេះ បានអញ្ជើញចូលរួមក្នុងពិធីសំណេះសំណាលជាមួយបងប្អូនប្រជាពលរដ្ឋខ្មែរ ដែលជាពលករទើបត្រឡប់មកពីប្រទេសសៀម ដែលរៀបចំឡើងនៅទីស្នាក់ការគណបក្សប្រជាជនកម្ពុជា ស្រុកខ្សាច់កណ្តាលមានសរុបចំនួន២០៥នាក់។
នៅក្នុងពិធីសំណេះសំណានេះ គឺមានការអញ្ជើញចូលរួមផងដែរ ពីលោក ចេង ឌីណា អភិបាលនៃគណៈអភិបាលស្រុកខ្សាច់កណ្តាល និងជាប្រធានគណៈកម្មាធិការគណបក្សស្រុកខ្សាច់កណ្តាល និងសមាជិក សមាជិកា និងលោក លោកស្រី ដែលជាតំណាងរោងចក្រក្នុងតំបន់អភិវឌ្ឍន៍សេដ្ឋកិច្ចពិសេស 7 NGផងដែរ។
បន្ទាប់ពីបានស្តាប់របាយការណ៍សង្ខេបរបស់ប្រធានគណៈកម្មាធិការគណបក្សស្រុក និងមតិលើកឡើងដោយផ្តាល់តំណាងរោងចក្រ ស្តីអំពីឱកាសការងារថ្មីៗ ជូនដល់ពលករចំណាកស្រុកមកពីប្រទេសថៃរួចមក ឯកឧត្តមបណ្ឌិត កៅ ថាច បានមានប្រសាសន៍ថា ការជួបជុំនៅថ្ងៃនេះ ដើម្បីសំណេះសំណាល និងសួរសុខទុក្ខដល់បងយើង ដែលទើបវិលត្រឡប់មកពីប្រទេសសៀម ហើយការជួបជុំនេះបង្ហាញពីការខ្វល់ខ្វាយចំពោះសុខទុក្ខដល់បងប្អូនពលករយើងទាំងអស់ ជាពិសេស ពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ដែលតែងតែគិតគូរពីសុខទុក្ខ ក៏ដូចជាសុខសុវត្ថិភាពនិងការរស់នៅរបស់បងប្អូនជានិច្ចកាល។
ឯកឧត្តមបណ្ឌិត កៅ ថាច បានរំលឹកថា សង្គ្រាមដែលបានកើតឡើងប៉ុន្មានថ្ងៃកន្លងទៅរាជរដ្ឋាភិបាលយើងមានការសោកស្តាយចំពោះការឈ្លានពានរបស់ភាគីសៀមមកលើបូរណភាពទឹកដីកម្ពុជា និងបានធ្វើឲ្យវីរ:កងទ័ពយើងពលីក្នុងសមរភូមិ មានអ្នកស្លាប់ របួស និងមានជនភៀសសឹកចាកចោលលំនៅឋាន ហើយប្រទេសកម្ពុជាយើងធ្លាប់មានបទពិសោធន៍យ៉ាងគ្រប់គ្រាន់ចំពោះរឿងសង្រ្គាម ដូច្នេះ យើងមិនត្រូវការសង្រ្គាមទៀតទេ យើងត្រូវការសន្តិភាព និងមិនចង់បង្កសង្រ្គាមជាមួយប្រទេសណាមួយនោះទេ។
បន្ទាប់ពីសំណេះសំណាលរួច ឯកឧត្តមបណ្ឌិត កៅ ថាច ក៏បានមានប្រសាសន៍ផ្តាំផ្ញើដល់បងប្អូនជាពលករ ដែលទើបត្រឡប់មកពីប្រទេសសៀម ត្រូវនាំគ្នាធ្វើការងារក្នុងស្រុករបស់យើង ដែលរាជរដ្ឋាភិបាលកម្ពុជាយើងបានផ្តល់ជូននូវឱកាសការងារថ្មីៗជាច្រើនកន្លែងសម្រាប់បងប្អូន និងមានជំនាញផ្សេងៗគ្នាជាច្រើន។ ជាពិសេស នៅស្រុកខ្សាច់កណ្តាល មានរោងចក្រច្រើនផ្នែកមានដូជាឧស្សាហកម្មកាត់ដេរ, រោងចក្រផលិតខ្សែភ្លើងជាដើម, ហើយបងប្អូនអាចចូលធ្វើការបានភ្លាមក៏បងប្អូនទទួលបានបៀវត្ស ស្របតាមសមត្ថភាពការងារ ។
លើសពីនេះឯកឧត្តមបណ្ឌិតប្រតិភូក៏បានលើកទឹកចិត្តឲ្យបងប្អូនជាពលករមកពីប្រទេសសៀម អាចមានជម្រើសចូលបំពេញការងារក្នុងចម្ការ ឬដាំដុះបន្លែនៅកសិដ្ឋានជ័យធំ ដែលមានផ្ទះសំណាញ់ស្រាប់ជាច្រើនខ្នង ហើយបងប្អូននឹងទទួលបានការបណ្តុះបណ្តាលជំនាញបន្ថែមទៀត ដូចជាការដាំដុះបន្លែ ការចិញ្ចឹមសត្វ និងវារីវប្បកម្មជាដើម។
ជាមួយគ្នានេះដែរ នៅក្នុងស្រុកខ្សាច់កណ្តាល ខេត្តកណ្តាល ឯកឧត្តមបណ្ឌិត កៅ ថាច បានបញ្ជាក់ជូនថា ដោយមានការគិតគូរពីឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, ប្រធានក្រុមការងារថ្នាក់កណ្តាលចុះជួយខេត្តកណ្តាល តែងតែយកចិត្តទុក្ខដាក់ខ្ពស់ដល់ប្រជាពលរដ្ឋគ្រប់ពេលវេលា ជាពិសេសបងប្អូន ដែលទើបវិលត្រឡប់មកពីប្រទេសសៀម ហើយនៅចំពោះមុខ សូមបងប្អូនយើងត្រូវតែខិតខំបំពេញការងារក្នុងស្រុកយើងឲ្យខ្លាំងមានចំណេះ និងជំនាញច្បាស់លាស់ថែមទៀត ដើម្បីចូលរួមចំណែកអភិវឌ្ឍន៍ជាតិទាំងអស់គ្នាជាមួយរាជរដ្ឋាភិបាល។
បន្ទាប់ពីបញ្ចប់ពិធីសំណេះសំណាលរួចមក ឯកឧត្តមបណ្ឌិតប្រតិភូបានក៏បាននាំយកសម្ភារៈ និងគ្រឿងឧបភោគ បរិភោគមួយចំនួន មានដូជាអង្ករ ទឹកត្រី ទឹកស៊ីអីវ ត្រីខ មីជាដើម ដែលជាអំណោយរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី ដើម្បីចែកជូនដល់បងប្អូនសម្រាប់យកទៅដោះស្រាយសម្រាលបន្ទុកការលំបាកចំពោះមុខមួយចំនួនក្នុងគ្រួសារ ទម្រាំទទួលបានការងារធ្វើនៅក្នុងស្រុក៕ ដោយ ហៃ ស៊ីណា
