ទីក្រុងហាណូយ៖ កាលពីសប្តាហ៍មុន អាជ្ញាធរវៀតណាមបានឆ្មក់ចូលឆែកឆេរសិប្បកម្មបណ្តុះសណ្តែងដ៏ធំពីរកន្លែង នៅក្នុងប្រទេសវៀតណាម ដោយសង្ស័យថា មានប្រើប្រាស់សារធាតុអ័រម៉ូនខុសច្បាប់ ដែលត្រូវបានហាមឃាត់ក្នុងសណ្តែកបណ្ដុះ ព្រោះវាបង្កផលប៉ះពាល់ធ្ងន់ធ្ងរដល់សុខភាពអ្នកបរិភោគ។
នៅក្នុងការឆ្មក់ចូលឆែកឆេរទីតាំងបណ្តុះសណ្តែក ស្ថិតនៅក្នុងខេត្តភាគខាងជើងប្រទេសវៀតណាម ដែលមានព្រំប្រទល់ជាប់ប្រទេសចិន កាលពីថ្ងៃទី២៣ ខែឧសភា មន្ត្រីនគរបាលវៀតណាម បានរឹបអូសយកធុងសម្រាប់បណ្តុះសណ្តែកចំនួន៨៧០ធុង ក្នុងនោះមានសណ្តែកបណ្តុះសរុបជាងបីតោន។
ម្ចាស់សិប្បកម្មសណ្តែកបណ្តុះទាំងពីរកន្លែងខាងលើ បានសារភាពប្រាប់មន្ត្រីនគរបាលថា ពួកគាត់បានត្រាំសណ្តែកបណ្តុះនៅក្នុងទឹកសារធាតុគីមីម្យ៉ាង ឈ្មោះ បេនហ្សីល អាដេនីន (Benzyl Adenine 6-BAP) ដែលជាអរម៉ូនជួយឱ្យសណ្តែកឆាប់ដុះលូតលាស់បានវែងល្អ។
លទ្ធផលធ្វើកោសល្យវិច្ច័យបានរកឃើញសារធាតុ បេនហ្សីល អាដេនីន នៅក្នុងសណ្តែកបណ្តុះពិតប្រាកដមែន ប្រសិនបើមនុស្សណាមបរិភោគសណ្តែកបណ្តុះនេះញឹកញាប់ អាចបណ្តាលឱ្យបង្កផលប៉ះពាល់យ៉ាងធ្ងន់ធ្ងរដោយធ្វើឱ្យខូចសរីរាង្គសំខាន់ៗរបស់មនុស្ស ដូចជាថ្លើម តម្រងនោម និងសួត ហើយថែមទាំងបណ្តាលឱ្យស្លាប់ទៀតផង។
សិប្បកម្មបណ្តុះសណ្តែកមួយកន្លែង ដែលបានដំណើរការតាំងពីខែឧសភា ឆ្នាំ២០២៤ ត្រូវបានគេរាយការណ៍ថា ធ្លាប់ផលិត និងចែកចាយសណ្តែកបណ្តុះប្រមាណ១៨០តោន ដែលសណ្តែកបណ្តុះទាំងនោះសុទ្ធតែប្រើសារធាតុគីមី បេនហ្សីល អាដេនីន។ ចំណែកសិប្បកម្មមួយទៀត ក៏ធ្វើអាជីវកម្មស្រដៀងគ្នានេះដែរ ដោយបានផលិត និងចែកចាយសណ្តែកបណ្តុះប្រមាណ១៦៨តោន ជារៀងរាល់ឆ្នាំដោយផ្គត់ផ្គង់នៅទូទាំងខេត្តមានព្រំដែនជាប់ប្រទេសចិន។
ពាក់ព័ន្ធនឹងសណ្តែកបណ្តុះប្រើសារធាតុគីមី បេនហ្សីល អាដេនីន នេះដែរ កាលពីថ្ងៃទី១១ ខែមេសា ឆ្នាំ២០២៥នេះ នគរបាលវៀតណាម បានរកឃើញសណ្តែកបណ្តុះរាប់តោន នៅក្នុងរោងសិប្បកម្មមួយកន្លែង ស្ថិតនៅក្នុងខេត្តភាគកណ្តាលប្រទេសវៀតណាម ដែលមានព្រំប្រទល់ជាប់ប្រទេសឡាវ។
នៅក្នុងប្រតបត្តិការនោះ អាជ្ញាធរវៀតណាមបានចាប់ខ្លួនមនុស្សបួននាក់ ចោទពីបទផលិត និងចែកចាយសណ្តែកបណ្តុះចំនួន៣៥០០តោន ដែលមានផ្ទុកសារធាតុគីមីហាមឃាត់។
នគរបាលវៀតណាម បានរឹបអូសសណ្តែកបណ្តុះមានផ្ទុកសារធាតុគីមីប្រមាណ២៥តោន បណ្តុះនៅក្នុងធុងប្លាស្ទីក ព្រមទាំងរឹបអូសបានសារធាតុគីមី បេនហ្សីល អាដេនីន សរុបទាំងអស់ចំនួន២៥លីត្រ។
ក្រុមអ្នកស៊ើបអង្កេត បានរកឃើញសារធាតុគីមីហាមឃាត់ ចំនួន១៥០លីត្រ ត្រូវបានម្ចាស់សិប្បកម្មកែច្នៃរួចហើយ សម្រាប់ត្រាំសណ្តែកបណ្តុះឱ្យលូតបានវែង និងខ្ចីល្វក់តែម្តង។
សារធាតុគីមី បេនហ្សីល អាដេនីន គឺជាសារធាតុគីមីសម្រាប់ជួយជំរុញឱ្យបន្លែលូតលាស់យ៉ាងឆាប់រហ័ស ប៉ុន្តែសារធាតុនេះត្រូវបានហាមឃាត់មិនឱ្យប្រើលើចំណីអាហារឡើយ ព្រោះវាបណ្តាលឱ្យមានបញ្ហាសុខភាពធ្ងន់ធ្ងរ ហើយប្រសិនបើបរិភោគវាច្រើនអាចបណ្តាលឱ្យមនុស្សស្លាប់តែម្តង៕
