រាជធានីភ្នំពេញ៖ យោងតាមក្រសួងពាណិជ្ជកម្ម កាលពីពេឡថ្មីៗបានបង្ហាញថា មានក្រុមហ៊ុនក្នុងស្រុកចំនួនពីរ ក្នុងនោះមានក្រុមហ៊ុន អ៊ែមភល អាហ្គ្រោប្រដាក់ និងក្រុមហ៊ុន គីរីរម្យ ហ្វ៊ូដ ប្រដាក់សិន បាននាំចេញគ្រាប់ស្វាយចន្ទី និងស្វាយកែវរមៀតស្ងួតលើកដំបូង ទៅកាន់ប្រទេសម៉ាឡេស៊ី បន្ទាប់ពីបានចុះអនុស្សរណៈយោគយល់គ្នាជាមួយក្រុមហ៊ុន ត្រាគិនតិច សូលូសិន (TRACKINTECH SOLUTIONS SND BHD) ម៉ាឡេស៊ី កាលពីថ្ងៃទី២៣ ខែមករា ឆ្នាំ២០២៥កន្លងទៅ។
ក្រសួងពាណិជ្ជកម្មបង្ហាញអំពីការនាំចេញផលិតផលរបស់ក្រុមហ៊ុនទាំងពីរខាងលើ ធ្វើឡើងក្នុងកំពុងពេលលោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម បានដឹកនាំក្រុមការងារនៃក្រសួងពាណិជ្ជកម្ម ចុះពិនិត្យលើការនាំចេញស្វាយចន្ទី និងស្វាយកែវរមៀតសម្ងួត ចេញទៅកាន់ប្រទេសម៉ាឡេស៊ី កាលថ្ងៃទី៨ ខែឧសភា ឆ្នាំ២០២៥ នៅទីតាំងផែស្ងួត អូលែរ វើលវ៉ាយដ៏ ឡូជីស្ទិក ក្នុងរាជធានីភ្នំពេញ ។
ក្រសួងពាណិជ្ជកម្មកម្ពុជា បានគូសបញ្ជាក់ថា “នេះជាសមិទ្ធផលដំបូងសម្រាប់ក្រុមហ៊ុនកម្ពុជាទាំងពីរ ក្នុងការនាំចេញផលិតផលស្វាយចន្ទី នៅក្នុងខែឧសភានេះ ហើយការដឹកជញ្ជូនចែកចេញជា ៤ ដំណាក់កាល ក្នុងការបញ្ជាទិញចំនួន ២០០កេស ស្មើនឹង១០ ០០០កញ្ចប់ និងស្វាយកែវរមៀតសម្ងួតចំនួន ២១០កេស ស្មើរនឹង១០ ៥០០កញ្ចប់ ទៅកាន់ប្រទេសម៉ាឡេស៊ី ហើយនឹងធ្វើការចែកចាយបន្តទៅកាន់ប្រទេសសិង្ហបុរី ឥណ្ឌូណេស៊ី និងប្រ៊ុយណេផងដែរ”។
កម្ពុជាកំពុងក្លាយជាប្រទេសនាំចេញគ្រាប់ស្វាយចន្ទីដ៏ធំនៅក្នុងទីផ្សារពិភពលោក។ យោងតាមទិន្នន័យរបស់សមាគមគ្រាប់ស្វាយចន្ទី អ្នកដាំដុះកម្ពុជាបាននាំចេញគ្រាប់ស្វាយចន្ទីឆៅចំនួន ៨៥០ ០០០ តោន ដែលមានតម្លៃ១,១៥ ពាន់លានដុល្លារ កាលពីឆ្នាំមុន។
គួរម្លឹកជូនផងដែរថា កាលថ្ងៃទី២៣ ខែមករា ឆ្នាំ២០២៥ នៅទីស្តីការក្រសួងពាណិជ្ជកម្ម លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម បានចូលរួមធ្វើជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការពង្រឹង និងពង្រីកទីផ្សារអន្តរជាតិ សម្រាប់ផលិតផលស្វាយចន្ទី និងស្វាយកែវរមៀតកម្ពុជា រវាងក្រុមហ៊ុនអ៊ែមភល អាហ្គ្រោប្រដាក់ និងក្រុមហ៊ុន ត្រាគិនតិច សូលូសិន ម៉ាឡេស៊ី និងរវាងក្រុមហ៊ុនគីរីរម្យ ហ្វ៊ូដ ប្រដាក់សិន ជាមួយក្រុមហ៊ុន ត្រាគិនតិច សូលូសិន ម៉ាឡេស៊ី ហើយពិធីនេះ មានការអញ្ជើញចូលរួមពីឯកអគ្គរាជទូតម៉ាឡេស៊ីប្រចាំនៅព្រះរាជាណាចក្រកម្ពុជា ឯកឧត្តម លោកជំទាវអនុរដ្ឋលេខាធិការ អគ្គនាយរង ប្រធាននាយកដ្ឋាន និងមន្ត្រីពាក់ព័ន្ធរបស់ក្រសួងពាណិជ្ជកម្ម ព្រមទាំងសហព័ន្ធស្វាយចន្ទីកម្ពុជា ក្រុមហ៊ុនស្វាយចន្ទី ក្រុមហ៊ុនស្វាយ ក្រុមហ៊ុនម៉ាឡេស៊ី និងអង្គការជាច្រើនរូបផងដែរ។
យោងតាមស្មារតីនៃការចុះអនុស្សរណៈខាងលើនេះ ក្រុមហ៊ុន ត្រាគិនតិច សូលូសិន ម៉ាឡេស៊ី នឹងបញ្ជាទិញស្វាយចន្ទីកែច្នៃពីក្រុមហ៊ុនអ៊ែមភល អាហ្គ្រោប្រដាក់ និងស្វាយសម្ងួតពីក្រុមហ៊ុនគីរីរម្យ ហ្វ៊ូដ ប្រដាក់សិន ក្នុងគោលបំណងលើកកម្ពស់ ផលិតផលស្វាយចន្ទី និងស្វាយកែវរមៀតកម្ពុជា បង្កើតលក្ខខណ្ឌដែលអ្នកចែកចាយនឹងមានសិទ្ធិផ្តាច់មុខក្នុងការធ្វើទីផ្សារ និងដាក់លក់ នៅក្នុងប្រទេសម៉ាឡេស៊ី ឥណ្ឌូនេស៊ី សិង្ហបុរី និងប្រទេសប្រ៊ុយណេ៕
