ទីក្រុងហ្សាការតា៖ រដ្ឋាភិបាលឥណ្ឌូនេស៊ី បានបដិសេធសំណើសុំទិញអង្ករពីសំណាក់ប្រទេសម៉ាឡេស៊ី ដោយរដ្ឋមន្ត្រីក្រសួងកសិកម្ម ពន្យល់ប្រាប់ទៅវិញថា ឥណ្ឌូណេស៊ីមិនអាចនាំចេញគ្រាប់ធញ្ញជាតិនៅពេលនេះបានទេ ដោយសារប្រទេសរបស់លោកត្រូវការរក្សាទុកអង្ករសម្រាប់បម្រុងក្នុងស្រុក។
លោក អានឌី អំរ៉ាន់ ស៊ូឡៃម៉ាន (Andi Amran Sulaiman) រដ្ឋមន្ត្រីក្រសួងកសិកម្ម ឥណ្ឌូនេស៊ី បាននិយាយថា រដ្ឋាភិបាលម៉ាឡេស៊ី បានស្នើសុំនាំចូលអង្ករពីប្រទេសឥណ្ឌូនេស៊ី ដើម្បីបំពេញតម្រូវការនៅក្នុងប្រទេស ខណៈតម្លៃស្បៀងអាហារនៅក្នុងប្រទេសម៉ាឡេស៊ី ឡើងថ្ងៃជាបន្តបន្ទាប់។
លោកបានថ្លែងក្នុងសន្និសីទសារព័ត៌មានមួយ បន្ទាប់ពីកិច្ចប្រជុំជាមួយរដ្ឋមន្ត្រីក្រសួងកសិកម្ម និងសន្តិសុខស្បៀង ម៉ាឡេស៊ី លោក មូហាម៉ាដ ប៊ីន សាបូ (Mohamad Bin Sabu) ក្នុងទីក្រុងហ្សាកាតា កាលពីដើមសប្តាហ៍មុនថា “គួរឱ្យចាប់អារម្មណ៍ណាស់ ដែលម៉ាឡេស៊ី បានសួរមុនថា តើអាចនាំចូលអង្ករពីប្រទេសឥណ្ឌូនេស៊ីបានដែរឬទេ?”។
លោកបានមានប្រសាសន៍ថា “ខ្ញុំបាននិយាយប្រាប់ថា សម្រាប់ពេលនេះ យើងនឹងរក្សាក្នុងស្តុកសិន។ យើងរងចាំមើលស្ថានភាពអាកាសធាតុសិន។
លោករដ្ឋមន្ត្រីកសិកម្ម បាននិយាយទៀតថា ស្តុកអង្ករបម្រុងរបស់រដ្ឋាភិបាល នៅទីភ្នាក់ងារភស្តុភាររដ្ឋរបស់ឥណ្ឌូនេស៊ី នាពេលបច្ចុប្បន្នមានបរិមាណចំនួន៣,៣លានតោន ដោយលោករដ្ឋមន្ត្រីបានបន្ថែមថា គោលដៅរបស់រដ្ឋាភិបាល គឺដើម្បីបង្កើនបរិមាណអង្ករឱ្យបានដល់បួនលានតោននៅក្នុងខែឧសភា ឆ្នាំ២០២៥នេះ។
លោកបានមានប្រសាសន៍ថា កង្វះខាតការផ្គត់ផ្គង់បានជំរុញឱ្យតម្លៃអង្ករកើនឡើងនៅក្នុងប្រទេសម៉ាឡេស៊ី ដោយលោកពន្យល់ថា ចំណែកប្រទេសឥណ្ឌូនេស៊ី អាចបំពេញបានត្រឹមតែប្រហែល៤០ ទៅ៥០ភាគរយនៃតម្រូវការអង្ករជាក់ស្តែង។
ចំណែក លោក មូហាម៉ាដ ប៊ីន សាប៊ូ បាននិយាយថា ទោះបីជាមិនមានការណែនាំជាផ្លូវការណាមួក្នុងការនាំចូលអង្ករពីប្រទេសឥណ្ឌូនេស៊ីក៏ដោយ ក៏ក្រសួងរបស់លោកនឹងពិភាក្សាអំពីផែនការនេះបន្ថែមទៀត។
លោកបានមានប្រសាសន៍ក្នុងអំឡុងកម្មវិធីដដែលនេះថា មិនទាន់មានការឯកភាពអ្វីទេចំពោះសំណើរសុំទិញងអង្ករនេះ ប៉ុន្តែភាគីទាំងពីរបានពិភាក្សាគ្នាបន្តទៀតជាមួយប្រទេសឥណ្ឌូនេស៊ី ដើម្បីបង្កើនផលិតកម្មស្រូវក្នុងស្រុករបស់ខ្លួនតាមរយៈការផ្លាស់ប្តូរ និងបណ្តុះបណ្តាលបច្ចេកវិទ្យាកសិកម្ម។
ចំណែក រដ្ឋមន្ត្រីក្រសួងកសិកម្មឥណ្ឌូនេស៊ី បាននិយាយថា ក្រសួងកសិកម្ម រុក្ខាប្រមាញ់ និងនេសាទ របស់ប្រទេសជប៉ុនគ្រោងនឹងធ្វើទស្សនកិច្ចនៅប្រទេសឥណ្ឌូនេស៊ី នៅថ្ងៃទី២៩ ខែមេសា ដើម្បីពិភាក្សាអំពីការផ្គត់ផ្គង់អង្ករ។
លោកបានកត់សម្គាល់ថា នៅក្នុងប្រទេសជប៉ុន តម្លៃអង្ករក៏មានការកើនឡើងយ៉ាងខ្លាំងផងដែរ ដោយឡើងដល់ជាង៦ដុល្លារក្នុងមួយគីឡូក្រាម។
សារព័ត៌មានរបស់ជប៉ុន បានរាយការណ៍ កាលពីដើមសប្តាហ៍មុនថា តម្លៃអង្ករនៅក្នុងប្រទេសជប៉ុន បានឡើងថ្លៃអស់រយៈពេល១៥សប្តាហ៍ជាប់ៗគ្នា បើទោះបីជាមានការខិតខំប្រឹងប្រែងរបស់រដ្ឋាភិបាលក្នុងការធ្វើឱ្យទីផ្សារមានស្ថេរភាពដោយប្រឹងបញ្ចេញអង្ករបម្រុងក្នុងស្តុកទុកក៏ដោយ ។
ក្រសួងកសិកម្មរបស់ប្រទេសជប៉ុន បាននិយាយថា តម្លៃជាមធ្យមសម្រាប់អង្ករមានទម្ងន់៥គីឡូក្រាមបានឡើងថ្លៃជិតដល់៣០ដុល្លារ ចាប់ពីថ្ងៃទី៧ ដល់ថ្ងៃទី១៣ ខែមេសា ឆ្នាំ២០២៥ ដែលជាការឡើងថ្លៃខ្ពស់បំផុតសម្រាប់តម្លៃអង្ករនៅក្នុងប្រទេសជប៉ុន។
ផ្អែកតាមតួលេខស្ថិតិរបស់ប្រទេសឥណ្ឌូនេស៊ី ផលិតកម្មស្រូវសរុបចាប់ពីខែមករា ដល់ខែឧសភា ឆ្នាំ២០២៥នេះ ត្រូវបានប៉ាន់ប្រមាណថា នឹងកើនដល់៤៣,៤៧លានតោន។
ប៉ុន្តែបើយោងតាមអ្នកជំនាញកសិកម្ម របស់ឥណ្ឌូនេស៊ីវិញ បានឱ្យដឹងថា កាលពីឆ្នាំ២០២៤ ផលិតកម្មស្រូវប្រចាំឆ្នាំសម្រាប់សាធារណៈមានបរមាណប្រហែល៣០,៦២ លានតោន គឺធ្លាក់ចុះ១,៥៤ភាគរយ បើធៀបនឹងឆ្នាំ២០២៣ ដែលផលិតកម្មស្រូវមានបរិមាណដល់ជា៣១លានតោន៕
