(ភ្នំពេញ)៖ នៅទីស្តីការគណៈរដ្ឋមន្រ្តី នាព្រឹកថ្ងៃទី៨ ខែមេសា ឆ្នាំ២០២៥ គណៈកម្មាធិការជាតិជំរុញចលនាភូមិមួយផលិតផលមួយ សហការជាមួយសហគ្រាសឯកជនក្នុងស្រុក មកពីបណ្តារាជធានី-ខេត្ត បានរៀបចំដាក់តាំងបង្ហាញ និងលក់ផលិតផលរស់ខ្លួន ដើម្បីលើកកម្ពស់ការប្រើប្រាស់ផលិតផលខ្មែរ និងអបអរសាទរឱកាសចូលឆ្នាំថ្មីប្រពៃណីជាតិ។
ពិពរណ៌ភូមិមួយផលិផលមួយផលិតផលមួយនេះ មានរយៈពេលពីរថ្ងៃ គឺចាប់ពីថ្ងៃទី៨ ដល់ថ្ងៃទី៩ ខែមេសា ឆ្នាំ២០២៥ ត្រូវបានប្រារព្ធឡើងនៅទីស្តីការគណៈរដ្ឋមន្រ្តី អគារមិត្តភាពកម្ពុជា-ចិន ដើម្បីចូលរួមអបអរពិធីបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ សប្តស័ក ព.ស ២៥៦៩ និងចូលរួមអបអរសាទរទិវាជាតិលើកកម្ពស់ការប្រើប្រាស់ផលិតផលខ្មែរ ៩ មេសា លើកទី៨ ឆ្នាំ២០២៥ ក្រោមប្រធានបទ «ចូលរួមប្រើប្រាស់ផលិតផលខ្មែរ»។
សហគ្រាសកែច្នៃ វេចខ្ចប់ផលិតផលខ្មែរចំនួន៧១ បានចូលរួមដាក់តាំងលក់ផលិផលរបស់ខ្លួន ក្រោមបរិយាកាសសប្បាយរីករាយ ព្រមទាំងទទួលបានការស្ងើចសរសើរពីថ្នាក់ដឹកនាំជាន់ខ្ពស់ចំពោះផលិតផលកែច្នៃទាំងនេះផងដែរ។
នាពេលរសៀលថ្ងៃទី៩ ខែមេសា ដែលជាថ្ងៃទី២ នៃពិពរណ៌ភូមិមួយផលិតផលមួយ ឯកឧត្តម វង្សី វិសុទ្ទ ឧបនាយករដ្ឋមន្ត្រីប្រចាំការ និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអញ្ជើញទស្សនាការដាក់តាំងលក់នេះ ហើយបានសម្តែងការពេញចិត្តចំពោះផលិផលក្នុងស្រុក ព្រមទាំងលើកទឹកចិត្តដល់កសិករ និងសហគ្រឹនឱ្យប្រឹងផលិត និងកែច្នៃថែមទៀត ដើម្បីលើកកម្ពស់ផលិតផលខ្មែរ។
នៅក្នុងឱកាសអញ្ជើញទស្សនាផលិតផល ឯកឧត្តមឧបនាយករដ្ឋមន្ត្រីក៏បានថ្លៃងកោតសរសើរដល់ធនាគារអភិវឌ្ឍន៍ជនបទ និងកសិកម្ម ដែលបានចូលរួមក្នុងពិពរណ៌នេះដែរ ដោយឯកឧត្តមលើកឡើងថា ការចូលរួមរបស់ធនាគារ ARDB ក្នុងផ្តល់ការទុនដល់ប្រជាកសិករ និងសហគ្រឹន គឺមានសារសំខាន់ណាស់ក្នុងការលើកកម្ពស់ និងទ្រទ្រង់និរន្តរភាពនៃការធ្វើកសិកម្មនៅកម្ពុជា។
ផលិតផលដាក់តាំងពិពរណ៌នេះភាគច្រើនជាផលិតផលកែច្នៃ ជាគ្រឿងឧបភោគ និងបរិភោគ មានដូចជា គោងៀត ត្រីងៀត ត្រីឆ្អែ ទឹកត្រី ទឹកស៊ីអៀវ ទឹកផ្លែឈើ ណែម សាច់ក្រក ប្រហុក ផ្អក ជ្រក់ ស្ករត្នោត ទឹកត្នោតផ្អែម ទឹកឃ្មុំ ស្រាមៀនប៉ៃលិន ស្រាទំពាំងបាយជូរព្រៃ ស្រាលម៉ើ ស្រាព្រីង ស្រាស្វាយ ដំណាប់ផ្លែឈើ មី នំក្រៀម និងនំអន្សម ជាដើម។ ចំណែកផលិតផលអាហារបំប៉នសុខភាព មានដូចជាម្យៅរមៀត ម្យៅពន្លៃ ម្យៅខ្ញី និងប្រេងសណ្តែកផ្កាយ ជាដើម។
អ្នកស្រី កែវ កន្និដ្ឋា អ្នកតាំងលក់ផលិតផលខ្មែរចំនួន១០មុខ បានមានប្រសាសន៍ថា ការតាំងលក់រយៈពេលពីរថ្ងៃនេះ ផលិតផលរបស់អ្នកស្រីលក់ដាច់យ៉ាងច្រើនដោយសារការពេញនិយមចូលចិត្ត និងការគាំទ្រផលិតផលខ្មែរ ពីសំណាក់អ្នកចូលទស្សនា។
អ្នកស្រីបានមានប្រសាសន៍ថា ផលិតផលរបស់អ្នកស្រីដាក់តាំងលក់ភាគច្រើន គឺមានប្រភពមកពីសហគមន៍កសិករនៅទូទាំងព្រះរាជាណាចក្រ មានដូចជា ងៀតគោ ត្រីងៀត ណែម ប្រហុក ផ្គក ស្ករត្នោត បន្លែ និងផ្លៃឈើ ដែលផលិតផលទាំងអស់ត្រូវបានផលិតឡើងដោយកសិករ និងមិនមានសារធាតុគីមីអ្វិឡើយ គឺមានសុវត្ថិភាពបំផុតសម្រាប់ទទួលទាន។
ចំណែកស្វាមីភរិយាមួយគូឯនេះវិញ គឺលោក សន ស៊ីនិត និងអ្នកស្រី ឆុង សោភា ជាកសិករដាំដំណាំលម៉ើ នៅក្នុងស្រុកតាំងគោក ខេត្តកំពង់ធំ ដែលគោលបំណងចម្បងរបស់ពួកគាត់ គឺលក់ផ្លែលម៉ើទុំសម្រាប់ទទួលទាន។ ប៉ុន្តែដោយសារទិន្នផលលម៉ើទុំច្រើនលើសពីតម្រូវទីផ្សារ អ្នកទាំងពីរក៏កែច្នៃជាស្រាក្រហមវិញ ដែលមានរសជាតិប្រហាក់ប្រហែលនឹងស្រាត្រពាំងបាយជូរផងដែរ។
អ្នកស្រី ឆុង សោភា បានមានប្រសាសន៍រំឭកអំពីការចាប់ផ្តើមផលិតស្រាថា ទិន្នផលលម៉ើរបស់អ្នកស្រីក្នុងឆ្នាំ២០២៤ ដែលជាឆ្នាំផ្តល់ផលដំបូងនៃដំណាំលម៉ើដាំលើផ្ទៃដីពីរហិកតា ទទួលបានប្រមាណ៤០០គីឡូក្រាមប៉ុណ្ណោះ ប៉ុន្តែលម៉ើទុំចំពេលវេលាអាកាសធាតុក្តៅខ្លាំង ធ្វើឱ្យផ្លែលម៉ើប្រេះបែក មិនអាចលក់សម្រាប់ទទួលទានបានឡើយ។ ដូច្នេះអ្នកស្រី និងស្វាមី ក៏នាំគ្នាកែច្នៃផ្លែលម៉ើទាំងនោះធ្វើជាស្រាតែ ដែលមានរសជាតិស្រទន់ស្រដៀងគ្នានឹងរសជាតិស្រាផ្លែឈើដទៃទៀតដែរ។
នៅក្នុងថ្ងៃដាក់តាំងពិពរណ៌នេះ ផលិតផលស្រាលម៉ើរបស់អ្នកស្រី ត្រូវបានបែងចែកជាបីប្រភេទផ្សេងៗគ្នា សម្រាប់ចំណុះ០,៧៥លីត្រ លក់ក្នុងតម្លៃពី៦០ ០០០ ទៅ៦៥ ០០០រៀលក្នុងមួយដប។
អ្នកស្រីបានបញ្ជាក់ថា ស្រាលម៉ើអាចទុកបានយូរជាងដំណាប់លម៉ើ ព្រោះស្រាទុកកាន់យូរគុណភាពកាន់តែល្អ ខណៈដំណាប់ផ្លែលម៉ើក្រៀមមិនអាចទុកឱ្យបានយូរឡើយ៕
