ភ្នំពេញ៖ គិតមកដល់ត្រឹមខែតុលាឆ្នាំ២០២៤នេះ ផលិតផលគ្រាប់ស្វាយចន្ទីរបស់កម្ពុជាបាននិងកំពុងមានសក្តានុពលលើទីផ្សារសំខាន់ៗចំនួន៤នៅលើពិភពលោក មានទីផ្សារប្រទេសចិន ទីផ្សារអឺរ៉ុប
ទីផ្សារអារ៉ាប់ និងទីផ្សារសហរដ្ឋអាមេរិក។
លោក អួន ស៊ីឡុត ប្រធានសមាគមស្វាយចន្ទីកម្ពុជាបានឱ្យដឹងថា មកដល់សព្វថ្ងៃនេះ ផលិតផលគ្រាប់ស្វាយចន្ទីកម្ពុជាកំពុងមានសក្តានុពលនៅលើទីផ្សារប្រទេសចិន ទីផ្សារអឺរ៉ុប ទីផ្សារអារ៉ាប់ និងទីផ្សារអាមេរិក ហើយនៅក្នុងនោះចិន ជាទីផ្សារមានសក្តានុពលខ្លំាងជាងគេ ។
លោកបន្តថា “សព្វថ្ងៃនេះវិនិយោគិនចិនកំពុងសម្លឹងមើលកម្ពុជា។ កាលពីមុនចិនមិនទាន់ដឹងថាកម្ពុជាមានផ្ទៃដីដាំស្វាយចន្ទីធំ ហើយអាចផលិតគ្រាប់ស្វាយចន្ទីបានល្អនោះទេ ប៉ុន្តែពេលនេះបានដឹងច្បាស់ហើយ ហើយនៅពេលខាងមុខនេះខាងមុខនឹងមានហ៊ុនចិនមួយមកទស្សនកិច្ចកម្ពុជា យើងនឹងយកផែនទីបង្ហាពីតំបន់ដាំដុះស្វាយចន្ទីដែលក្រសួងកសិកម្មនិងដៃគូបានបង្កើតឡើងនេះទៅបង្ហាញដល់ខាងក្រុមហ៊ុនពីសក្តានុពលវិស័យស្វាយចន្ទីរបស់កម្ពុជា។
ចំណែកទីផ្សារចំនួន៣ផ្សេងទៀត យើងកំពុងតែមានទំនាក់ទំនងល្អជាមួយគាត់ ហើយពួកគាត់ចង់បានផលិតផលគ្រាប់ស្វាយចន្ទីកម្ពុជា តែកម្ពុជាមិនទាន់អាចផលិតគ្រាប់ស្វាយចន្ទីកែច្នៃរួចជូនពួកគាត់បាន ដោយសារតែសហគ្រាសកែច្នៃក្នុងស្រុកខ្វះទុនបង្វិលទិញគ្រាប់ស្វាយចន្ទីទុកធ្វើការកែច្នៃ”។
បើយោងតាមលោក អួន ស៊ីឡុត ថា ក្នុងពេលបច្ចុប្បន្ននេះដោយសារតែថ្លែដើមផលិតគ្រាប់ស្វាយចន្ទីខ្ពស់ ជាហេតុធ្វើឱ្យពិបាកក្នុងការប្រកួតប្រជែងនៅលើទីផ្សារអន្តរជាតិ ហើយដើម្បីធ្វើឱ្យតម្លៃដើមផលិតធ្លាក់ចុះទាប ខាងសមាគមស្វាយចន្ទីកម្ពុជាមានយុទ្ធសាស្ត្រចំនួន២។ទី១ ត្រូវប្រមូលផ្តុំរោងចក្រស្វាយចន្ទីនៅជុំគ្នាតាមរយៈការបង្កើតជាសួនកសិឧស្សាហកម្មដែលទទួលបានអត្ថប្រយោជន៍ដូចទៅនិងតំបន់សេដ្ឋកិច្ចពិសេសពីរាជរដ្ឋាភិបាល និងទី២ ជួយដល់កសិករក្នុងការដាំដុះស្វាយចន្ទីឱ្យចំណាយថ្លៃដើមអស់តិច តែទទួលបានផលច្រើន តាមរយៈការដាក់ពង្រាយមន្ត្រីកសិកម្មឃុំរបស់ក្រសួងកសិកម្ម រុក្ខាប្រមាញ់និងនេសាទ។
លោក អួន ស៊ីឡុត មានប្រសាសន៍ថា “ពេលយើងអាចកាត់បន្ថយថ្លៃដើមផលិតបាន ដល់ពេលនោះផលិតផលរបស់កម្ពុជាយើងអាចប្រណាំងប្រជែងជាមួយទីផ្សារអន្តរជាតិបាន ហើយក្នុងពេលបច្ចុប្បន្នសមាគមស្វាយចន្ទីកម្ពុជាមិននៅរងចំាជំនួយពីខាងដៃគូអភិវឌ្ឍន៍ឬអង្គការក្រៅរដ្ឋាភិបាលផ្សេងៗនោះទេ យើងកំពុងតែបង្កើតជាគំរូមួយដែលយើងអាចធ្វើបាន គឺយើងបង្កើតជាមជ្ឈមណ្ឌលប្រមូលទិញគ្រាប់ស្វាយចន្ទីនៅក្នុងខេត្តកំពង់ធំសាកល្បងមានចំនួន៤ឃ្លាំង។
យោងតាមប្រធានសមាគមស្វាយចន្ទីកម្ពុជាខាងលើ មកដល់ចុងខែតុលាឆ្នាំ២០២៤នេះ លោកសង្កេតឃើញមានសហគ្រាសកែច្នៃគ្រាប់ស្វាយចន្ទីមានចំនួន៤៤សហគ្រាស ក្នុងនោះសហគ្រាសធុនមធ្យមមានចំនួន៦ដែលមានសមត្ថភាពផលិតគ្រាប់ស្វាយចន្ទីចន្លោះពី៧ ០០០ទៅ១៤ ០០០តោននៅក្នុងមួយឆ្នាំ ក្រៅពីនេះជាសហគ្រាសកែច្នៃខ្នាតតូចលក្ខណៈគ្រួសារដែលអាចផលិតបានប្រមាណ១០០តោនក្នុងមួយឆ្នាំ។
សមាគមស្វាយចន្ទីកម្ពុជានិងដៃគូពាក់ព័ន្ធប្រឹងប្រែងដើម្បីឱ្យពួកគាត់អាចចេះធ្វើគម្រោងអាជីវកម្ម ក៏ដូចជារបាយការណ៍ហិរញ្ញវត្ថុប្រចំាឆ្នាំរបស់ពួកគាត់ ដើម្បីឱ្យក្រុមហ៊ុនរបស់គាត់មានលក្ខណៈស្តង់ដារ អាចទទួលបាននូវការវិនិយោគឬទទួលបានប្រាក់កម្ចីដែលមានអត្រាការប្រាក់អនុគ្រោះនានា៕
