ណៃពិដោ៖ ក្រសួងជលផលភូមា បានហាមឃាត់ការនេសាទរយៈពេលបីខែ គិតចាប់ពីថ្ងៃទី១ ខែមេសា ដល់ថ្ងៃទី៣០ ខែមិថុនា ឆ្នាំ២០២៦ ដែលជារដូវត្រីពងកូន ដើម្បីការពារធនធានមច្ឆាជាតិ ហើយនាវានេសាទទាំងអស់ត្រូវវិលត្រឡប់ទៅកំពង់ផែវិញ។
បើយោងតាមមន្ត្រីជលផលរបស់ភូមា បានឱ្យដឹងថា មូលហេតុចម្បងនៃការកំណត់រដូវបិទការនេសាទ និងកំណត់តំបន់ហាមឃាត់មិនឱ្យនេសាទ គឺដើម្បីទប់ស្កាត់ធ្លាក់ចុះនៃប្រភេទត្រី និងលើកកម្ពស់ការលូតលាស់ឡើងវិញនៃធនធានជលផល។ វិធានការទាំងនេះត្រូវបានអនុវត្តជាកិច្ចខិតខំប្រឹងប្រែងអភិរក្សក្នុងរដូវបង្កាត់ពូជត្រីពងកូន នៅពេលត្រីបន្តពូជ។
លោកបានបញ្ជាក់ថា ការហាមឃាត់ការនេសាទរយៈពេលបីខែនេះ គឺផ្អែកលើការរកឃើញនៅក្នុងការស្រាវជ្រាវរបស់មន្ត្រីជលផល។
ចំណែកទូកនេសាទទាំងអស់ដែល ធ្វើប្រតិបត្តិការនេសាទនៅតំបន់សមុទ្រ ត្រូវបានហាមឃាត់មិនឱ្យនេសាទក្នុងអំឡុងពេលបិទនេសាទ និងនៅក្នុងតំបន់មិនឱ្យនេសាទរយៈពេលបីខែ ដោយគិតចាប់ពីថ្ងៃទី១ ខែមេសា ដល់ថ្ងៃទី៣០ ខែមិថុនា ហើយពួកគេត្រូវបានណែនាំឱ្យត្រឡប់ទៅកំពង់ផែវិញ មិនឱ្យលើសពីថ្ងៃទី៣១ ខែមីនា ឆ្នាំ២០២៦នេះ។
នៅក្នុងសេចក្តីប្រកាសបិទរដូវនេសាទ បានព្រមានថា ចំពោះអ្នកណាមួយមិនអនុវត្តតាមការណែនាំនឹងប្រឈមមុខការផ្តន្ទាទោសតាមផ្លូវច្បាប់។ ចំណែកនាវាកំពុងត្រូវតែត្រួតពិនិត្យនៅមជ្ឈមណ្ឌលត្រួតពិនិត្យ ហើយគិតត្រឹមថ្ងៃនេះ នាវាស្ទើរតែទាំងអស់បានត្រឡប់ទៅកំពង់ផែវិញ ដោយមានចំនួនតិចតួចបំផុតនៅលើផ្ទៃសមុទ្រ។
ការកំណត់រយៈពេលហាមឃាត់ការនេសាទ និងតំបន់ការពារ គឺផ្អែកលើការស្រាវជ្រាវ ដែលធ្វើឡើងដើម្បីអភិរក្សត្រី និងធនធានជលផលក្នុងរដូវបង្កាត់ពូជ។ ការសិក្សាលើប្រព័ន្ធអេកូឡូស៊ីសមុទ្រ ជម្រកត្រី និងធនធានជលផល នៅក្នុងដែនទឹកភូមា ត្រូវបានអនុវត្តដោយអ្នកស្រាវជ្រាវ។ កាលពីខែកុម្ភៈ ឆ្នាំ២០២៦នេះ ការស្ទង់មតិអំពីធនធានជលផលរយៈពេល៣០ថ្ងៃ ត្រូវបានធ្វើនៅតាមឆ្នេរសមុទ្រ ក្នុងជម្រៅទឹករាក់ជាង២០ម៉ែត្រ ដើម្បីឃ្លាំមើលធនធានមច្ឆាជាតិ។
នាវានេសាទនៅឯនាយសមុទ្រចំនួន១ ១៨៦គ្រឿង នៅក្នុងដែនទឹករបស់ភូមា បានផ្លាស់ប្តូរប្រព័ន្ធនាពេលបច្ចុប្បន្ន ដោយសារការរីកចម្រើនផ្នែកបច្ចេកវិទ្យា និងជីវភាពរស់នៅកាន់តែប្រសើរឡើង បច្ចេកទេសនេសាទទំនើបត្រូវបានប្រើប្រាស់យ៉ាងទូលំទូលាយ។ ចំណែកផលិតផលនេសាទក៏ត្រូវបានកែច្នៃដោយប្រើបច្ចេកវិទ្យាទំនើប សម្រាប់ផ្គត់ផ្គង់ក្នុងស្រុក និងនាំចេញទៅកាន់ទីផ្សារអន្តរជាតិ ហើយផលិតផល ដែលមានតម្លៃបន្ថែមត្រូវបានផលិតតាមរយៈកន្លែងស្តុកត្រជាក់ រួមជាមួយនឹងធនធានជលផលលើផ្ទៃទឹក និងក្រោមទឹក។
តាមរយៈទិន្នន័យផ្លូវការបង្ហាញថា ប្រទេសភូមា បាននាំចេញផលិតផលនេសាទជាង១៥ ០០០តោន ទៅកាន់ប្រទេសចិន ដោយគិតចាប់ពីខែកញ្ញា ឆ្នាំ២០២៣ ដល់ខែសីហា ឆ្នាំ២០២៥ ដោយមានតម្លៃទឹកប្រាក់សរុបជាង២០៧លានដុល្លារ។
យោងតាមរបាយការណ៍នាពេលកន្លងមករបស់កម្មវិធីអភិវឌ្ឍន៍អង្គការសហប្រជាជាតិ បានរាយការណ៍ថា ប្រទេសភូមាកំពុងតែប្រឈមមុខនឹងវិបត្តិយ៉ាងធ្ងន់ធ្ងរ ដែលបណ្តាលមកពីការដួលរលំសេដ្ឋកិច្ច និងគ្រោះថ្នាក់បង្កឡើងដោយកត្តាអាកាសធាតុដ៏ស្មុគស្មាញ។
ក្នុងវិបត្តិនយោបាយរាប់ឆ្នាំរបស់ភូមា កំពុងបង្ហាញជារូបភាពដ៏ក្រៀមក្រំនៃប្រជាជាតិមួយ ដែលកំពុងស្ថិតក្នុងស្ថានភាពស្រពិចស្រពិល ជាមួយនឹងចំនួនប្រជាជនជិតពាក់កណ្តាលកំពុងរស់នៅក្រោមបន្ទាត់នៃភាពក្រីក្រ ខណៈសេវាកម្មសំខាន់ៗបានដួលរលំ និងសេដ្ឋកិច្ចស្ថិតក្នុងស្ថានភាពលំបាក៕
