ដោយ អៀវ ឈៀងនី
ភ្នំពេញ៖ លោក ឆុល ឆូយ ម្ចាស់កសិដ្ឋានបន្លែ និងផ្លែឈើសុវត្ថិភាពព្រៃវិហារក្រៅពីដាំបន្លែស្ពៃ ម្ទេស និងបន្លែផ្សេងៗនៅក្នុងផ្ទះសំណាញ់ មិនឱ្យទំនេរដៃ កំពុងតែបង្កើនការដាំប៉េងប៉ោះឆើរីបន្ថែមទៀត ដោយបច្ចុប្បននេះ ប៉េងប៉ោះឆើរី ជាប់ចំណាត់ថ្នាក់បន្លែ ដែលមានតម្រូវការច្រើនលើទីផ្សារ។
ម្ចាស់កសិដ្ឋានខាងលើបានរៀបរាប់ថា ក្នុងមួយសប្តាហ៍ លោកប្រមូលផលប៉េងប៉ោះឆើរី បីដង ក្នុងមួយដង បានពី១០០គីឡូក្រាម ទៅ២០០គីឡូក្រាម។ ប៉េងប៉ោះឆើរី ឆ្នាំនេះ ល្អជាងរាល់ឆ្នាំ ព្រោះមានតម្រូវការច្រើន។ លោកបានដាំវាជារៀងរាល់ខែ គ្រប់រដូវកាលចំនួនពីប្រាំ ទៅប្រាំផ្ទះសំណាញ់ ខែណាក៏មានដែរ ដើម្បីបំពេញតម្រូវការក្នុងស្រុក។
បច្ចុប្បន្ន ប៉េងប៉ោះឈើរី កំពុងមានប្រជាប្រិយភាពនៅលើទីផ្សារ ទាំងផ្សារទំនើប និងផ្សារធម្មតា ខណៈតម្លៃលើទីផ្សារល្អសមរម្យ។ ដោយសារទំនោរ និងមានតម្រូវការពីទីផ្សារជាច្រើនបែបនេះហើយ ទើបបានជំរុញឱ្យកសិករខ្មែរ ងាកមកដាំដុះប្រភេទប៉េងប៉ោះឈើរីនេះច្រើនឡើង ត្បិតបច្ចេកទេសដាំដុះ ក៏មិនសូវជាខុសគ្នាពីការដំណាំប៉េងប៉ោះខ្មែរប៉ុន្មាននោះទេ។
ពូជប៉េងប៉ោះឆើរីនេះ មានផ្លែតូចៗជាងផ្លែប៉េងប៉ោះខ្មែរ ប៉ុន្តែប្រើរយៈពេលដាំដុះតិចជាង ហើយពេលវេលាដាំដុះ ដែលសមស្រប គឺនៅចន្លោះខែវិច្ឆិកា ដល់ខែកុម្ភៈ ប៉ុន្តែការដាំដុះក្នុងផ្ទះសំណាញ់ អាចដាំបានគ្រប់រដូវកាល។ ប៉េងប៉ោះឈើរី មានតម្លៃល្អនៅលើទីផ្សារ ដោយគេអាចលក់បានក្នុងតម្លៃចន្លោះពី៧០០០ ទៅ៨០០០រៀល ក្នុងមួយគីឡូក្រាម ឬគេយកទៅលក់បន្តដល់ជិត ១០ ០០០រៀលក៏មាន ដែលអាចលក់បានទាំងនៅតាមផ្សារធម្មតា និងផ្សារទំនើប។
សូមបញ្ជាក់ថា កសិដ្ឋានបន្លែ និងផ្លែឈើសុវត្ថិភាពព្រៃវិហារនេះ មានទីតាំងស្ថិតនៅភូមិតារាជ ស្រុកគងពិសី ខេត្តកំពង់ស្ពឺ។ ប៉េងប៉ោះឆើរី ជាពូជមកក្រៅប្រទេស ជាបន្លែមួយប្រភេទ ដែលមនុស្សភាគច្រើននិយមយកធ្វើជាម្ហូបអាហារជារៀងរាល់ថ្ងៃ ព្រោះវាផ្តល់អត្ថប្រយោជន៍សម្រាប់សុខភាពរាងកាយ ដូចជាវាផ្ទុកវីតាមីន A និងវីតាមីន C ដែលអាចជួយពង្រឹងអង្គបដិបក្ខក្នុងរាងកាយ ប្រឆាំងនឹងកោសិកាមហារីក។ ហើយម្យ៉ាងទៀត ប៉េងប៉ោះក៏មានផ្ទុកនូវវីតាមីន Kនិងវីតាមីន B6 ដែលអាចការពារការចាប់ផ្តើមនៃកោសិកាមហារីក ធ្វើឱ្យប្រសើរឡើងនូវប្រព័ន្ធភាពស៊ាំរបស់រាងកាយ ដើម្បីការពារការបញ្ចូលបាក់តេរីអាក្រក់នៅក្នុងខ្លួន៕
