កូឡាឡាំពួរ៖ រដ្ឋាភិបាលម៉ាឡេស៊ីមានបំណងបង្កើនតម្លៃនាំចេញផលិតផលផ្លែម្នាស់ឱ្យកើនដល់ទឹកប្រាក់ប្រមាណ៤២៥លានដុល្លារ នៅឆ្នាំ២០២៧ នៃយុទ្ធសាស្ត្ររបស់ខ្លួន ក្នុងការពង្រឹងវិស័យនេះ ដែលត្រូវបានចាត់ទុកថា ជាទំនិញកសិកម្មមានតម្លៃខ្ពស់។
អនុរដ្ឋមន្ត្រីក្រសួងកសិកម្ម និងសន្តិសុខស្បៀង ម៉ាឡេស៊ី លោក ចាន់ ហ្វុងហ៊ីន (Chan Foong Hin) បានមានប្រសាសន៍ថា ឧស្សាហកម្មម្នាស់មានសក្តានុពលក្នុងការបង្កើតប្រាក់ចំណូលប្រហែល១ ៩១៥ដុល្លារ ក្នុងមួយខែសម្រាប់ផ្ទៃដីមួយហិកតា តាមរយៈការអនុវត្តការគ្រប់គ្រងកសិដ្ឋានបែបទំនើប។
យោងតាមអនុរដ្ឋមន្ត្រីខាងលើនេះ បានឱ្យដឹងទៀតថា ការនាំចេញផ្លែម្នាស់ត្រូវបានគេរំពឹងថា នឹងបន្តពង្រីកទីផ្សារថែមទៀតតាមរយៈការស្វែងរកទិសដៅបន្ថែម ដូចជាប្រទេសនូវែលសេឡង់ជាដើម។ ការនាំចេញផ្លែម្នាស់របស់ម៉ាឡេស៊ីសម្រេចបានប្រាក់ចំណូលប្រមាណ២៩៨លានដុល្លារ ក្នុងឆ្នាំ២០២៥ តាមរយៈការនាំចេញសរុប៧៦ ០០០តោនទៅកាន់ទីផ្សារក្រៅប្រទេស រួមមានតំបន់មជ្ឈិមបូព៌ា ចិន និងទ្វីបអឺរ៉ុប។
លោក ចាន់ ហ្វុងហ៊ីន បានប្រាប់អ្នកយកព័ត៌មានដូច្នេះ ក្នុងដំណើរទស្សនកិច្ចការងារនៅមជ្ឈមណ្ឌលប្រមូលទិញផ្លែម្នាស់នៅក្នុងប្រទេសម៉ាឡេស៊ីថា «ដំណើរទស្សនកិច្ចនៅថ្ងៃនេះ ទៅកាន់គម្រោងចម្ការម្នាស់ពូជ អឹមដេ២ (MD2) គឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលក្នុងការពង្រឹងការអភិវឌ្ឍឧស្សាហកម្មម្នាស់។ យើងមានបំណងឱ្យតម្លៃនាំចេញនេះបន្តកើនឡើង និងឈានដល់ទំហំទឹកប្រាក់៤៩៣លានដុល្លារ នៅឆ្នាំ២០២៧។
គម្រោងដំាម្នាស់ពូជ អឹមដេ២ របស់ម៉ាឡេស៊ី ដំណើរការដោយក្រុមហ៊ុនកសិកម្មក្នុងស្រុក និងគ្របដណ្តប់លើផ្ទៃដីសរុបជាង១០៩ហិកតា។ ការដាំដំណាំបច្ចុប្បន្នស្ថិតនៅលើផ្ទៃដីទំហំ១៦ហិកតា ដែលមានដើមម្នាស់ពូជ អឹមដេ២ ចំនួន ៧៤០ ៤៣២ដើម ក្នុងអត្រារស់របស់ដំណាំខ្ពស់ជាង៩៧ភាគរយ។
លោកអនុរដ្ឋមន្ត្រីក្រសួងកសិកម្ម និងសន្តិសុខស្បៀង ម៉ាឡេស៊ី បានមានប្រសាសន៍បញ្ជាក់ថា ដំណើរទស្សនកិច្ចនេះក៏បានកត់សម្គាល់ពិធីបើកការដ្ឋានសាងសង់មជ្ឈមណ្ឌលប្រមូល កែច្នៃ និងវេចខ្ចប់។ កន្លែងនេះមានគោលបំណងគាំទ្រខ្សែច្រវាក់តម្លៃផ្លែម្នាស់ ចាប់ផ្តើមពីផលិតកម្មរហូតដល់ការចែកចាយលើទីផ្សារ។
លោកក៏បានកត់សម្គាល់ផងដែរថា រដ្ឋ សេឡាងហ្គោ (Selangor) របស់ប្រទេសម៉ាឡេស៊ី មានលក្ខខណ្ឌល្អដល់ការអភិវឌ្ឍន៍ជាមជ្ឈមណ្ឌលកសិចំណីអាហារបែបទំនើប ដោយលើកឡើងពីហេដ្ឋារចនាសម្ព័ន្ធដឹកជញ្ជូន ដូចជាតាមផ្លូវអាកាស និងផ្លូវដែក និងការគាំទ្រគោលនយោបាយ ដែលកំពុងបន្តទាំងនៅកម្រិតសហព័ន្ធ និងថ្នាក់រដ្ឋាភិបាល។
លោកបានមានប្រសាសន៍ថា «យើងមិនត្រឹមតែចង់ឱ្យប្រជាជនទិញម្នាស់ ដើម្បីបរិភោគប៉ុណ្ណោះទេ ប៉ុន្តែយើងចង់ឱ្យតំបន់នេះក្លាយជាកន្លែងត្រូវយកចិត្តទុកដាក់សម្រាប់ការកែច្នៃ ការវេចខ្ចប់ ការដាក់ស្លាកសញ្ញា និងការនាំចេញ រួមទាំងការអភិវឌ្ឍរោងចក្រកែច្នៃដោយប្រើបច្ចេកវិទ្យាខ្ពស់ និងមានសក្តានុពលកសិទេសចរណ៍ផងដែរ»។
ដើម្បីគាំទ្រដល់ការអភិវឌ្ឍន៍ឧស្សាហកម្ម ក្រុមប្រឹក្សាឧស្សាហកម្មម្នាស់ម៉ាឡេស៊ី បានជួយក្នុងទម្រង់ជាថ្នាលបណ្តុះកូនម្នាស់ និងធាតុចូលកសិកម្ម ដែលមានតម្លៃបន្ថែមប្រហែល៤៧ ២០០ដុល្លារ ជាប្រាក់ជំនួយឥតសំណងចំនួន៦ ៣៨០ដុល្លារ សម្រាប់ហាងលក់នៅកសិដ្ឋាន និងការបណ្តុះបណ្តាលបច្ចេកទេសថ្មីៗ។ ក្នុងនេះក៏មានគំនិតផ្តួចផ្តើមបន្ថែម ផងដែរ រួមមានកម្មវិធីផ្តោតលើសហគមន៍ និងយុវជន។
ដោយសម្លឹងឆ្ពោះទៅរកគោលដៅឆ្នាំ២០២៦ ក្រុមប្រឹក្សាភិបាលមានផែនបង្កើតគម្រោងអភិវឌ្ឍន៍បន្ថែមទៀត នៅក្នុងរដ្ឋ សេឡាងហ្គោ ដែលគ្របដណ្តប់លើផ្ទៃដី៤៩ហិកតា ជាមួយនឹងថវិកាសម្រាប់លើកទឹកចិត្តសរុបប្រហែល ២៧៧ ០០០ដុល្លារ ហើយរំពឹងថា នឹងមានប្រតិបត្តិករចំនួន២៦នាក់។ កាលពីឆ្នាំ២០២៥ កញ្ចប់ថវិកាប្រហែល៣៨ ៣០០ដុល្លារ ត្រូវបានផ្តល់ទៅឱ្យកសិករវ័យក្មេង នៅក្នុងរដ្ឋនេះ ដើម្បីលើកកម្ពស់វិស័យកសិកម្មដាំម្នាស់។
លោក ចាន់ ហ្វុងហ៊ីន បានបន្ថែមថា រដ្ឋាភិបាលរដ្ឋ សេឡាងហ្គោ ក៏បានផ្តល់ថវិកាប្រមាណ២៤ ១០០ដុល្លារ ដល់សហគ្រិនម្នាស់ផងដែរ ព្រមទាំងផ្តល់ការគាំទ្រសម្រាប់ធាតុចូលកសិកម្ម ក្នុងទឹកប្រាក់ប្រហែល២៥៥ ០០០ដុល្លារ ដោយបានបែងចែកដល់ប្រតិបត្តិករចំនួន៣៨នាក់។
លោកបានមានប្រសាសន៍ថា «រដ្ឋាភិបាលសហព័ន្ធ និងរដ្ឋាភិបាលរដ្ឋ សេឡាងហ្គោ នឹងបន្តពង្រឹងកិច្ចសហប្រតិបត្តិការជាយុទ្ធសាស្ត្រជាមួយវិស័យឯកជន ដើម្បីអភិវឌ្ឍឧស្សាហកម្មម្នាស់ប្រកបដោយនិរន្តរភាព និងពង្រឹងសន្តិសុខស្បៀងរបស់ប្រទេសម៉ាឡេស៊ី»៕
