ដោយ ជិន ម៉ាដេប៉ូ៖
មណ្ឌលគិរី៖ តាមរយៈការកែច្នៃឫស្សីជារបស់ប្រើប្រាស់បែបបុរាណរបស់ដូនតាខ្មែរនោះ បានជួយដល់ប្រជាសហគមន៍ក្នុងការរកចំណូលបានពីការលក់វត្ថុអនុស្សាវរីយ៍ និងលក់សម្ភារប្រើប្រាស់កែច្នៃពីឫស្សី ដែលជាផ្នែកមួយក្នុងការរកចំណូលបន្ថែមដល់កសិករក្រៅអំពីការធ្វើស្រែចម្ការ របស់កសិករក្នុងខេត្តមណ្ឌលគិរី។
ការបណ្តុះបណ្តាលវិជ្ជាជីវៈកែច្នៃឫស្សី ឱ្យក្លាយទៅជារបស់ប្រើប្រាស់ផ្សេងៗជាផ្នែកមួយលើកស្ទួយសេដ្ឋកិច្ចមូលដ្ឋាន និងផ្តល់នូវជម្រើសថ្មីនៃមុខរបររបស់ប្រជាពលរដ្ឋសម្រាប់រកចំណូលចិញ្ចឹមជីវិត។ ការបង្រៀនវិជ្ជាជីវៈសិប្បកម្មកែច្នៃវត្ថុអនុស្សាវរីយ៍ទាំងនេះ កន្លងមកបានធ្វើឡើងពីសំណាក់អង្គការសមាគមអភិរក្សសត្វព្រៃ (WCS)ដោយមានការគាំទ្រពីក្រសួងបរិស្ថានដើម្បីបង្កើនសេដ្ឋកិច្ចគ្រួសារជំនួសឱ្យការចូលព្រៃកាប់ឈើលក់ដោយខុសច្បាប់។
អ្នកស្រី ម៉ា សុខជា បុគ្គលិកមួយរូបប្រចាំវិទ្យាស្ថានអន្តរជាតិស្តារជនបទឡើងវិញ បានប្រាប់ឱ្យដឹងថា តាមរយៈការសហការជាមួយគម្រោងរេដបូក អំឡុងឆ្នាំ២០២៣ សរុប២១ភូមិគោលដៅ មានក្រុមផលិតសាប៊ូ ក្រុមផលិតនំ ក្រុមផលិតផ្លែឈើ ក្រុមប្រមូលផលផ្លែឈើ និងក្រុមផលិតឫស្សីជាដើម។
អ្នកស្រីបានបញ្ជាក់ដែរថា សម្រាប់ក្រុមផលិត និងកែច្នៃឫស្សីនេះ មានពីរភូមិគោលដៅ គឺភូមិពូចារ និងភូមិពូគង់ ស្ថិតនៅក្នុងឃុំស្រែព្រះ ស្រុកកែវសីមា ខេត្ត មណ្ឌលគិរី។ ប្រជាសហគមន៍ស្ថិតនៅក្នុងក្រុមកែច្នៃឫស្សីនេះ បានប្រមូលយកឫស្សី ដែលមានដើមចាស់ៗមកកែច្នៃជាសម្ភារប្រើប្រាស់ផ្សេងៗ ក្នុងនេះមានដូចជាកែវទឹកធំមានដៃ ពែងទឹក ប្រដាប់ដាក់ទៀនក្រអូប កន្រ្តកកំសៀវទឹក ប្រអប់ដាក់ក្រដាសជូតដៃ ទម្ពក់ព្យួរខោអាវ ឧបករណ៍បំពងសំឡេង ទូរសព្ទដៃ ប្រដាប់ដាក់ប៊ិច បំពង់ដាក់គ្រឿងធ្វើម្ហូបក្នុងផ្ទះបាយ ថូផ្កា និងសម្ភារជាច្រើនទៀត។
អ្នកស្រីបានពន្យល់ប្រាប់ថា សម្ភារកែច្នៃទាំងនេះត្រូវបានលក់លើទីផ្សារ ហើយទទួលបានប្រាក់កម្រៃជាច្រើន ដូចជាឧបករណ៍បំពងសំឡេងមួយ គេចលក់បានក្នុងតម្លៃមួយដើម១២ ០០០រៀល ខណៈឫស្សីមួយដើមធំនោះលក់បានត្រឹមតែ១០ ០០០រៀល ឫ២០ ០០០រៀលប៉ុណ្ណោះ។ ក្រៅពីនេះដូចជាប្រអប់ក្រដាសលក់បានតម្លៃ២០ ០០០រៀល និងកែវមានដៃមួយលក់បាន៥ ០០០រៀល ដែលនេះសុទ្ធសឹងនាំចំណូលដល់គ្រួសាររបស់ពួកគាត់។
តាមរយៈការផលិតសម្ភារប្រើប្រាស់ទាំងនេះ អ្នកស្រី ម៉ា សុខជា បានប្រាប់ទៀតថា បច្ចុប្បន្នត្រូវមានពលរដ្ឋខ្មែរគាំទ្រច្រើន ដោយសារជារបស់ខ្មែរផលិតដោយដៃ ហើយវាជារបស់ធម្មជាតិ ដែលជាទីពេញនិយមរបស់ពួកគាត់នាពេលបច្ចុប្បន្ន។
ឯកឧត្តម ខ្វែ អាទិត្យា មន្រ្តីអ្នកនាំពាក្យក្រសួងបរិស្ថាន ដែលដឹកនាំក្រុមអ្នកសារព័ត៌មានទៅបំពេញទស្សនកិច្ចនៅខេត្តមណ្ឌលគិរី បានឱ្យដឹងថា ការដាំដំណាំ និងការចិញ្ចឹមសត្វ ជាពិសេសការផលិតសម្ភារប្រើប្រាស់ពីឫស្សីមិនត្រឹមតែបម្រើដល់វិស័យទេសចរណ៍ទេ តែក៏កំពុងបានជួយលើកស្ទួយជីវភាពរបស់ពួកគាត់ទាំងពេលបច្ចុប្បន្ន និងអនាគត។
គួរបញ្ជាក់ថា អង្គការសមាគមអភិរក្សសត្វព្រៃ (WCS) សហការជាមួយក្រសួងបរិស្ថាន បានកំពុងអនុវត្តគម្រោងកាត់បន្ថយការបំភាយឧស្ម័នផ្ទះកញ្ចក់ ដែលបណ្តាលមកពីការបាត់បង់ព្រៃឈើ និងការរេចរិលនៃព្រៃឈើ (REDD+) នៅក្នុងដែនជម្រកសត្វព្រៃកែវសីមា។ គម្រោងនេះផ្តោតលើសកម្មភាពសំខាន់ៗដូចជា ពង្រឹងសមត្ថភាពអនុវត្តច្បាប់ ការគ្រប់គ្រងធនធានធម្មជាតិ ដែលដឹកនាំដោយសហគមន៍មូលដ្ឋាន ការលើកកម្ពស់ជីវភាពសហគមន៍ និងការស្រាវជ្រាវនិងត្រួតពិនិត្យតាមដានជីវៈចម្រុះជាដើម៕
