ដាកា៖ ក្រសួងកសិកម្មបង់ក្លាដែសនឹងផ្តល់ប្រាក់ឧបត្ថម្ភបន្ថែមសរុបចំនួន១០លានដុល្លារដល់កសិករដាំដំឡូងបារាំង ដោយលុបចោលផែនការចេញលុយទិញដំឡូងបារាំងចំនួន៥០,០០០តោន ហើយកញ្ចប់ថវិកានេះនឹងត្រូវចែកជូនដោយផ្ទាល់ទៅដល់ដៃកសិករជាងពីរលាននាក់ តាមរយៈគណនីហិរញ្ញវត្ថុចល័ត។
ការបែងចែកថវិកាសម្រាប់ឆ្នាំ២០២៥-២០២៦ សម្រាប់កសិករដាំដំឡូងបារាំង មានទឹកប្រាក់ចំនួន១៣,៨លានដុល្លារ បូករួមជាមួយនឹងមូលនិធិថ្មីនេះ ទឹកប្រាក់គាំទ្រសរុបកើនឡើងរហូតដល់២៤លានដុល្លារ។ ការសម្រេចចិត្តនេះ ត្រូវបានធ្វើឡើងនៅថ្ងៃទី៦ ខែវិច្ឆិកា ឆ្នាំ២០២៥ ក្នុងអំឡុងពេលពិនិត្យឡើងវិញនូវទីផ្សារដំឡូងបារាំងក្នុងស្រុក។
តម្លៃដំឡូងបារាំងបង់ក្លាដែសក្នុងខែកក្កដា និងសីហា ឆ្នាំ២០២៥ បានធ្លាក់ចុះមកនៅត្រឹមពី ០,១២ ទៅ០,១៣ដុល្លារ ក្នុងមួយគីឡូក្រាម គឺទាបជាងថ្លៃដើមផលិត និងតម្លៃរក្សាទុកចំនួនពី០,១៨ ទៅ០,២៣ដុល្លារ ក្នុងមួយគីឡូក្រាម។
ប្រធានសាជីវកម្មពាណិជ្ជកម្មបង់ក្លាដែស បានមានប្រសាសន៍ថា បូករួមជាមួយថ្លៃដឹកជញ្ជូនផងនោះ តម្លៃដំឡូងបារាំងនឹងឡើងដល់០,២៩ដុល្លារ ក្នុងមួយគីឡូក្រាម ដូច្នេះតម្រូវឱ្យមានប្រាក់ឧបត្ថម្ភធនចំនួន០,២០ដុល្លារ ក្នុងមួយគីឡូក្រាម ប្រសិនបើត្រូវលក់ក្នុងតម្លៃ០,០៩ដុល្លារ។ លោកបានស្នើឱ្យរដ្ឋាភិបាលផ្តល់ប្រាក់ចំនួន១០លានដុល្លារ ដោយផ្ទាល់ទៅដល់កសិករដាំដំឡូងបារាំង ដើម្បីស្រោចស្រង់ការខាតបង់។
ចំណែកក្រសួងផ្សព្វផ្សាយកសិកម្ម បង់ក្លាដែស បានរៀបចំប្រមូលទិន្នន័យរបស់កសិករជាងពីរនាក់ រួមទាំងលេខទូរស័ព្ទ គណនីទូទាត់ និងព័ត៌មានលម្អិតអំពីផ្ទៃដីដាំដុះ។
តម្រូវការដំឡូងបារាំងប្រចាំឆ្នាំរបស់ប្រទេសបង់ក្លាដែស គឺក្នុងបរិមាណ១០,៤លានតោន ខណៈដែលផលិតកម្មឆ្នាំ២០២៤-២០២៥ បានឈានដល់១១,៥លានតោន។
បើគិតត្រឹមថ្ងៃទី៣១ ខែតុលា ឆ្នាំ២០២៥នេះ ឃ្លាំងស្តុកទុកត្រជាក់មានដំឡូងបារាំងសម្រាប់បរិភោគចំនួន៦៨៣ ០០០តោន និងដំឡូងបារាំងសម្រាប់ធ្វើពូជចំនួន៨២៧ ០០០តោន។ ចំែណកទិន្នផលដំឡូងបារាំងថ្មីត្រូវបានគេរំពឹងថា នឹងចាប់ប្រមូលផល និងលក់លោះទីផ្សារចាប់ពីខែកុម្ភៈ ឆ្នាំ២០២៦ខាងមុខនេះ។
ការនាំចេញដំឡូងបារាំងរបស់ប្រទេសបង់ក្លាដែស ក្នុងឆ្នាំ២០២៥ នៅតែមានកម្រិតតិចតួចបំផុត ដោយមានការដឹកជញ្ជូនត្រឹមតែ៦២ ០០០តោនប៉ុណ្ណោះ ដែលជាចំណែកតូចមួយនៃផលិតកម្មសរុប។ ភាពមិនស៊ីគ្នារវាងការផលិត និងការប្រើប្រាស់ បានបង្កឱ្យមានការជោរជាន់នៅលើទីផ្សារ ហើយធ្វើឱ្យដំឡូងចុះថ្លៃ ព្រោះខ្វះទីផ្សារ។
ប្រទេសរុស្ស៊ី និងបណ្តាប្រទេសនៅអឺរ៉ុបខាងកើត ត្រូវបានចាត់ទុកថា ជាទីផ្សារដ៏ធំសម្រាប់ដំឡូងបារាំងបង់ក្លាដែស ប៉ុន្តែក្រោយមកប្រទេសរុស្ស៊ីបានហាមឃាត់ការនាំចូលដំឡូងបង់ក្លាដែស ជាបណ្តោះអាសន្ន បន្ទាប់ពីរកឃើញជំងឺផ្សិត ដោយគូសបញ្ជាក់ពីកង្វះមន្ទីរពិសោធន៍ ដែលមានការទទួលស្គាល់សម្រាប់ការធ្វើតេស្តមុនការដឹកជញ្ជូន និងវិញ្ញាបនបត្រដើម្បីបំពេញតាមស្តង់ដាររបស់ប្រទេសរុស្ស៊ី និងសហភាពអឺរ៉ុប។
អ្នកជំនាញបានបង្ហាញថា ការតម្រឹមផលិតកម្មជាមួយនឹងតម្រូវការទីផ្សារ និងការបំពេញតាមស្តង់ដារអនាម័យ និងភូតគាមអនាម័យ នឹងអនុញ្ញាតឱ្យប្រទេសបង់ក្លាដែសអាចបង្កើនការនាំចេញឡើងវិញបាន។ នេះអាចធ្វើឱ្យប្រសើរឡើងនូវតម្លៃកសិដ្ឋាន និងកាត់បន្ថយកាកសំណល់។ ការបង្កើតកន្លែងធ្វើតេស្ត ដែលមានការទទួលស្គាល់ ការពង្រីកសមត្ថភាពផ្ទុកត្រជាក់ទំនើប និងការកែលម្អការវេចខ្ចប់ ការដឹកជញ្ជូន និងការបំពេញបែបបទគយ ត្រូវបានចាត់ទុកថា ជាជំហានចាំបាច់។ កសិករក៏នឹងត្រូវការការបណ្តុះបណ្តាលដើម្បីផលិតដំឡូងបារាំងឱ្យទទួលបានគុណភាពតាមស្តង់ដារសម្រាប់នាំចេញផងដែរ។
ការលើកកម្ពស់ការនាំចេញត្រូវបានគេមើលឃើញថា មានសារៈសំខាន់សម្រាប់ធ្វើឱ្យមានតុល្យភាពទីផ្សារក្នុងស្រុក ប៉ុន្តែប្រសិនបើគ្មានវិធានការបែបនេះទេ នោះទិន្នផលដំឡូងបារាំងដ៏ច្រើនលើសតម្រូវការនឹងធ្វើជោរជាន់លើទីផ្សារ និងធ្វើឱ្យកសិករខាតបង់ច្រើនព្រោះតម្លៃចុះថោកពេក៕
