ភ្នំពេញ៖ ឧស្សាហកម្មស្វាយចន្ទីរបស់កម្ពុជាកំពុងប្រឈមនឹងការរំខានកាន់តែខ្លាំងឡើង ខណៈដែលការប្រែប្រួលអាកាសធាតុបន្តផ្លាស់ប្តូរគំរូអាកាសធាតុ និងប៉ះពាល់ដល់ដំណាំនៅទូទាំងតំបន់ផលិតសំខាន់ៗបង្កឡើងដោយ ព្យុះទីហ្វុងបណ្តាលឱ្យស្វាយចន្ទីលូតលាស់យឺត និងទិន្នផលថយចុះ។
ការវាយតម្លៃរបស់អ្នកជំនាញបង្ហាញថា ភ្លៀងធ្លាក់មិនទៀងទាត់ មេឃស្រទុំ និងព្យុះទីហ្វុងចុងរដូវ បានប៉ះពាល់ខ្លាំងដល់ដំណាំស្វាយចន្ទី ដែលបណ្តាលឱ្យមានការលូតលាស់យឺត និងទិន្នផលថយចុះ នេះបើយោងតាមសេចក្តីប្រកាសព័ត៌មានមួយ ដែលចេញដោយសមាគមស្វាយចន្ទីកម្ពុជា កាលពីថ្ងៃទី១ ខែធ្នូ ឆ្នាំ២០២៥។
យោងអ្នកជំនាញចន្ទីលើកឡើងថា ឆ្នាំ២០២៥ បានឃើញភ្លៀងធ្លាក់ខ្លាំងខុសពីធម្មតា ចាប់ពីខែកញ្ញា ដល់ខែវិច្ឆិកា រួមជាមួយនឹងពន្លឺព្រះអាទិត្យតិចរយៈពេលយូរ ដែលប៉ះពាល់ដោយផ្ទាល់ដល់ការលូតលាស់របស់ស្វាយចន្ទី ដោយការបង្កើតពន្លកយឺត ការចេញផ្កាយឺត ទឹកលើដីខ្សាច់-ដីឥដ្ឋ និងស្មៅដុះលើសលប់ក្នុងដំណាក់។
សេចក្តីប្រកាសបានណែនាំថា កសិករនៅក្នុងខេត្តសំខាន់ៗ ដូចជាខេត្តកំពង់ធំ និងខេត្តរតនគិរី គួរប្រុងប្រយ័ត្នចំពោះការខាតបង់ ដែលបង្កឡើងដោយអាកាសធាតុអាក្រក់ រួមទាំងភ្លៀងធ្លាក់ ដែលមិនអាចទាយទុកជាមុនបាន ខ្យល់បក់ខ្លាំង និងសកម្មភាពសត្វល្អិតកើនឡើង។
អ្នកជំនាញបានព្រមានថា បញ្ហាប្រឈមបែបនេះទំនងជាកាន់តែខ្លាំងឡើង ខណៈការប្រែប្រួលអាកាសធាតុកាន់តែមិនទៀតទាត់ នៅក្នុងឆ្នាំខាងមុខ។
ប្រធានសមាគមស្វាយចន្ទីកម្ពុជា លោក អួន ស៊ីឡូត បានមានប្រសាសន៍ថា ចាប់តាំងពីខែឧសភា ឆ្នាំ២០២៥ មកសមាគមស្វាយចន្ទីកម្ពុជា បានរៀបចំវគ្គបណ្តុះបណ្តាលចំនួន៤០លើក ដល់កសិករជាង៧៤០០នាក់ មកពី១០ខេត្ត ដោយវគ្គនីមួយៗមានអ្នកចូលរួមជាមធ្យម៩០នាក់ និងផ្តល់អាទិភាពដល់ការរៀនសូត្រជាក់ស្តែង និងផ្អែកលើកសិដ្ឋានជាជាងជំនួយហិរញ្ញវត្ថុ។
លោកបានលើកឡើងថា កំណើនឧស្សាហកម្មត្រូវបានពង្រឹងដោយតំបន់ដាំដុះ និងការនាំចេញដ៏រឹងមាំ ដោយគ្រាប់ស្វាយចន្ទីស្រ់សរបស់កម្ពុជាភាគច្រើននាំចេញទៅកាន់ប្រទេសវៀតណាម បានបរិមាណប្រហែល៩៦០ ០០០ តោន មានតម្លៃជាទឹកប្រាកើប្រហែល ១ ៤ ០០០លានដុល្លារ។
ការដាំដុះស្វាយចន្ទីឥឡូវនេះ បានលាតសន្ធឹងលើផ្ទៃដីជាង៧០០,០០០ ហិកតា នៅទូទាំងប្រទេសកម្ពុជា។
លោកប្រធានសមាគមបានពន្យល់ថា «ជាមួយនឹងការធ្លាក់ចុះតម្លៃស្រូវ នាពេលថ្មីៗនេះ កសិករជាច្រើនយល់ថា វាកាន់តែងាយស្រួលក្នុងការប្តូរទៅដាំដំណាស្វាយចន្ទី ដែលអាចប្រមូលផលបានក្នុងរយៈពេលពីរទៅបីឆ្នាំ។
ការកើនឡើងជាបន្តបន្ទាប់នៃការនាំចេញគ្រាប់ស្វាយចន្ទី បានគូសបញ្ជាក់ពីឥទ្ធិពលកាន់តែខ្លាំងឡើងរបស់ប្រទេសកម្ពុជា នៅក្នុងទីផ្សារគ្រាប់ស្វាយចន្ទីក្នុងតំបន់ ដែលនាំមកនូវឱកាសកាន់តែច្រើនសម្រាប់កសិករ និងជំរុញសេដ្ឋកិច្ចកសិកម្មរបស់ប្រទេស៕
