យោងតាមប្រធាននាយកដ្ឋានទំនាក់ទំនងនសមាគមមីក្រូហិរញ្ញវត្ថុកម្ពុជា បានឱ្យដឹងថា គិតត្រឹមដំណាច់ឆ្នាំ២០២៣ វិស័យមីក្រូហិរញ្ញវត្ថុបានជួយគំាទ្រដល់ប្រជាពលរដ្ឋចំនួនជាង ១,៥៧ លាននាក់ និងបានផ្តល់ឥណទានប្រមាណ ៥,១២ ពាន់លានដុល្លារអាម៉េរិក ខណៈអតិថិជនមានចំនួន២លាននាក់ បានដាក់ប្រាក់បញ្ញើសរុបជាង ២,២ ពាន់លានដុល្លារអាម៉េរិក និងបានផ្តល់ឱកាសការងារជាង ២ម៉ឺនកន្លែង។
លោក កំាង តុងងី ប្រធាននាយកដ្ឋានទំនាក់ទំនងនៃសមាគមមីក្រូហិរញ្ញវត្ថុកម្ពុជាបានឱ្យដឹងថានៅក្នុងឆ្នំា២០២៣ ឥណទានរបស់គ្រឹះស្ថានមីក្រូហិរញ្ញវត្ថុបានផ្តល់ជូន វិស័យកសិកម្មមានជាង ១.០៦៥លានដុល្លារអាម៉េរិក ឬស្មើនឹង ២១,៣%, ពាណិជ្ជកម្មលក់រាយ ១៤,៨% ពាណិជ្ជកម្មបោះដុំ ៤,៤%, សេវាកម្ម ៧,៤%, សំណង់ ៤,២%, សណ្ឋាគារ និងទេសចរណ៍ ៣,១%, ឧស្សាហកម្ម ៣,៨%, ដឹកជញ្ញូន និងឃ្លាំងស្តុក២,៨%, ក្រុមគ្រួសារ ៣១,៣% និងវិស័យផ្សេងៗទៀតប្រមាណ ៧%។
លោកបន្តទៀតថា ឥណទានកសិកម្មក្នុងវិស័យមីក្រូហិរញ្ញវត្ថុ មានកំណើនតិចតួចក្នុងឆ្នាំ២០២៣ បើប្រៀបធៀបនឹងឆ្នាំ២០២២ ខណៈដែលគ្រឹះស្ថានធនាគារមួយចំនួនចាប់ផ្តើមផ្តោតខ្លាំងលើវិស័យនេះ។ យ៉ាងណា កសិកម្មនៅតែជាអាទិភាពសម្រាប់វិស័យមីក្រូហិរញ្ញវត្ថុ ដោយសមាគមបានធ្វើការជំរុញការបង្កើតផលិតផលថ្មីៗ បំពេញតាមតម្រូវការរបស់កសិករ និងអ្នកពាក់ព័ន្ធ រួមទាំងរិះរកមធ្យោបាយដោះស្រាយបញ្ហាប្រឈមនានា។
លោក ដុក លួន ប្រធានសហគមន៍កសិកម្ម សែនហានចម្រើនផល មានទីតំាងនៅភូមិ ដំណាក់ត្រយឹង ឃុំសំរោងលើ ស្រុកបន្ទាយមាស ខេត្តកំពត បានឱ្យដឹងថា វិស័យកសិកម្មត្រូវការទុនច្រើន ដោយនៅពេលខ្លះត្រូវការជាទុនបង្វិលសម្រាប់ប្រើប្រាស់ទៅតាមរដូវ និងពេលខ្លះត្រូវការទុនវិនិយោគ ទំាងផ្នែកឯកជន និងសហគមន៍កសកម្ម។
លោកបន្តថា បច្ចុប្បន្នសហគមន៍មានសមាជិក៦០គ្រួសារ កំពុងតែសកម្មក្នុងការការដំាដុះបន្លែ និងផលិតស្រូវចំណី ហើយនៅក្នុងមួយឆ្នំា សហគមន៍ត្រូវការទុនប្រមាណ៦០លានរៀល ហើយតាមរយៈការប្រើប្រាស់ទុន ឬ ប្រាក់កម្ចី ពីគ្រឹះស្ថានហិរញ្ញវត្ថុនេះ ជួយឱ្យសហគមន៍អាចរកប្រាក់ចំណេញ ប្រមាណជាង១០លានរៀលនៅក្នុងមួយឆ្នំាផងដែរ។
បើយោងតាមលោក ដុក លួន សហគមន៍ប្រើប្រាស់ប្រាក់កម្ចីធ្វើជាទុនបង្វិលសម្រាប់ការដោះដូរ ប្រមូលទិញកសិផលរបស់សមាជិក រួមនិងកសិករទូទៅផ្សេងទៀតរស់នៅក្នុងមូលដ្ឋាន។ តួយ៉ាង ទិញស្រូវនៅក្នុងរដូវប្រមូលផល ដើម្បីស្តុកទុកក្នុងឃ្លំាង សម្រាប់លក់ចេញវិញនៅពេលស្រូវឡើងថ្លៃ ហើយតាមរយៈសហគមន៍នេះផងដែរ រាល់សមាជិកមានការផលិតជាទៀងទាត់ នូវការដំាដុះបន្ថែ និងជាស្រូវ រួមផ្សំជាមួយមុខរបរបន្ទាប់បន្សំផ្សេងទៀត ជួយឱ្យសេដ្ឋកិច្ចរបស់ពួកគាតាត់មានលំនឹងល្អ ស្ថិតក្នុងសេដ្ឋកិច្ចបច្ចុប្បន្ន៕ ដោយ៖Long Sareth
