ម្ចាស់កសិដ្ឋានចិញ្ចឹមបង្កងអូរស្រ្តាលី លោក ថាំង លីណា បានមើលឃើញការចិញ្ចឹមបង្កងអូរស្ត្រាលីនៅតាមប្រព័ន្ធផ្សព្វផ្សាយ YouTube ទើបជំរុញឱ្យលោកសិក្សាពីទីផ្សារបង្កងនោះនៅក្នុងស្រុករបស់ខ្លួនឃើញថាមិនទាន់មានអ្នកចិញ្ចឹម។ លោក លីណា បានស្រឡាញ់ការចិញ្ចឹមបង្កងនេះ បន្ទាប់មកក៏ស្វែងរកអ្នកចិញ្ចឹមបង្កងនៅខេត្តបន្ទាយមានជ័យ ដើម្បីសុំការណែនាំ និងផ្ដល់យោបល់ដើម្បីយកមកចិញ្ចឹមសាកល្បង។
លោក ថាំង លីណា ម្ចាស់កសិដ្ឋានចិញ្ចឹមបង្កងអូស្រ្តាលី ស្ថិតនៅភូមិព្រីងលើ ឃុំអន្លង់សំណ ស្រុកជីក្រែង ខេត្តសៀមរាប បានចាប់ផ្ដើមចិញ្ចឹមបង្កងតាំងពីចុងឆ្នាំ២០២០មក។ លោកមើលឃើញថា នៅស្រុករបស់ខ្លួនមិនទាន់មានអ្នកចិញ្ចឹមបង្កង ទើបលោកចាប់របរមួយនេះ។ ការដែលជំរុញទឹកចិត្តរបស់លោកឱ្យចាប់របរមួយនេះ គឺដោយសារលោកឃើញគេផ្សព្វផ្សាយតាម យូធូប។
បន្ទាប់ពីចិញ្ចឹមសាកល្បងទទួលបានផលិតផលល្អ លោក ថាំង លីណា ក៏បានពង្រីកការចិញ្ចឹមម្ដងបន្តិចៗ រហូតពង្រីកការចិញ្ចឹមបានដល់ ២០អាង ក្នុងនោះមានអាងបង្កាត់ពូជ និងអាងភ្ញាស់កូន។ ខណៈពេលដែលបង្កងគ្រប់អាយុ គឺត្រូវយកទៅដាក់ចិញ្ចឹម និងទម្លាក់ទៅក្នុងស្រះចិញ្ចឹមចំនួន ១០ស្រះ ហើយស្រះដែលទម្លាក់កូនបនច្ចុប្បន្ន ទើបតែសម្រេចបាន ៥ស្រះប៉ុណ្ណោះ។
ចាប់តាំងពីពេលចិញ្ចឹមរហូតមកដល់បច្ចុប្បន្ននេះ លោក លីណា បានប្រមូលផលបង្កងចំនួន ៣ដងហើយ ប៉ុន្តែពុំសូវទទួលបានផលដូចការគ្រោងទុកនោះទេ។ ដោយមានបង្កងខ្លះអាចយកទៅលក់លើទីផ្សារបាន និងខ្លះទៀតត្រូវប្រលែងចូលក្នុងស្រះវិញ ព្រោះលោក លីណា មានបញ្ហាខ្វះបច្ចេកទេសក្នុងការចិញ្ចឹម ទើបធ្វើឱ្យបង្កងធំធាត់មិនបានស្មើគ្នា។
ម្ចាស់កសិដ្ឋានរូបនេះ បានបញ្ជាក់ថា ៖’ទីផ្សារបង្កងដែលត្រូវលើកឱ្យម៉ួយ គេកំណត់យក ២៥កង្កង
មួយគីឡូក្រោម។ ហើយលក់រាយដែលពលរដ្ឋនៅក្នុងស្រុកភូមិជាមួយគ្នា គាត់ទិញយកតែបង្កងធំៗ គឺ ១២បង្កងមួយគីឡូ ដើម្បីយកទៅអាំង សោ្ងរ ឬដុត។ ប៉ុន្តែវាមានបន្តិចបន្តួចនោះទេ”។
ការប្រមូលផលបង្កងរបស់លោក លីណា ក្នុងមួយឆ្នាំបានចំនួន ២ដង។ រយៈពេល ៦ខែ មានបង្កងធំដែលចូលលេខតាមតម្រូវការទីផ្សារបាន គឺត្រូវចាប់ម្ដង ហើយបង្កងតូចដែលមិនទាន់ធំល្មមចាប់លើកទីមួយ នឹងត្រូវចាប់ម្ដងទៀតជាបន្តបន្ទាប់។ ការប្រមូលផលបង្កងវគ្គទី១ បានប្រមាណ ២០០គីឡូក្រោម លក់បានក្នុងមួយគីឡូ ១១ដុល្លារ។ នេះបើតាមការរៀបរាប់របស់លោក ថាំង លីណា រួចបន្ថែមថា ពេលប្រមូលផល គឺត្រូវដឹកយកទៅឱ្យម៉ូយដល់ទីតាំងនៅផ្សារក្នុងខេត្តសៀមរាប។
នៅថ្ងៃអនាគត់ម្ចាស់កសិដ្ឋានរូបនេះ មានផែនការពង្រីកការចិញ្ចឹមបង្កងអូរស្រ្តេលីបន្ថែម ទៅតាមសមត្ថភាពដែលអាចធ្វើទៅបានបន្តិចម្ដងៗ និងផែនការបង្កាត់ពូជកូន ដើម្បីលក់ចែកចាយទៅតាមគ្រប់ខេត្តក្រុងផងដែរ។ លោក លីណា បានបញ្ជាក់ថា៖ “បច្ចុប្បន្នខ្ញុំនៅខ្វះបច្ចេកទេសក្នុងការចិញ្ចឹម និងខ្វះដើមទុន ដើម្បីពង្រីកបន្ថែម។ ខ្ញុំសូមសំណូមពរឱ្យអ្នកមានបច្ចេកទេស ជួយចែករំលែកពីបច្ចេកទេសនៃការចិញ្ចឹមបង្កងបន្ថែម”៕
