រោងម៉ាស៊ីនកិនស្រូវក្នុងស្រុកចាប់ផ្តើមទិញស្រូវពីកសិករមកស្តុកទុកសម្រាប់កែច្នៃជាអង្ករដើម្បីនាំចេញ

ភ្នំពេញ៖ រោងម៉ាស៊ីនឡាយសែ ឬ City Riceនៅស្រុកថ្មគោលខេត្តបាត់ដំបងមានសកម្មភាពទិញស្រូវចូលជាបន្តបន្ទាប់ ជាក់ស្តែង មួយថ្ងៃទិញបរិមាណ 1200 តោន និង រោងម៉ាស៊ីន អៀង ហ៊ាង ស្រុកសង្កែ ខេត្តបាត់ដំបង ដដែលកំពុងតែទិញស្រូវចូលមួយថ្ងៃចំនួន 300 ទៅ 400 តោន។

ក្រៅពីនេះនៅមាន ក្រុមហ៊ុន Amru Rice ត្រៀមទិញស្រូវចូលនៅរដូវប្រមូលផលខែ កញ្ញា និង ខែ តុលា ឆ្នាំ២០២៤ នេះចំនួនសរុប ២៥០០០តោន ក្នុងនោះរួមមាន នៅឃុំបុស្សវែង ស្រុកប្រាសាទបង្ល័ង ខេត្តកំពង់ធំ ស្រូវសែនក្រអូបចំនួន ៣០០០តោន ស្រូវស្រង៉ែ : ១០០០០តោន ស្រូវOM : ២០០០តោន សរុប ១៥ ០០០តោន។

បន្ថែមពីនេះ ក្រុមហ៊ុន Amru Rice នឹងទិញស្រូវនៅ ឃុំកំពង់ព្រៀង ស្រុកសង្កែ ខេត្តបាត់ដំបង ស្រូវសែនក្រអូប : ២០០០តោន ស្រូវស្រង៉ែ : ៥០០០តោន ស្រូវOM : ៣០០០តោន សរុប ១០០០០តោន ផងដែរ។

យោងតាមសហព័ន្ធស្រូវអង្ករបង្ហាញថា ស្រូវភាគច្រើនដែលរោងម៉ាស៊ីនក្នុងស្រុកត្រូវការទិញស្តុកសម្រាប់កែច្នៃជាអង្ករដើម្បីនាំចេញគឺពូជស្រូវសែនក្រអូប និងស្រង៉ែដែលការទិញជាមួយតម្លៃខ្ពស់ជាងរាល់ឆ្នាំ។ ដោយឡែក ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ក្រសួងកសិកម្ម កំពុងធ្វើការសម្របសម្រួលជាមួយរោងម៉ាស៊ីនក្នុងស្រុកធំៗមួយចំនួនក្នុងការប្រមូលទិញស្រូវពីកសិករឲ្យបានទាន់ពេលក្នុងតម្លៃសមរម្យ។

សម្រាប់ដំណោះវែងឆ្ងាយជាលក្ខណៈបុរេសកម្មគឺការកសាងសហគមន៍កសិកម្មទំនើប និងការកសាងភាពជាដៃគូរយូអង្វែងវាងសហគមន៍និងរោងម៉ាស៊ីនដើម្បីផលប្រយោជន៍ទៅវិញទៅមកនិងដើម្បីផលប្រយោជន៍វិស័យស្រូវអង្កររបស់ជាតិទាំងមូល។

តាមប្រធានសហព័ន្ធស្រូវអង្ករកម្ពុជាក្នុងមួយថ្ងៃនៅរដូវនេះ រោងម៉ាស៊ីនក្នុងស្រុកអាចប្រមូលទិញស្រូវប្រមាណ 20000 តោនក្នុងមួយថ្ងៃ។បច្ចុប្បន្នតំលៃស្រូវ សែនក្រអូប និង ស្រង៉ែមានតំលៃល្អច្រើន បើប្រៀបធៀបជាមួយស្រូវ OM5451 ។ ដូច្នេះសូមបងប្អូនកសិករផ្លាស់ប្តូរមកផលិតស្រូវប្រភេទក្រអូបវិញ ដែលជាពូជពិសេស និង តំណាងអង្ករប្រណិតរបស់ប្រទេសកម្ពុជាយើង។

សម្រាប់ពូជមិនប្រកាន់ដូវដែលកំពុងប្រមូលផលនៅ ខែកញ្ញានេះ ស្រូវខ្មែរពូជសែនក្រអូប 01 កំពុងមានតំរូវការទីផ្សារច្រើនហើយតម្លៃខ្ពស់ជាងរាល់ឆ្នាំ (ជាមធ្យម 1400 រៀលមួយគីឡូ) ។ស្រូវពូជស្រង៉ែក៏មានទីផ្សារនិងតម្លៃល្អដែរគឺជាមធ្យមជិត 1200 រៀលមួយគីឡូ។

ចំពោះស្រូវក្រអូបប្រកាន់រដូវដែលនឹងប្រមូលផលនៅខែវិច្ឆិកានិងធ្នូខាងមុខនេះដូចជាពូជផ្ការរំដួលដែលធ្លាប់ឈ្នះបានពានរង្វាន់ជាអង្ករល្អដាច់គេលើពិភពលោកចំនួន 5ដង ក៏មានទីផ្សារកាន់តែល្អនិងតម្លៃខ្ពស់ដែរ។

ចំណែក ស្រូវដែលគេអាចយកទៅធ្វើជាគុយទាវ នំបញ្ចុកបានល្អ ដូចជាប្រភេទពូជក្រសាំងទាប និង ឆ្មាព្រំ ក៏មានទីផ្សារនិងតម្លៃល្អដែរ។ តាមរយៈគោលនយោបាយដាក់ពង្រាយមន្រ្តីកសិកម្មឃុំ និងកសាងសហគមន៍កសិកម្មទំនើបផ្សារភ្ជាប់មកទីផ្សារ ក្រសួងកសិកម្មរុក្ខាប្រមាញ់និងនេសាទ និងសហព័ន្ធស្រូវអង្ករ (CRF) កំពុងរួមគ្នាលើកស្ទួយផលិតកម្មស្រូវប្រកបដោយគុណភាពនិងភាតរៈបរិស្ថានដោយប្រើប្រាស់ពូជស្រូវរបស់ជាតិខ្មែរសម្រាប់ប្រកួតប្រជែងនៅលើទីផ្សារអន្តរជាតិ និងបន្តធានាសន្តិសុខស្បៀងជូនសង្គមជាតិទាំងមូល៕