ម្ចាស់កសិដ្ឋានចិញ្ចឹមជ្រូកកណ្ដុរព្រៃមួយកន្លែង បានលើកឡើងថា បច្ចុប្បន្នទីផ្សារជ្រូកកណ្ដុរព្រៃមានតម្លៃខ្ពស់ ហើយការផ្គត់ផ្គង់នៅតែមានភាពខ្វះខាត ដោយសារមានការបញ្ជាទិញច្រើន។ លោក លុច ឡាត ជាម្ចាស់កសិដ្ឋានចិញ្ចឹមជ្រូកព្រៃនៅខេត្ត…..បានចាប់ផ្តើមចិញ្ចឹមអស់រយៈពេល…..ហើយលោកក៏មានគម្រោងបង្កើតទីផ្សារទទួលទិញ និងបោះដុំ ដើម្បីជួយសម្រួលដល់កសិករសម្រាប់រកទីផ្សារកាន់តែទូលំទូលាយ។
លោក លុច ឡាត បានឱ្យដឹងថា ការចិញ្ចឹមជ្រូកកណ្ដុរ មិនមានបច្ចេកទេសអ្វីស្មុគ្រស្មាញនោះទេ ដោយចិញ្ចឹមតាមបែបធម្មជាតិដូចក្នុងជ្រូកស្រុកដែរ។ លោក ឡាត បានរៀបរាប់ថា ការថែទាំជ្រូកកណ្តុរព្រៃគឺដាក់ចំណីមួយថ្ងៃ ២ដង (ពេលព្រឹក និងពេលល្ងាច) ហើយងូតទឹកលាងសម្អាត នៅពេលថ្ងៃត្រង់ដើម្បីឱ្យជ្រូកត្រជាក់ខ្លួន។ ចំណែកចំណីក្នុងមួយខែប្រើអស់ ៥០០គីឡីក្រាម ហើយប្រភេទចំណីមានដូចជា កន្ទក់លាយជាមួយទឹក ត្រកួន ស្មៅ កន្ធុំថេត និងប្រភេទបន្លែផ្សេងៗទៀត។
“ទីផ្សារជ្រូកកណ្ដុរព្រៃនេះគឺល្អ មួយក្បាលលក់បានចាប់ពី ២៧ម៉ឺនរៀលឡើងទៅដល់៣៥ម៉ឺនរៀល ពោលគឺតម្លៃមើលទៅតាមជ្រូកធំតូច។ ជ្រូកប្រភេទនេះមានតម្រូវការទីផ្សារច្រើន ខ្ញុំមិនអាចផ្គត់ផ្គង់គ្រប់គ្រាន់នោះទេ”។ នេះបើតាមលោក លុច ឡាត បានឱ្យដឹងបន្តទៀតថា លោកមានការលំបាកនៅពេលដឹកជញ្ជូនជ្រូកលក់ឆ្លងពីខេត្តមួយទៅខេត្តមួយ ដោយអាជ្ញាធរហាមឃាត់ និងទាមទាររកលិខិតដឹកជញ្ជូន។
ម្ចាស់កសិដ្ឋានរូបនេះ បានសង្កត់ធ្ងន់ថា ជ្រូកប្រភេទនេះ មានទីផ្សារគ្រប់រដូវកាល ក្នុងមួយខែលោក ឡាត អាចផ្គត់ផ្គង់ជូនភ្ញៀវចាប់ពី ២០ក្បាលឡើងទៅ ដោយក្នុងនោះមានអ្នកបញ្ជាទិញពូជទៅចិញ្ចឹម និងអ្នកខ្លះយកទៅធ្វើម្ហូបអាហារ។
មូលហេតុដែលជំរុញឱ្យលោក លុច ឡាត ចិញ្ចឹមជ្រូកកណ្ដុរព្រៃនេះ ដោយសារការរាតត្បាតនៃជំងឹកូវីដ-១៩ ដែលធ្វើឱ្យលោកលក់មាន់ស្រែខាត ប៉ុន្តែដោយសារការស្រឡាញ់ផ្នែកកសិកម្ម ទើបបានទិញជ្រូកកណ្ដុរព្រៃពីខេត្តឧត្ដរមានជ័យយកមកចិញ្ចឹមកាលពីឆ្នាំ២០២០ ទើបទទួលបានផលល្អរហូតមកដល់បច្ចុប្បន្ន។
ចំពោះដើមទុនចិញ្ចឹមវិញ លោក ឡាត ចំណាយអស់ប្រមាណ ៣០០ដុល្លារដើម្បីដាក់ជ្រូកចិញ្ចឹមចំនួន ៣ក្បាល ខណៈបច្ចុប្បន្នបានដាក់មេពូជរហូតដល់ ៤៦ក្បាល និងរកចំណូលបានក្នុងមួយខែចន្លោះពី ៣លានរៀល ទៅ ៤លានរៀល។
