មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់និងនេសាទ រួមនិងអ្នកជំនាញក្នុងវិស័យស្វាយចន្ទីបានបង្ហាញក្តីរំពឹងថានៅឆ្នំា២០៣០ខាងមុខ ប្រទេសកម្ពុជានឹងអាចក្លាយជាអធិរាជស្វាយចន្ទី ដើម្បីសម្រេចបាននូវអធិរាជស្វាយចន្ទី អ្នកជំនាញទាមទារឱ្យភាគីពាក់ព័ន្ធចូលរួមជំរុញគោលនយោបាយជាតិស្តីពីស្វាយចន្ទីឆ្នំា២០២២-២០២៧ទំាងអស់គ្នា។
យោងតាម ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ បានឱ្យដឹងថា បច្ចុប្បន្នកម្ពុជាមានផ្ទៃដីដំាដុះដំណាំស្វាយចន្ទីសរុបដែលអាចប្រមូលផលបានមានជាង៥៨ម៉ឺនហិកតា ដែលអាចផ្តល់ទិន្នផលបាន៧៨ម៉ឺនតោន និងឆ្នំាខ្លះទៀតអាចបានដល់៩០ម៉ឺនតោន ហើយដូចឆ្នំា២០២៤ នេះអាចមានការថមថយទិន្នផលនៅរង្វង់៨០ម៉ឺនតោន ដោយសារការអាកាសធាតុមានការប្រែប្រួល។
ឯកឧត្តម តូច ប៊ុនហួរ បានគូសបញ្ជាក់ថា “មកទល់បច្ចុប្បន្នយើងមានសមត្ថភាពផលិតកែច្នៃដោយខ្លួនឯងមានត្រឹម១០% នៃគ្រាប់ស្វាយចន្ទីសរុប ក្រៅពីនេះមានជាង៨០%បាននាំចេញទៅប្រទេសជិតខាង មានដូចជាប្រទេសវៀតណាម មានគ្រាប់ឆៅ សើមនិងស្ងួត និងមួយផ្នែកទៀតបាននាំចេញទៅប្រទេសឥណ្ឌា ចិន ម៉ាឡេស៊ី បង់ក្លាដេសជាដើម”។
បើយោងតាម ឯកឧត្តមរដ្ឋលេខាធិការក្រសួងកសិកម្មថា ការនាំចេញវត្ថុធាតុដើមជាគ្រាប់ស្វាយចន្ទី ឆៅទៅប្រទេសច្រើន ហើយការកែច្នៃក្នុងស្រុកមានចំនួនតិច ធ្វើឱ្យបាត់បង់នូវតម្លៃបន្ថែម។សម្រាប់គ្រាប់គ្រាប់ស្វាយចន្ទីស្ងួត១តោន អាចកែច្នៃទៅជាផលិតផលសម្រេចគឺបាន២៥០គីឡូក្រាម។
ឯកឧត្តម តូច ប៊ុនហួរ មានប្រសាសន៍ថា ដោយមើលឃើញពីសក្តានុពលនៃផលិតផលដំណាំស្វាយចន្ទី សម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានផ្តល់ការណែនាំទៅដល់គណៈកម្មការគោលនយោយសេដ្ឋកិច្ចនិងហិរញ្ញវត្ថុ ដើម្បីរៀបចំធ្វើយ៉ាងណាអភិវឌ្ឍន៍ដំណាំស្វាយចន្ទីនេះឱ្យមានការរីកចម្រើននិងមានលក្ខណៈប្រកួតប្រជែងនៅលើទីផ្សារអន្តរជាតិ។
គោលបំណងជំរុញការកែច្នៃនិងការនាំចេញផលិតផលដែលបានកែច្នៃនេះទៅកាន់ពិភពលោកឱ្យបានកាន់តែច្រើន ជំរុញស្វាយចន្ទីកម្ពុជាឱ្យក្លាយជាប្រទេសនាំចេញស្វាយចន្ទីច្រើនជាងគេនៅលើពិភពលោក តាមរយៈការចរចារ កិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី ហើយបន្ទាប់យើងនិងពិចារណាទៅលើបញ្ហាចំនួនដើមទុនវិនិយោគលើការកែច្នៃនៅពេលបន្ទាប់ទៅតាមលទ្ធភាពជាក់ស្តែ និងចងក្រងបង្កើតជាសហគមន៍កសិកម្មទំនើប សម្រាប់ដំណាំស្វាយចន្ទី។
ឯកឧត្តម សង្កត់ធ្ងន់ថា “អ្វីដែលខ្ញុំសម្លឹងឃើញក្នុងឆ្នំា២០៣០ គឺ១០០%យើងនឹងឈានទៅអធិរាជស្វាយចន្ទីពិតប្រាកដ។មូលហេតុដែលខ្ញុំមានការអះអាងទីមួយយោងទៅលើកម្មវិធីគោលនយោបាយជាតិស្តីពីស្វាយចន្ទី ២០២២-២០២៧បានកំណត់ថានៅឆ្នំា២០២៧ ត្រូវកែច្នៃគ្រាប់ស្វាយចន្ទីឱ្យបានយ៉ាងតិចបាន២៥%។ប៉ុន្តែបើយើងក្រឡេកទៅមើលសន្ទុះក្នុងរយៈពេល៣ឆ្នំាចុងក្រោយនេះ ឃើញថាមានការវិនិយោគ ការកែច្នៃច្រើន រហូតមកដល់ពេលនេះមានជាង១០% អីចឹងនៅក្នុងរយៈពេល៣ឆ្នាំទៀត យើងគិតថា ២៥%នឹងឈានទៅដល់ ”។
ទាក់ទងកម្ពុជាអាចនិងក្លាយជា អធិរាជស្វាយចន្ទីនៅឆ្នំា២០៣០ខាងមុខ ត្រូវបាន លោក អួន ស៊ីឡុត ប្រធានសមាគមស្វាយចន្ទីកម្ពុជា បានឯកភាពថានៅឆ្នំា២០៣០ កម្ពុជានឹងអាចក្លាយជាអ្នកនាំចេញស្វាយចន្ទីដ៏ធំមួយ។ប៉ុន្តែទាមទារឱ្យភាពគីជាប់ពាក់ព័ន្ធទំាងអស់ចូលរួមជួយជំរុញគោលនយោបាយជាតិស្តីពីស្វាយចន្ទី២០២២-២០២៧ ដែលគ្រោងធ្វើការកែច្នៃគ្រាប់ស្វាយចន្ទីឱ្យបានដល់២៥% ឬស្មើនឹង១៧ម៉ឺនតោន។
