ស្របពេលផ្លែឪឡឹកលឿង និងផ្លែត្រសក់ផ្អែមមានការពេញនិយមនៅលើទីផ្សារ ប្រធានអង្គការអភិវឌ្ឍន៍កសិកម្មធម្មជាតិកម្ពុជា (CNAD) បានអះអាងថាកសិករប្រកបមុខរបរដំាឪឡឹកលឿង និងត្រសក់ផ្អែម លើផ្ទៃដីទំហំត្រឹមតែ២៥A គឺរកបានប្រាក់ចំណូលពីមុខរបររបស់ខ្លួលបានជាង ១ពាន់ដុល្លារនៅក្នុងមួយឆ្នំា ពោលមុខរបរមួយនេះបានចូលរួមលើកកម្ពស់ជីវភាពកសិករនៅតាមតំបន់បានយ៉ាងប្រសើរ។
លោក ចាវ ប៉េងណំា ប្រធានអង្គការ CNAD បានឱ្យដឹងថា ផ្លែឪឡឹកលឿង នៅពេលបច្ចុប្បន្ននេះ គឺមានការនិយមនៅលើទីផ្សារទំនើប ហើយប្រជាពលរដ្ឋខ្មែរក៏ចាប់ផ្តើមស្គាល់វាច្រើនផងដែរ ដោយសារឪឡឹកប្រភេទនេះវាមានរសជាតិឆ្ងាញ់ ហើយផ្តល់ទិន្នផលខ្ពស់សម្រាប់កសិករដំាដុះ។
បើយោងតាមប្រធានអង្គការ ខាងលើ ពូជឪឡឹកលឿងដែលប្រជាកសិករបានធ្វើការដំាដុះនៅតាមតំបន់ នាពេលសព្វថ្ងៃនេះ គឺនាំចូលពីតៃវ៉ាន់ និងប្រទេសវៀតណាម ហើយពូជឪឡឹកលឿងនេះត្រូវការរយៈពេលជាង ២ខែអាចប្រមូលផលបាន ហើយដើម្បីទិន្នផលខ្ពស់ កសិករទាមទារឱ្យការរៀបចំដីឱ្យបានល្អ និងការថែទំាឱ្យបានដិតដល់។
លោកលើកឡើង ការដាំដុះឪឡឹកលឿងនេះ អង្គការចាប់ផ្តើមលើកទឹកចិត្តដល់ប្រជាកសិករនៅតាមសហគមន៍ក្នុងឆ្នំា២០១៨ មានសមាជិក ៧គ្រួសារ តែបន្ទាប់ពីមានការគំាំទ្រនៅលើទីផ្សារ និងប្រជាពលរដ្ឋ ឃើញថាការចូលជាសមាជិកបានកើនឡើងដល់ ៧៥គ្រួសារ។ សម្រាប់កសិករដែលចេះពីបច្ចេកទេសក្នុងការដំាឪឡឹកដែលមានផ្ទៃដី ២៥A ឬ លើសតិចតួច ក្នុងមួយឆ្នំាអាចរកប្រាក់ចំណូល ១ពាន់ដុល្លារអាមេរិក។ ចំណែកកសិករដំាត្រសក់ផ្អែមដូចគ្នា អាចរកប្រាក់ចំណូលបាន ១ ៥០០ដុល្លារអាមេរិក។
លោកសង្កត់ធ្ងន់ថា « មកដល់សព្វថ្ងៃនេះប្រជាកសិករដែលបានធ្វើការដំាដុះត្រសក់ផ្អែម និងឪឡឹកលឿងនេះ ពួកគាត់មានជីវភាពល្អប្រសើរជាងពេលមុនដែលពួកគាត់មិនទាន់ចាប់ផ្តើមមុខរបរដំាដុះត្រសក់ផ្អែម និងឪឡឹកលឿងនេះ»។
បើតាមប្រធានអង្គការអភិវឌ្ឍន៍កសិកម្មធម្មជាតិកម្ពុជាមកដល់បច្ចុប្បន្ននេះ អង្គការមានសមាជិកប្រមាណ១ពាន់គ្រួសារ ហើយសមាជិកទំាងអស់ មាននៅខេត្ត កំពង់ចាម ត្បូងឃ្មុំ សៀមរាប បន្ទាយមានជ័យ បាត់ដំបង និងពោធិ៍សាត់។ ក្នុងនោះសម្រាប់កសិករ ប្រកបរបរដំាដុះឪឡឹក មាន ៧៥គ្រួសារ និងកសិករដាំដុះត្រសក់ផ្អែមមាន ១១២ គ្រួសារ៕
